కీర్తన 28
దావీదు కీర్తన.
1 యెహోవా, నేను మీకు మొరపెట్టుకుంటున్నాను;
మీరు నా కొండయై ఉన్నారు,
నా మొరను నిర్లక్ష్యం చేయకండి.
ఒకవేళ మీరు మౌనంగా ఉంటే,
నేను గుంటలోకి దిగిపోయే వారిలా అవుతాను.
2 నీ పరిశుద్ధాలయం వైపు
నా చేతులెత్తి,
కరుణ కొరకై నేను చేసే మొర
సహాయం కొరకై నేను చేసే ప్రార్థన ఆలకించండి.
3 దుష్టులతో, చెడు చేసేవారితో పాటు
నన్ను లాక్కు వెళ్లకండి.
వారు పొరుగువారితో స్నేహపూర్వకంగా మాట్లాడతారు కాని,
వారి హృదయాల్లో దుర్మార్గం పెట్టుకుంటారు.
4 వారి క్రియలకు
వారి చెడు పనికి తగ్గట్టుగా చెల్లించండి.
చేతులార వారు చేసిందానికి ప్రతీకారం చేయండి;
వారికి తగిన ప్రతిఫలమివ్వండి.
5 యెహోవా క్రియలను గాని
ఆయన తన చేతులతో చేసిన వాటిని గాని వారు గ్రహించరు,
కాబట్టి ఆయన వారిని పడగొడతారు
మరలా వారిని నిలబెట్టరు.
6 యెహోవా నా విజ్ఞాపన మొర విన్నారు
కాబట్టి ఆయనకు స్తుతి కలుగును గాక.
7 యెహోవాయే నా బలం నా డాలు;
హృదయపూర్వకంగా ఆయనను నమ్మాను, నాకు సాయం దొరికింది.
నా హృదయం సంతోషంతో ఉప్పొంగి పోతుంది.
నా పాటతో నేను ఆయనను స్తుతిస్తాను.
8 యెహోవాయే తన ప్రజలకు బలము.
తన అభిషిక్తుడికి ఆయనే రక్షణ దుర్గము.
9 మీ ప్రజలను రక్షించండి మీ వారసత్వాన్ని దీవించండి;
వారికి కాపరివై ఎల్లప్పుడూ వారిని మోయండి.