8
1 Şavusse k'orane ək'elynane insanıka sa ixhes əxəyee?
Eyxhene karbışda mə'na şavuk'lene vaats'a?
K'orane ək'elin insanne aq'vays nur hele,
kışşin aq'va g'üvəna qa'a.
Paççahee eyhen he'e
2 Zı vak'le eyhen: ğu Allahıs k'ın g'assırva, paççahee eyhen he'e.
3 Paççahısse cus ıkkanan gırgın ha'as əxən. Mançil-allar zaara mang'une uleke agvle. Mane dağamne cigee ımaxva.
4 Paççahne cuvabee guc vob. Şavusse mang'uk'le «Ğu ha'an hucooneva» eyhes əxəyee?
5 Mang'vee uvhuyn hı'iyng'ulqa
ver ables deş.
K'orane ək'elynane insanık'le
qopkuna gahıb, nəxüd hı'iyid ats'an.
6 Gırgıne karaqa çina gah,
çina qopkuna yəq vob.
İnsannemee vuk'lelqa
geed verbı adayle.
7 İnsanık'le vuk'lelqa
hucoome qales ats'a deş,
şavusse mang'uk'le eyhes əxəyee,
hucooyiy ixhesva?
8 Nəxbiy mıts insanısse avqas dəəxə,
həməxüdud qik'asın yiğ əq'əna qa'as əxə deş.
Esker dəv'eençe xaaqa g'ıdekkan xhinne,
pisvalisser pisda insan g'attixhana'as əxə deş.
Yugnayiy pisda insan
9 Man gırgın zak'le g'acuyn, xəək avud g'ecene gırgıne işbışiqa yugra ilyakkına: sa insanee manesa insanaaşis xəbvalla haa'amee, mane insanaaşilqa ver abayle.
10 Qiyğa zak'le hapt'ıyn pisın insanar k'eebaxhe g'avcu. Man insanar muq'addasne cigeeqa abı-avayk'an vuxha. Mane şaharee manbışik'le yugunbıva eyhe ıxha. Manıd q'əran vuççud deşin kar vodun.
11 Pisvalla hav'uyng'us cazaa cigeecab g'its'dyaak'vanang'a, insanaaşis sık'ılbab geeb pisvalla haa'as vukkiykan.
12 Pisde insanee vəşne yəqqee pisın hı'ı, xıliyna ı'mı'r haa'a. Zak'leme ats'an, Allahıle qəvəyq'ənanbışik'le yugvalla g'avcesva.
13 Pisde insanık'le yugvalla g'avces deş. Mana Allahıle qı'dəyq'ənva, mang'una əqqı'k akarana ı'mı'rıb xıliy qaa'as deş.
14 İnəxdınıd ç'iyene aq'val q'əran vuççud deşin kar vodun: qopkune insanaaşis gexhan karbı pisde insanaaşis eyxhe, pisde insanaaşis gexhan karbıd qopkune insanaaşis eyxhe. Zı uvhuyn: «Manıd q'əran vuççud deşin kar vodun!»
15 Məxüb zı xoşbaxtıyvalla gırgınçile ooqa avqu. Xəək avud insannemee otxhun-ulyodğuyleyiy xoşbaxtiyvalile yugun kar deşin. Allahee xəək avub insanıs ı'mı'r huvu. Mane ı'mree qorxuyiy xoşbaxtıyvalla alivkasda.
16 Zıcar zı g'aysırna k'orana ək'eliy insanaaşe ha'an işbı xət qeetxhes. Xəm-yiğ yizde ulyaqa nyak' idyatk'ın, zı mane işbışiqa ilyakkı.
17 Manke zak'le Allahın gırgın işbı g'acuynbı. Zak'le ats'axhxhayn, şavulqacad xəək avud g'ecen işbı hixharas deş. Nimeecar mana qorxveeyir, mang'ulqa meed hixharas deş. K'orane ək'elynane insanee man cuk'le ats'anva uvheeyid, meed man mang'ulqa hiyxhar deş.