6
Rañe’eo
1 Nimb’aia i kokoa’oy,
ry maintelèn’ampelao?
Nitsile mb’aia i kokoa’oy,
hindreza’ay fipay?
2 Nizotso mb’an-golobo’e mb’eo
i kokoakoy,
mb’am-pilafiham-pahafiriañe mb’eo, hiarake an-golobo’e ao,
naho hanontoñe o voñem-bindao.
3 A i kokoakoy raho, vaho ahiko re,
ie miarak’ am-baremañitse ao.
Mpikoko
4 Hamotsontane rehe, kokoako,
manahak’ i Tirzà,
naho ty hasoa’ Ierosalaime,
amam-bolonahetse hoe lahialen-defoñe
mañonjom-borovoro.
5 Atoliho mb’eo hoekeo o maso’oo,
fa mampivalitaboak’ ahy; manahake ty lia-rain’ose mikararake mañambane i Gilade mb’eo o volo’oo.
6 Lia-rain’ añondri-vave mionjoñe boak’ ampanasañe ao o nife’oo,
songa reke-pihambañe,
ndra raike tsy jeña.
7 Hoe vakim-boan-draketamena
ty fitendrean’ aoli’o
an-kalo’ o marerarera’oo.
8 Mete ho enempolo ty valim-panjaka,
naho valompolo o sakeza’eo
vaho somondrara tsy fotofoto;
9 fa ihe ry dehoko, ry homozohozo’e,
tsy amañ’ohatse, bako tokan-drene’e,
mitoratsik’ amy nisamak’ azey.
Ie nizoe’ o somondrarao
le natao’ iareo soa-tata,
nandrenge aze ka o valim-panjakao
naho o sakezao.
Rañe’eo
10 Ia o miboake hoe t’ie andro manjirikeo? motsotsore
hoe i volan-dorisay,
mikotritriake hoe i àndroy,
mahalatsa hoe valobohòke
mirañoraño an-kobaiñe?
Kokoa’e
11 Nizotso mb’añ’ala-vondron-tsakoa
mb’eo raho
hisary o fitirim-bao am-bavataneo,
hañenteako ke mibotiboty o vaheo,
he mamòñe o raketao.
12 Niambovo amako te
navotra’ ty troko an-tsarete ao,
hehe te añ’ilako eo ty roandria.