4
Gabiliy Habil
1 Aadam xhunaşşe Həvayka g'alirxhu, mana vuxhne ayxu Gabil uxu. Həvee eyhen: «Rəbbike zı insan pay xhinne alyart'u».
2 Qiyğa məng'ee Gabilna çoc Habil uxooxa. Habil vəq'əbı uxhiyxhanna eyxhe, Gabilir ç'iye ezana.
3 Sabara vaxt ılğevç'uyle qiyğa Gabilee Rəbbis ç'iyeyl alyadıynçike nugbar adayle.
4 Habileyid ts'etta syurunee ıxhayne nekke yugne vəq'əbışike adayle. Rəbbee Habilir, Habile adıynbıd q'abıl ha'anbı.
5 Gabilir, Gabilee adıynbıd Rəbbee q'abıl ha'a deş. Mançil-alla Gabil it'umra qəllamişxha aq'va gyavaxana'a.
6 Rəbbee Gabilik'le uvhuyn:
– Nya'a qəllamişxha? Nya'a aq'va gyavaxanı'ı?
7 Nya'a yugna iş haa'axhee, Zı q'abıl hidyaa'aye? Yugna iş hidyaa'axhee, bınahın akkayne ögee gugu hav'u ğu gozet ha'a. Mançin xuruş valqa vod, ğu mançis xəbvalla haa'as vukkan.
8 Qiyğa Gabilee Habilik'le eyhen:
– Qora çoleeqa vüqqəs.
Maa'ad Gabilee çoculqa xıl g'ot'ul, mana gek'ana.
9 Qiyğa Rəbbee Gabilike qidghın hı'iyn:
– Çoc Habil nyaane?
Mang'vee eyhen:
– Ats'a deş, nya'a zı çocuna g'aravulyne vor?
10 Rəbbee eyhen:
– Ğu hı'iyn hucoon?! Çocune eban ç'iyençe Zalqa ona'a.
11 Mane nyuq'vnen yiğne xıleke k'yapk'ınna çocuna eb hööğəs ghal aaqı. Mançil-allab ğu ine nyuq'vnel bed-düə alyabat'a.
12 G'iyniyke şaqa ğu nimee yugda ç'iye ezeeyid, mançin vas ıkkanəxüdın kar heles deş. Ğu ciga deşda g'e'eşşuna xhinne ixhes.
13 Gabilee Rəbbik'le eyhen:
– Yizda cazaa ts'ıts'a'asınçıleb hexxaba vob.
14 Haane, Ğu zı g'iyna ç'iyeyne aq'valer g'e'eşşena. Valer dyügulyxha, zı ciga deşda ixhes. Şavneyiy ögiylqa qığeç'u, mang'veyir zı gik'asda.
15 Rəbbee mang'uk'le eyhen:
– De'eş. Şavaye Gabil g'ik'u, mang'uke yighılle g'atna qəl qiğaahas.
Rəbbee Gabililqa işara giyxhe, mana qızaxıng've gimeek'acenva.
16 Gabil Rəbbike ark'ın Eden bağne şargıl – Nod eyhene cigayl axva giyğal.