19
1 Hoe t’Iehovà: Miviliaña zonjo-tane raike amy mpanao valàñe-taney, le mindesa roandria’ ondatio, naho zokem-pisoroñe;
2 vaho mionjona mb’am-bavatane’ i Ben-Hinome, mb’am-pimoahañe an-dalambey atiñanam-b’eo, le saontsio eo o tsara ho taroñeko ama’oo,
3 ami’ty hoe:
Janjiño ty tsara’ Iehovà,
ry mpanjaka’ Iehodào,
naho ry mpimone’ Ierosalaimeo;
hoe t’Iehovà’ i Màroy,
Andrianañahare’ Israele:
Ingo fa hampombako hankàñe
ty toetse toy, hampitsantsàñe
ze fonga ravembia hijanjiñe aze;
4 amy te naforintse’ iereo raho,
naho nampialihe’ iereo ty toetse toy,
naho nañemboke tsotse
aman-drahare ila’e
tsy nifohi’ iereo ndra o roae’ iareoo,
ndra o mpanjaka’ Iehodào;
nilipore’ iereo lio-màliñe ty toetse toy;
5 le nandranjia’ iareo tamboho t’i Baale, hamorototo o ana’ iareoo añ’afo ao
ho soroñañe amy Baale;
ie tsy nililieko, tsy nitaroñako
naho tsy nimoak’am-pitsakoreako ao.
6 Aa le ho tondroke ty andro,
hoe t’Iehovà,
te tsy ho tokaveñe ty hoe Tofete
ty toetse toy, ndra ty hoe
Vavatanen’ ana’ i Hinome,
te mone ty Vavatanem-panjamanañe;
7 Le ho koaheko ami’ty toetse toy
ty fanoroan-keve’ Iehodà
naho Ierosalaime;
le hampikorovoheko fibara
añ’atrefa’ o rafelahi’ iareoo,
naho am-pità’ o mipay ty fiai’ iareoo;
vaho ho fahanako ami’ty lolo’ iareo o voron-dikerañeo
naho o bibi’ty tane toio;
8 naho hanoeko halatsañe ty rova toy,
naho fikosihañe;
le hene ho vereñe ze miary eo vaho
hikosìke ty amo hekoheko iabio;
9 le hampikamaeko iareo
ty sandri’ o ana-dahi’eo naho
ty nofo’ o anak’ampela’eo,
naho songa hikama ty nofo’ o rañe’eo, amy fañarikatohañey naho amy fanjirañey, vaho amy haloviloviañe hanoe’ o rafelahi’e mipay ty fiai’ iareooy.
10 Ie amy zao, jeñaho am-pahaisaha’ indaty mindre ama’o rey i zonjoñey,
11 vaho ano ty hoe:
Hoe t’Iehovà’ i Màroy:
Hanahake zay ty hampidemohako
ondaty retoa naho ty rova toy,
hambañe ami’ty fampijeñafañe
ty zonjòm-panao valàñe tane,
t’ie tsy ho lefe amboareñe ka;
le halenteke e Tofete ao iereo
amy t’ie tsy ho aman-tanem-pandeveñañe.
12 Zay ty hanoako ami’ty toetse toy,
hoe t’Iehovà,
naho amo mpimone’eo,
soa te hampanahafeko amy Tofete
ty rova toy,
13 le ho hambañe amy Tofete
o anjomba’ Ierosalaimeo, naho
o anjombam-panjaka’ Iehodà fa vinetao,
toe ze hene anjomba nañemboke amo valobohòn-dikerañeo,
vaho nidoañañe enga-rano
amo ‘ndrahare ila’eo.
14 Ie pok’eo boake Tofete t’Iirmeà, amy nañiraha’ Iehovà aze hitoky; le nijohañe an-kiririsa’ i anjomba’ Iehovày eo nanao ty hoe am’ondaty iabio:
15 Hoe t’Iehovà’ i Màroy, Andrianañahare’ Israele: Inao, te hafetsako ami’ty rova toy naho amo tanà’e iabio o haliforan-kankàñe nitseizakoo; amy t’ie nampigan-kàtoke, tsy nijanjiñe o entakoo.