Mə'əllimın kitab
1
Gırgın q'əran vuççud deşin kar vodun
1 İna gaf Mə'əllimee, İyerusalimee paççahiyvalla hav'uyne, Davudne dixee hav'u.
2 Mə'əllimee eyhen:
– Q'əran vuççud deşin kar!
Q'əran vuççud deşin kar!
Gırgın ıxha-ayk'anne booğak akar vod!
3 İnsanıs verığne avur qorxuyke
hucoona hiyxhar?
4 İnsanar qabı-avayk'ananbı,
dyunyemee gırgıne gahbışilycad çine cigee axva.
5 Verığ k'yooçena, ılqooç'ena,
qiyğa meeb ılqevç'esva
çine cigeeqa zaraba g'adaaxhvan.
6 Mıts cənubulqa,
qiyğa şimalılqa aa'a.
İlyviyk'ar-ilyviyk'arıb
çine yəqqı'lqa siviyk'al.
7 Gırgın damabı deryaheeqa gyodatstse,
deryahme gyaats'e deş.
Damabı gyodatstsene cigeeqacad
meed gyotstses.
8 İnsanısse gırgıne karan
vuc nimeeyiy ozar ha'a,
eyhes əxə deş –
ul, ilyaakıyke idyaats'e,
k'ırıd, k'ırı alixhxhiyke gidyayts'e.
9 Hucooyiy ıxha meed ixhesın,
hucooyiy həşdilqamee hı'ı, meed ha'asın.
Xəək avud ts'edın kar deşin.
10 Sassa yəqqees eyhen:
«İlekke, in ts'edın karıd!»
Man ögiylid ıxhayn,
yişde dyovrule ögiyl.
11 Şenke vuxhaynbı
şavuscab yik'el avxu deş.
Qiyğa qavaalesınbıb,
cole qiyğiynbışe yik'el avqas deş.
K'orana ək'elib q'əran vuççud deşin kar vodun
12 Zı, Mə'əllim, İyerusalimee İzrailyna paççahniy vor.
13 Zıcar zı g'aysırna xəək avud eyxhen işbı k'orane ək'elika xət qeetxhesva. Man yı'q'ı'n işbı Allahee insanaaşine gardanaqa gixhxhı.
14 Zak'le xəək avud ha'an gırgın işbı g'acuynbı. Man gırgın q'əran vuççud deşin kar vodun. Man mıtsıqa qihna g'adarxhuniyk akar.
15 Quç'otkuriyn qotku qa'as,
deşinıd hı'sab ha'as dexhe.
16 Zı zascad uvhuyn: «Zake xərna insan ıxha, zaqa zale ögee İyerusalimıs paççahiyvalla haa'ane paççahaaşile k'orana ək'el vob. Yizda k'orana ək'eliy ats'al geeb quvxha».
17 Zıcar zı g'aysırna k'orana ək'eliy ats'al xət qıxha, bəç'əriyvallayiy beynyavavalla nəxdın kariyva ats'a ixhes. Zak'le manıd mıtsıqa qihna g'adarxhuniyk akaran kar ıxhay ats'axhxhayn.
18 K'orana ək'el geeb vuxhaylette
aq'va havaxan hı'iyid geed qexhe.
Geed ats'al alyaat'ang'vee
cuna derdıb geeb qa'a.