8
Naꞌi Maromak nodi Kristus atu namate menon foun mak diꞌak liu mamenon tuan
1 Lia isin nosi lia mak haꞌu kdale neꞌe sia, nuneꞌe: oras neꞌe, ita hoo naꞌilulik boot mak makaꞌas liu naꞌilulik boot uluk sia. Nia, mak Yesus. Nia nabesi aan kaer ukun iha laleꞌan, iha Naꞌi Maromak Mak Aas Kaliuk sorin kwana.
2 Nia nalaꞌok Niakaan serwisu iha Naꞌi Maromak Niakaan Fatin Lulik. Fatin nia, Naꞌi Maromak duꞌuk mak nalo, lahoos ema raiklaran.
3 Naꞌilulik boot siakaan serwisu mak neꞌe: musti nodi sera tunun no sera seluk atu foo baa Naꞌi Maromak. Tan lia nia, Yesus moos musti nodi sera.
4 Mais Yesus la nalaꞌok Niakaan serwisu iha raiklaran, tan noo naꞌilulik iha raiklaran tiꞌan mak foo sera baa Naꞌi Maromak tuir Ukun-badu Bei Musa.
5 Sia nalaꞌo siakaan serwisu iha Batane Hamulak. Batane Hamulak nia, ilas nuꞌu Uma Hamulak Huun iha laleꞌan. Baa oras Bei Musa atu nariik Batane nia, Naꞌi Maromak foo natene naꞌak, “Manoin diꞌa-diꞌak! O musti malo tebe-tebes tuir ilas mak Haꞌu katudu tiꞌan baa o iha foho leten nia!”
6 Naꞌi Maromak katak tebes baa Bei Musa nunia. Mais Yesus Niakaan serwisu makaꞌas liu naꞌilulik tuan siakaan serwisu. Oras neꞌe, Naꞌi Maromak namate menon mak diꞌak liu mamenon tuan, tan Nia nodi Yesus dadi ailalete, nebee ema raiklaran bele dame malu no Nia.
7 Uluk, Naꞌi Maromak namate menon tuan no Bei Musa baa oras natuun Ukun-badu. Mais ema raiklaran la bele moris loos tuir Ukun-badu nia sia. Tan sia la bele moris tuir Naꞌi Maromak mamenon nunia, sia la bele diꞌa-diꞌak no Nia. Neꞌe naꞌak, musti noo mamenon foun mak natudu dalan foun nebee ema raiklaran bele diꞌa-diꞌak no Naꞌi Maromak.
8 Uluk, Nia nasee Niakaan ema sia, oras sia nakur bei-beik Niakaan Ukun-badu tuan. Oras Nia la terus tenik tiꞌan, Nia nahibu sia naꞌak,
“Rona diꞌa-diꞌak, tan Haꞌu neꞌe, emikaan Naꞌin!
Haꞌu atu kamate menon foun
ko ema klubun Israꞌel,
no ema hunun Yahuda.
9 Lia mamenon mak Haꞌu atu kamate ko sia nia,
la manesak no lia mamenon mak uluk Haꞌu kamate
ko siakaan bei uluk sia.
Uluk, Haꞌu kaer siakaan liman,
kodi kalaꞌo sia sai kosi rai Mesir.
Mais sia la nalo tuir saa
mak sia nameno tiꞌan no Haꞌu.
Tan baa nia, Haꞌu la koꞌuk titu tenik sia ona.
10 Lia mamenon mak Haꞌu atu kamate ko ema hunun Israꞌel,
isin nuneꞌe:
Haꞌu atu krai Haꞌukaan ukun-badu iha siakaan kakutak laran.
Haꞌu atu kakerek Haꞌukaan ukun iha siakaan neon laran.
Hotu Haꞌu kdadi baa siakaan Maromak.
Sia moos dadi baa Haꞌukaan ema.
11 Sia lalika hanorin tenik baa siakaan mamaluk sia,
no maun-biin-alin sia haꞌak,
‘Emi musti hatene Naꞌi Maromak!’
Sia lalika dale nunia ona, tan hotu-hotu natene Haꞌu tiꞌan,
nahuu nosi kau mea oan toꞌo matas.
12 Masik sia nalo sala moos,
Haꞌukaan neon atu monu baa sia.
Haꞌu moos kaluꞌa lakon siakaan salan hotu-hotu.”
13 Tan Naꞌi Maromak dale naꞌak, Nia atu namate menon foun no sia, ita bele hatene haꞌak, mamenon tuan nia, la noo folin tiꞌan. La kleur falik, lakon mohu ona.