5
Mpikoko
1 Fa nimoak’ amy golobokoy raho,
ry zaiko, enga-vaoko;
fa natontoko ty rameko
naho o mañi-dèkoo;
fa nihaneko ty papi-tanteleko
naho ty tanteleko;
fa ninomeko ty divaiko
naho ty rononoko.
Mpirañetse
Mikamà, ry rañetseo, naho minoma;
minoma am-pidadañe, ry mpikokoo.
Ipaia’ i Kokoa’e Haleñe
2 Niroro raho fe nañente ty troko.
Inay! Mañonkòñe i kokoakoy:
Sokafo raho ry zaiko, mami’ty fiaiko,
ty dehoko, ginoke tsy aman-kila.
Kotsa’ ty zono ty lohako,
ty voloko ami’ty hamandoa’ i haleñey.
3 Fa nafahako ty saroko—
mbe haombeko hao?
Fa sinasako o tombokoo—
mbe ho lotoeko hao?
4 Nazili’ i kokoakoy ami’ty hiri’
i sikadañey ty fità’e;
vaho nampiponaponake o añ’ovako ao.
5 Niongake raho hanokàfako i kokoakoy,
nitsopatsopake rame o tañakoo,
rame mitsiritsioke o rambo-tañakoo,
amo fitanañ’ i sikadañeio.
6 Nisokafeko i kokoakoy,
fe nitolik’ ane i kokoakoy, fa nienga;
toe nilesa ty troko amy saontsi’ey;
pinaiko fe tsy nahatrea,
kinoiko fe tsy nanoiñe.
7 Nitendrek’ ahy o mpigaritseo,
ie nañariofe’ iereo i rovay;
linafa’ iereo, vinonotrobo’ iereo;
tinava’ o mpigari-kijolio i sarokoy!
8 Ry anak’ ampela’ Ierosalaimeo,
ifantako, naho isa’ areo i kokoakoy,
ino ty hisaontsia’ areo?
Zaho toiram-pikokoañe.
Rañe’eo
9 Mpikoko manao akore i mpikoko azoy,
ry hatrenotrenon’ ampelao?
Mpikoko manao akore i mpikoko azoy,
ie namantok’ anay.
Kokoa’e
10 Miloeloe i kokoakoy
mbore volovoloeñe,
miambak’ ami’ty alen-dahy.
11 Volamena hiringiri’e ty añambone’e;
mitaporetaporetse o maroi’eo,
hamaintem-bolon-drelove.
12 Hoe deho añ’olon-torahañe eo
o fihaino’eo,
sinasa an-dronono,
soa fimoneñe am-pitoboha’eo.
13 Hoe tihin-ahemañitse,
kijolin-kamañirañe, o fiambina’eo;
vinda mitsopake rame o soñi’eo.
14 Bodam-bolamena o fità’eo,
ibangoan’ tarsise,
hoe te nifen-drimo nivàñeñe, niravahañe safira ty fañòva’e.
15 Bodan-tsinihara nandreketam-bolamena ki’e o fandia’eo.
Manahak’ i Libanone ty vinta’e, ami’ ty hasoa’ o mendorave’eo.
16 Loho mamy ty falie’e;
vata’e mahasinda;
ie i kokoakoy naho i rañekoy,
ry anak’ampela’ Ierosalaimeo.