3
Aadameyiy Həvee hav'una bınah
1 Rəbb Allahee itxhınne çolune həyvanaaşina, gırgınçile hiyləgarna xoçeniy vob. Xoçeyn zəiyfayk'le uvhuyn:
– Hək'edane, Allahee şok'le bağeene yivaaşina nençinacab meyva umooxhan uvhu?
2 Zəiyfee xoçeyk'le eyhen:
– Bağeene yivaaşin meyvabı oxhanas əxə.
3 Saccu bağne yı'q'neene yivene meyvabışde hək'ee Allahee uvhu: «Mançike umoyxhan, mançik sumoot'a, deşxhee, hapt'asınbı!»
4 Xoçeyn zəiyfayk'le uvhuyn:
– Deeş, nəxübcab hapt'as deş.
5 Allahık'le ats'an, mane yivena meyva opxhuning'a vuşun ats'al geed qixhes, yuguniy pisın ats'axhxha Allah xhinne qepxhes.
6 Zəiyfayk'le g'ecen, mane yiven meyvabı oxhanasıd karaə vod, ulesqadıd yugda vod qöö, ats'al ıkkanəng'usud ıkkanəhdıd. Mançil-allab məng'ee mana meyva qopxu opxhanna. Qiyğab k'ane ulyorzulyne adamiys meyva hoole, mang'veeyib ooxhanna.
7 Mane gahıl q'öng'ussana ats'al qadayle, ts'eleb vuxhay ats'axhen. Məxüd ıxha manbışe incilyne t'eleyke cos tanalanqanbı ha'u.
8 Manbışık'le yiğıne serınne gahıl bağee iykaran Rəbb Allahın nıq' g'iyxhe. Manbı heepxı bağeene yivaaşine yı'q'nee dyuguleebaxhe.
9 Rəbb Allahee Aadamılqa onu'u, qiyghanan:
– Ğu nyaane?
10 Mang'vee eyhen:
– Bağeead yiğın nıq' g'ayxhı, ts'eler ıxhal-alla qərq'ı'n dyugulxhana.
11 Rəbb Allahee eyhen:
– Şavaane ts'eler ıxhay vas ats'axha'u? Vas oxhanas q'adağa hav'uyne yivena meyvane opxhun deşxhee?
12 Aadamee eyhen:
– Zaka sacigee yixhecenva, Ğu hiyvuyne xhunaşşe mane yivene meyvayke zas huvu, zınab opxhunna.
13 Rəbb Allahee zəiyfayk'le eyhen:
– Ğu hı'iyn hucoon?
Zəiyfee eyhen:
– Xoçeyn zı yəqqı'le qiğeyhı, zınab opxhunna.
14 Rəbb Allahee xoçeyk'le uvhuyn:
– Ğu in ha'uyl-alla,
gırgıne çavra-vəq'əyne, çolane həyvanaaşine yı'q'nee lə'nat g'azanmişa'a:
ı'mı'rvolle vuxhnel habğı nyaq'v ooxhanas.
15 Zı yiğniyiy zəiyfayne əreeqa,
vuşde kulyfatbışde əreeqa duşmaniyvalla abçes.
Şeng'une kulyfatın yiğne vuk'les ı'xhəs,
ğunab mang'une mı'q'les üvxhəs.
16 Qiyğa Rəbb Allahee zəiyfayk'le eyhen:
– Vas vuxhnenang'a geeb xəppa əziyyat hevles,
uşaxar k'ovaka vuxas.
Adamee valqa k'ırı gyaqqı vas ıkkiykanas,
Meeb mang'veecab xəbvalla vas haa'as.
17 Qiyğa Rəbb Allahee Aadamık'leme uvhuyn:
– Ğu xhunaşşel k'ırı alixhxhı
umooxhan uvhuna meyva opxhun.
Həşdeb val-alla nyaq'v lə'natləmiş vuxha.
I'mı'rvolle zəhmətıka ğu vasın g'ık nyuq'vnel ha'as.
18 Mançin vas zazaayiy ğı'ç'iy aleylya'as,
ğunad, ğu ezuyne ç'iyel hucooyiy alyaadı man oxhanas.
19 Ligayne şinıka hı'ıyn g'ık oxhanas
nyuq'vneqa sak'alasmee,
Mançike alyart'uva.
Ğu nyaq'v vorna,
nyuq'vnelqar sak'alasda.
20 Aadamee xhunaşşeyn do Həva (ı'mı'r) giyxhe. Mana ç'iyeylne aq'val vuxhaynbışda gırgıng'una yed yeexhe.
21 Manke Rəbb Allahee Aadamılqayiy xhunaşşelqa g'ekvayke tanalinbı hı'ı, alya'anbı.
22 Qiyğa Rəbb Allahee uvhuyn: «Haane, insanık'le yuguniy pisın hucoo ıxhay ats'axha, yişda sa xhinne qexhe. Hasre ı'mrene yivena meyva qopxu umooxhancen, hammaşiysır ımaxvaacen!»
23 Vuc alyart'uyne nyuq'vnel işlemişxhecenva, Rəbb Allahee insan Edenne bağeençe g'e'eşşena.
24 Mang'vee Eden bağne şargılqa g'oramişa'an malaaikariy harıne suralqa iliyk'aran ts'ayıkan g'ılınc giyxhe ı'mrene yivelqa əəna yəq avqecenva.