9
Gırgın Allahne xıle vod
1 Mane gırgınçina zı hav'u, ine fıkrelqa qarı: qopkuynbı, k'oran ək'elynanbıyiy manbışe ha'an gırgın işbı Allahne xıle vod. İnsanık'le vuc ıkkiykanasdame, g'ımeceme ixhes ats'a deş.
2 Gırgıng'une vuk'lelqa sa kar qales:
qopkuynbışde, pisınbışde,
yugunbışde,
məttınbışde, gicərxı'y deşinbışde,
q'urban ablyaa'anbışde, q'urban g'idyook'anbışde.
Yugne insanık eyxhen, bınahnang'ukud eyxhen.
K'ın g'iysarang'uk eyxhen, k'ın g'aysaras qəyq'əng'ukud eyxhen.
3 Xəək avub vooxhene gırgıng'une vuk'lelqa in pisın divan qadayle. Hək'edad, insanaaşin yik'bı pisvalika gyatsts'ı vod. Nimeena ı'mı'riy haa'a, manimeeyib manbışe bəç'əriyvalla haa'a. Qiyğaleb hapt'ı avayk'ananbı.
4 İnsanee nimeena ı'mı'r hav'ee, mang'unemee umud vobna. Üç'übna xvaa qik'uyne şirıle yugba dişde vob?
5 Üç'übınbışik'le hapt'asva ats'an,
hapt'ıynbışik'leme vuççud ats'a deş.
Manbışis helen-qelenıd ixhes deş,
manbı yik'el hipxınva.
6 Hapt'ıynbışin vukkiykın vuxhayib,
g'umooce vuxhayib,
manbışiqa naps ıxhayid deşxhayn xhinnee atk'ınin.
Xəək avud g'ecene işbışee,
manbışda xıl mısacab vuxhes deş.
7 Gıney xoşbaxtda oxhne, çaxırıd şadne yik'eka ulyoğe. Man Allahne yik'eençe vod.
8 Hasre yiğne tanalin gırgıne gahbışil cagvarada ixhecen, vuk'lelin ətriyyatıd k'ıl qimexhecen.
9 Xəək avud Allahee vas huvuyn gırgın yiğbı yikkanne xhunaşşeyka yugda alğehe. Yiğna ı'mı'r sık'ınne gahıs ıxha-ayk'anne booğak akar. I'mreke, xəək avur qorxuyke vas axvasın man vod.
10 Vasse əxən gırgın he'e. Ğu əəsde ahalee işniy, fıkırniy, ats'alyniy, k'orana ək'elyniy vuxhes deş.
11 Xəək avud zak'le sa medın karıd g'acuyn:
G'adapxhınee hammaşe yugra g'adayxhvanna deş ğamexhe.
Dəv'eeyib hammaşe igidyar deş ğameebaxhe.
Gıney hammaşe k'orane ək'elynanbışiqa geed deş eyxhe,
karıd ək'elynanbışiqa hammaşe geed eyxhen deş.
Hı'rmatıb aalimaaşis deş haa'a.
Gırgın vaxtıkeyiy xıleqa gipxhıyne imkanıke eyxhe.
12 İnsanık'le cuna gah mısa qavaales vuxhay ats'a deş.
Baluğar g'ıttidiyxhanasde toreeqa,
şit'yarıd gugeeqa gyadak'van xhinne,
insanılqab ver abıyn yiğxhe eyxhe,
sayangada vuk'lelqa qadaylen.
K'orane ək'elyneyiy bəç'əriyvaline hək'ee
13 Zak'le xəək avud medınıd k'orane ək'elika hı'iyn xədın kar g'acuyn.
14 İnsanar k'ılyba vooxhena şahariy. Sa gucnana paççah mane şaharılqa arı, mana hiqiy-allançe avqaaqqana. Mana avqas vuxhecenva mane şaharne hiqiy-alla xılece işbıd g'ecenbı.
15 Maa'ar kar deşda, k'orane ək'elikana insan eyxhe ıxha. Mang'vee cune k'orane ək'elika şahar g'attivxhan haa'a. Mançile qiyğa mana şavuscar yik'el qarayle deş.
16 Mane gahıl zı uvhuyn: «K'orana ək'el gucule yugba vob». K'orane ək'eliqane kar deşde insanıqa ooğançe avqa ilyaaka, mang'vee eyhen cuvab neng'veecad qizar ha'a deş.
17 G'idiyxhe eyhen k'orane ək'elikang'un cuvab,
bəç'əraaşine xərıng'une ts'irıle yugda g'iyxhe.
18 K'orana ək'el silahıle yugba vob,
sa bınahınmee geed yugun agval ha'a.