కీర్తన 122
దావీదు యాత్రకీర్తన.
1 “యెహోవా ఆలయానికి వెళ్దాం” అని
నాతో అన్న వారితో నేను సంతోషించాను.
2 ఓ యెరూషలేమా, మీ గుమ్మాల్లో
మా పాదాలు నిలిచి ఉన్నాయి.
3 యెరూషలేము బాగుగా కట్టబడిన పట్టణము;
అది దగ్గరగా కుదించబడింది.
4 ఇశ్రాయేలీయులకు ఇవ్వబడిన శాసనం ప్రకారం
యెహోవా నామానికి కృతజ్ఞతాస్తుతులు చెల్లించడానికి
వారి గోత్రాలు అనగా
యెహోవా గోత్రాలు అక్కడికి ఎక్కి వెళ్తాయి.
5 అక్కడ తీర్పు కొరకైన సింహాసనాలు ఉన్నాయి,
అవి దావీదు ఇంటివారి సింహాసనాలు.
6 యెరూషలేము యొక్క సమాధానం కోసం ప్రార్థించండి.
“యెరూషలేమా, నిన్ను ప్రేమించేవారు క్షేమంగా ఉందురు గాక!
7 మీ ప్రాకారాలలో సమాధానం
మీ కోట గోడలలో అభివృద్ధి ఉండును గాక!”
8 నా సోదరులు నా స్నేహితుల కోసం
“మీలో సమాధానం ఉండును గాక” అని నేను అంటాను.
9 మన దేవుడైన యెహోవా మందిరం కోసం
మీ వృద్ధిని నేను కోరతాను.