18
1 Ty tsara niheo am’ Iirmeà boak’ am’ Iehovà, manao ty hoe:
2 Miongaha, mizotsoa mb’an-kiboho’ i mpanao valàñe-taney mb’eo, le hampijanjiñeko azo eo o entakoo.
3 Aa le nizotso mb’añ’anjomba’ i mpanao valàñe taney mb’eo, le nizoeko eo re nifanehak’ amo larò’eo.
4 Aa ndra mbia’mbia aman-kandra i valàñe am-pità’ i mpanao valàñe-taneiy, le namboare’e indraike ho valàñe hafa, ty amy ze natao’ i mpanao valàñe taney soa hanoeñe.
5 Le niheo amako ty tsara’ Iehovà, nanao ty hoe:
6 Ry anjomba’ Israele,
Aa vaho tsy mete hanoeko ama’ areo
hao ty sata’ i mpanao valàñe-taney?
hoe t’Iehovà.
Ingo, te hambañe ami’ty lietse
am-pità’ i mpanao valàñe taneio,
inahareo an-tañako,
ry anjomba’ Israele.
7 Ie volañako ami’ty fifeheañe,
naho ami’ty fifelehañe,
t’ie haombotse, naho harotsake,
vaho hahomake,
8 fe iambohoa’ i fifeheañe nafàkoy
o hatsivokara’eo,
le hivalik’amy raty ho nafetsako ama’ey.
9 Le ie volañeko i fifeheañe naho ty fifelehañe,
t’ie harafetse naho haoreñe;
10 f’ie manao raty amasoko eo,
tsy mañaoñe ty feoko;
le haneñenako i soa nitaroñeko
hitahiako azey.
11 Aa le saontsio am’ondati’ Iehodào,
naho amo mpimoneñe e Ierosalaimeo,
ty hoe: Hoe t’Iehovà:
Inao, hañajariako hankàñe,
naho ikitrohako hekoheko;
Mitoliha!
songa amy fitsilea’e tsy vokatsey,
vaho ovao o sata’ areoo
naho o fitoloña’ areoo.
12 Fa hoe iereo: Famoeam-piay zay;
fa hañavelo amo fisafiria’aio zahay,
sindre hañorike ty fanjeharan’arofo’e.
13 Aa le hoe t’Iehovà:
Añontaneo amo fifeheañeo henaneo,
ia ty nahajanjiñe i hoe zay;
toe nanao halatsàñe i somondrara
ana’ Israeley.
14 Hipotak’ amy vato an-kivokey hao
ty fanala’ i Lebanone?
Mb’ia te nasintake i rano manintsy mikararake boak’añ’ambahiniy?
15 Fe nandikok’ ahy ondatikoo,
nañembok’ an-drahare tsy vente’e;
nampitsikapy iareo amo lala’eo,
amo lalan-taoloo,
hitsilea’ iareo añ’oloñoloñe ao,
fa tsy an-dàmoke;
16 Hanoeñe halatsañe ty tane’ iareo,
fikosihañe nainai’e;
Songa ho vereñe ty mioza ama’e,
vaho hikofikofi-doha.
17 Haboeleko manahake t’ie an-tioke
atiñanañe añatrefa’ o rafelahi’ iareoo;
hiambohoako,
fa tsy hampiatrefako laharañe,
amy androm-peh’ohatsey.
18 Le hoe iereo,
Antao hikitro-draha am’ Iirmeà;
fa tsy ho modo amo mpisoroñeo ty Hàke
naho amo mpitokio i tsaray.
Antao hanjevoñe aze am-pameleke,
fa leo raik’ amo enta’eo
tsy ho haoñen-tika.
19 Haoño raho ry Iehovà, vaho
janjiño ty feo’ o mpikilily ahikoo.
20 Ty raty hao ty añavahañe ty soa?
amy te nihalia’ iareo koboñe ty fiaiko.
Tiahio i niongahako añatrefa’o eo
nitaliliako hasoa,
hampiholiarañe iareo amy haviñera’oy.
21 Aa le aseseo mb’an-kerè o keleia’eo, ampikovovoho mb’an-kaozara’
i fibaray mb’eo;
le ampifandalao o ana’eo
o rakembao ho ramavoiñe;
naho ampizevo hivetrake ondati’eo,
vaho ampitrobahem-pibara
an-kotakotak’ ao o ajalahi’iareoo.
22 Ee te ho janjiñeñe boak’añ’anjomba’ iareo ty kaikaike,
ie ampivovoa’o firimboñan-dahin-defoñe; amy te nihalia’ iareo koboñe hitsepak’ ahy,
vaho nañetaha’ iareo fandrike
o tombokoo.
23 Fe arofoana’o, ry Iehovà,
ze hene fikililia’ iareo hañè-doza amako,
ko ihevean-kakeo vaho ko faopaohe’o tsy ho añatrefa’o o tahi’iareoo;
f’ie rotsaho aolo’o eo,
ondroho amy andron-kaviñera’oy.