7
Naꞌilulik Melkisedek aas liu naꞌilulik Lewi no husar-binan sia
1-3 Uluk aan, Melkisedek dadi naꞌi baa kota Salem. Nia moos naꞌilulik bodik ema mak loꞌu-sudur baa Naꞌi Maromak Mak Aas Kaliuk. Niakaan naran Melkisedek, lia isin naꞌak, “Naꞌi Neon Loos”. Naꞌi Salem lia isin naꞌak, “Naꞌi Dame”. La noo ema ida mak natene Melkisedek huun dikin. La noo mak natene niakaan ina, niakaan ama, no niakaan bei uluk sia. La noo mak natene niakaan oras moris, no oras mate. Tan baa nia, ita bele hanesa Melkisedek no Naꞌi Maromak Oan Yesus, tan Melkisedek moos dadi naꞌilulik toꞌo nima-nimak.
Baa dala ida, naꞌi naꞌin hira mai no siakaan sondadu sia atu nadau nola naha nosi Bei Abraham niakaan mamaluk sia. Hotu, Bei Abraham baa natuda namutuk no niakaan mamaluk sia, toꞌo natoba nola naꞌin nia sia. Bei Abraham sia moos nola nikar siakaan naha hotu-hotu. Baa oras Bei Abraham laꞌo fila, Melkisedek sai nosi kota Salem atu baa nasoru nia. Hotu, Melkisedek dale natuun matak-malirin baa Bei Abraham naꞌak, “Nebee Naꞌi Maromak Mak Aas Kaliuk natuun matak-malirin baa o.” Hotu Bei Abraham faꞌe foo baa Melkisedek faꞌek ida nosi fafaꞌek sanulu nosi naha hotu-hotu mak nia nadau nola nikar nia. Nia foo nunia, tan Melkisedek, naꞌilulik nosi Naꞌi Maromak Mak Aas Kaliuk.
4 Hanoin diꞌa-diꞌak lia Melkisedek neꞌe! Bei Abraham faꞌe foo baa nia faꞌek ida nosi fafaꞌek sanulu nosi naha hotu-hotu mak diꞌak kaliuk mak nia nola nikar tiꞌan nia. Tan lia nia, ita hatene haꞌak, Melkisedek nia, ema boot.
5 Mais baa oras nia, Naꞌi Maromak sei la foti ema ida dauk dadi naꞌilulik. Toꞌo Bei Abraham niakaan bei oan Lewi iha, foin Naꞌi Maromak foti Lewi no niakaan husar-binan sia dadi baa naꞌilulik bodik hunun Israꞌel hotu-hotu. Naꞌi Maromak moos natuun ukun naꞌak, hunun seluk sia musti faꞌe foo baa ema nosi hunun Lewi, faꞌek ida nosi fafaꞌek sanulu nosi toꞌos isin.
6 Masik Melkisedek lahoos Lewi niakaan husar-binan moos, bei Abraham faꞌe foo baa nia faꞌek ida nosi fafaꞌek sanulu, tan nia nafoli Melkisedek nia naꞌak, ema boot. Baa oras nia, Bei Abraham simu mamenon tiꞌan nosi Naꞌi Maromak naꞌak, Naꞌi Maromak atu natuun matak-malirin baa nia. Masik nunia moos, Melkisedek sei dale naꞌak, “Nebee Naꞌi Maromak Mak Aas Kaliuk natuun matak-malirin baa o.”
7 Neꞌe moos dadi kakaer naꞌak, Melkisedek nia, ema boot. Tan ema mak dale foo matak-malirin, nanis boot liu ema mak simu matak-malirin.
8 Naꞌilulik sia hotu-hotu bele simu nola faꞌek ida nosi fafaꞌek sanulu. Mais tan sia ema raiklaran da-daun dei, kleu-leur sia moos mate. Naꞌilulik Melkisedek moos simu faꞌek ida nosi fafaꞌek sanulu. Mais ita bele katak haꞌak, nia moris nohuun, tan Hakerek Moon la katak naꞌak nia mate.
9-10 Tan Bei Abraham faꞌe foo baa Melkisedek faꞌek ida nosi fafaꞌek sanulu, ita bele katak haꞌak, Bei Abraham selu kedan tiꞌan faꞌek ida nosi fafaꞌek sanulu bodik niakaan bei oan Lewi.
Ita buka naꞌilulik foun, tan naꞌilulik tuan la bele tulun ita toꞌo la hoo sala ona
11 Baa oras Lewi niakaan husar-binan sia dadi naꞌilulik, Naꞌi Maromak boi Bei Musa maun Harun dadi naꞌilulik boot dala uluk. Naꞌilulik sia serwisu natudu dalan nebee ema bele moris loos no diꞌa-diꞌak no Naꞌi Maromak. Mais, masik ema tuir ukun-badu hotu-hotu moos, naꞌilulik oin nuꞌu Harun la bele nalo sia dadi ema moon. Tan lia nia, musti noo naꞌilulik oin seluk, nuꞌu Melkisedek.
12 Mais, kalo noo naꞌilulik foun mak seluk naꞌilulik tuan, musti seluk noo ukun-badu tuan.
13 Naꞌilulik foun nia, mak Yesus. Nia moris nosi ema hunun seluk, lahoos nosi ema hunun Lewi. Tuir Ukun-badu Bei Musa, naꞌilulik oin nuꞌu Harun, musti mai nosi hunun Lewi dei, la bele nosi hunun seluk.
14 Mais ita hotu-hotu hatene haꞌak, itakaan Naꞌin Yesus Kristus moris nosi hunun Yahuda. Tuir Ukun-badu Bei Musa, la noo naꞌilulik nosi hunun nia.
15 Mais oras neꞌe, Naꞌi Maromak la tau tenik ukun-badu tuan nia, tan Yesus iha tiꞌan. Nia dadi naꞌilulik foun nuꞌu Melkisedek.
16 Naꞌi Maromak foti Nia, lahoos tan Niakaan hunun, mais tan Nia noo beran atu moris toꞌo nima-nimak. La noo ida moos mak bele nadodok Nia.
17 Hakerek Moon naꞌak,
“O neꞌe, dadi naꞌilulik toꞌo nima-nimak,
tan O, oin ida nuꞌu Melkisedek uluk nia.”
18 Neꞌe naꞌak, Ukun-badu tuan mak uluk Naꞌi Maromak foo baa Bei Musa, la noo beran tiꞌan atu tulun ema. Tan baa nia, Naꞌi Maromak natuka Ukun-badu tuan nia.
19 Tan masik ema moris nodi nalo tuir Ukun-badu tuan nia sia hotu-hotu moos, sia sei noo sala. Tan lia nia, Naꞌi Maromak loke seluk dalan mak diꞌak kaliuk, nebee ita bele moris dame malu ho Nia.
Yesus nia, naꞌilulik mak makaꞌas liu naꞌilulik uluk sia
20 Uluk, baa oras Naꞌi Maromak foti Lewi husar-binan sia dadi baa naꞌilulik, Nia la nameno nodi narai aan no sia.
21 Mais baa oras Nia foti Yesus dadi baa naꞌilulik, Nia nameno naꞌak,
“Haꞌu neꞌe, Naꞌin!
Haꞌu karai aan kaꞌak, Haꞌu la kseluk lia saa ida mak Haꞌu kameno tiꞌan.
Haꞌu kfoti O dadi baa naꞌilulik,
nebee malaꞌok Okaan serwisu nohuun.”
22 Nodi mamenon nia, Naꞌi Maromak nodi Yesus natebes baa ita naꞌak, Nia atu namate menon mak diꞌak kaliuk tenik no ita.
23 Uluk, naꞌilulik tuan sia kona seluk nohuun, tan sia mate.
24 Mais Yesus, dadi naꞌilulik foun mak la mate. Nia nalaꞌo Niakaan serwisu nohuun. La noo ida mak seluk Nia.
25 Nia bele sori ema hotu-hotu mak nakara mai baa Naꞌi Maromak nodi Niakaan naran. Tan Nia moris nohuun, Nia dadi itakaan Ema iha Naꞌi Maromak oin mak tulun ita nohuun.
26 Tebes. Yesus neꞌe, naꞌilulik boot mak fatan bodik ita. Nia moon, la nalo sala sa-saa. Nia seluk nosi ita ema maksalan. Naꞌi Maromak moos foti-nahaas Nia liu hotu-hotu iha laleꞌan no raiklaran.
27 Tan lia nia, Yesus diꞌak liu naꞌilulik boot tuan sia hotu-hotu. Uluk, naꞌilulik boot tuan sia musti sera duꞌuk sera tunun sura loron, nebee Naꞌi Maromak kasu mohu siakaan salan. Foin sia bele nalo sera bodik ema seluk. Mais Yesus la nalo hei-hein nunia, tan Nia latan isin lolon duꞌuk dadi baa sera dala ida dei. Sera nia toꞌo tiꞌan, bodik Naꞌi Maromak kasu mohu ema raiklaran salan.
28 Tuir Bei Musa Ukun-badu, musti foti ema raiklaran dadi naꞌilulik boot. Mais naꞌilulik boot oin nunia, sei noo sala no bele mate. Tan lia nia, Naꞌi Maromak namate menon foun naꞌak, Nia atu foti Niakaan Oan dadi naꞌilulik boot. Tan Niakaan Oan, la noo sala kois. Nia moos nafati nohuun.