14
Paulo na Balanaba mbaki̱li̱ya mulema
1 Obu Paulo na Balanaba baaki̱dhi̱ye mu tau̱ni̱ ya I̱koni̱yo, baaghenda mu elami̱li̱yo lya Bayu̱daaya. Beegheeseli̱ya kimui kighambo kya Luhanga ngoku baakolagha mu tau̱ni̱ ya Anti̱yoki̱ya. Nahabweki Bayu̱daaya bakani̱ye na batali Bayu̱daaya baahi̱ki̱li̱ja.
2 Bhaatu bamui mu Bayu̱daaya abaabhengi̱ye ku̱hi̱ki̱li̱ja, baahaaghi̱li̱li̱ya bamui mu bantu batali Bayu̱daaya kwoha bahi̱ki̱li̱ja.
3 Bakwenda aba, baamalayo bwile bukani̱ye, mbanatebeja batoobahi̱ye haa Mukama. Ti̱ Mukama aabaha bu̱toki̱ kukola byakuswekani̱ya bikani̱ye, kwoleka ngoku butumuwa obu bwa ngughuma siye buli bwamajima.
4 Bantu bʼomu tau̱ni̱ ya I̱koni̱yo eghi, beebaghani̱jamu bi̱bbu̱la bibili. Kimui kyasemba bakwenda Paulo na Balanaba, na kinji kyasemba Bayu̱daaya aba.
5 Niibuwo Bayu̱daaya abaabhengi̱ye aba hamui na bantu banji batali Bayu̱daaya, na beebembeli̱ baabo bʼomu tau̱ni̱ eghi, baacuuyemu kuhuula bakwenda aba mabaale kandi kubaata.
6-7 Bhaatu obu Paulo na Balanaba baaghu̱u̱ye makulu agha, du̱mbi̱ baaluka mu tau̱ni̱ eghi, baaghenda, baatebeja Makulu Ghasemeeye mu tau̱ni̱ ya Lesitula na ya Delubbe mu di̱si̱tu̱li̱ki̱ti̱ ya Li̱koni̱yo, na mu byalo binji ebyeli̱ghi̱li̱i̱ye maatau̱ni̱ agha.
Paulo na Balanaba mbaki̱li̱ya mulema e Lesitula
8 Kilo kimui obu Paulo aatebejagha bantu mu tau̱ni̱ ya Lesitula, musaasa alamaaye maghulu akaba asitami̱yʼo. Musaasa oghu akabyaluwa alamaaye kandi taagubhagha kuumuka hambali asitami̱ye kulubhatanga bbaa.
9 Aakala ategheleei̱ye bhyani ngoku Paulo akwete kutebeja bantu ebikwetʼo Mukama Yesu. Niibuwo Paulo aakaaye amuloleleeye tonono, aamanya ngoku musaasa oghu ali na ku̱hi̱ki̱li̱ja okukugubha ku̱mu̱ki̱li̱ya.
10 Paulo aamughila nʼelaka lyamaani̱ ati, “Oomuke!” Du̱mbi̱ musaasa oghu aamatuka aamilila, aatandika kulubhatanga kusemeeye.
11 Obu kiigambi̱ kya bantu aba baaboone ngoku Paulo aaki̱li̱i̱ye musaasa oghu, baatandika kugolela kimui mu mu̱bu̱ghe ghwabo Lu̱lekoni̱ya bati, “Basaasa aba ni bihongano byatu ebi tukulami̱yagha. Niibiyo byefooye bantu, byalu̱gha eghulu byatwisamu!”
12 Baaghila bati Balanaba akulaghiluwa kuba ali Jeu̱. Haabwa Paulo kuukala naabu̱gha bwile bwona, baamughilamu Helu̱me.
13 Niibuwo mu̱hongi̱ wʼomu elami̱li̱yo lya kihongano kyabo Jeu̱, elyabaagha haa mulyango ghwa tau̱ni̱ eghi, aasi̱ye na bantu be, baaleeta nte asi̱lu̱wi̱ki̱ye bimole mu bikiya nga bukwanji, bantu aba boona baasileeta kusihonga.
14 Obu muntu aaghambiiye bakwenda aba Balanaba na Paulo ngoku bantu bakwete kweli̱li̱kana bati ni bihongano byabo ebi bakulami̱yagha, kandi ngoku bakubbala kubahongela bisembo kandi kubalami̱ya, Balanaba na Paulo baatemula kooti̱ syabo kwoleka ngoku basaaluuwe. Du̱mbi̱ baali̱gi̱ta bwangu-bwangu mu ki̱bbu̱la kya bantu eki. Paulo aabu̱gha nabo nʼelaka lyamaani̱ ati,
15 “Basaasa enu̱we, mukwete kukola ebi nangaaki? Tuli bantu ngʼanu! Twasi̱ye hani kubatebeja Makulu Ghasemeeye, niikuwo muleke kulami̱ya bihongano byanu ebitali na mughaso, bhaatu mukuukʼo Luhanga mwomi̱i̱li̱ oghu akahanga nsi nʼeghulu, nanja na ebilimu byona.
16 Hambele Luhanga akasi̱i̱mi̱lani̱ya enu̱we batali Bayu̱daaya kulami̱ya bihongano byanu ebi mubbali̱ye, nanga mukaba mutamumani̱ye.
17 Bhaatu nankabha mutamumani̱ye, ooleki̱ye bantu boona ngoku aaniiye akutuhaagha bilungi byona. Nanga niiye aku̱tooni̱yagha mbu̱la kandi aleka ndimo yaanu yeelela mu bwile bwayʼo bwonini, mutungila kimui byokuliya kandi mudheedhuwa.”
18 Nankabha bantu aba mbaghu̱u̱ye ebi Paulo na Balanaba baabu̱ghi̱ye, baakala mbaneeli̱li̱kana bati babhonganuuwe kusala nte esi basihongele Balanaba na Paulo nga bisembo kandi babalami̱ye. Bhaatu haakumaliilila bantu aba baasileka.
19 Niibuwo bamui mu beebembeli̱ baa Bayu̱daaya baalu̱ghi̱ye mu tau̱ni̱ ya Anti̱yoki̱ya na ya I̱koni̱yo baasa mu tau̱ni̱ ya Lesitula, baaghila bantu baayʼo bakani̱ye bati ebi Paulo akwete ku̱beegheesi̱ya mbisubha. Baaleeteleja bantu aba kwoha Paulo na bahi̱ki̱li̱ja baa Yesu banji. Kandi bantu aba baasi̱i̱mi̱lani̱ya Bayu̱daaya aba kuhuula Paulo mabaale ku̱hi̱ki̱ya obu eegengi̱ye aalekeelelʼo. Du̱mbi̱ baamukulumula, baamu̱twesi̱ya mu tau̱ni̱ eghi baamu̱ti̱ghayo, mbeeli̱li̱kana bati aaku̱u̱ye.
20 Bhaatu obu beeghesebuwa baa Yesu bʼomu tau̱ni̱ ya Lesitula eghi baasi̱ye hambali Bayu̱daaya baati̱ghi̱ye balangaai̱ye Paulo mbamweli̱ghi̱i̱li̱li̱ya, aaju̱ju̱ka. Obu aateekaane, aamuka aatodha aaghenda nabo mu tau̱ni̱ ya Lesitula eghi. Kilo ekyalabhi̱yʼo Paulo na Balanaba baalu̱gha mu tau̱ni̱ eghi baaghenda mu tau̱ni̱ ya Delubbe.
21 Paulo na Balanaba baatebeja bantu bʼomu tau̱ni̱ ya Delubbe eghi Makulu Ghasemeeye. Kandi bantu baayo bakani̱ye baahi̱ki̱li̱ja Mukama Yesu. Haanu̱ma yʼeki, baatodha baakuuka mu tau̱ni̱ ya Lesitula, baalu̱ghamu baaghenda mu ya I̱koni̱yo, na mu ya Anti̱yoki̱ya eghi eli haai-haai na di̱si̱tu̱li̱ki̱ti̱ ya Pi̱si̱di̱ya.
22 Ti̱ mu bu̱li̱ tau̱ni̱ eghi baakaghendaghamu, baasanga-sangaanagha na beeghesebuwa batodha babagu̱mi̱ya kuukala banagumiiye mu ku̱hi̱ki̱li̱ja kwabo. Baaghilagha beeghesebuwa aba bati bali na kusaalila mu kubona-bona kukani̱ye kuba mu bu̱lemi̱ bwa Luhanga.
23 Ti̱ mu bu̱li̱ tau̱ni̱ eghi baaghendaghamu, baakumaani̱yagha ki̱bbu̱la kya bahi̱ki̱li̱ja baa Yesu batwala bwile mbasaba Luhanga kandi banasi̱i̱bi̱ye. Ebo hamui na bahi̱ki̱li̱ja baakomagha bamui mu bahi̱ki̱li̱ja kuba beebembeli̱ kukola mulimo ghwa kuhanuulila bahi̱ki̱li̱ja baanakyabo aba kandi kubagu̱mi̱ya. Du̱mbi̱ Paulo na Balanaba basabila beebembeli̱ aba bati Mukama Yesu oghu baahi̱ki̱li̱i̱je abagu̱mi̱ye kandi abalinde.
24 Niibuwo Paulo na Balanaba baasaaliiye mu di̱si̱tu̱li̱ki̱ti̱ ya Pi̱si̱di̱ya, baaki̱dha mu tau̱ni̱ ya Peluga mu di̱si̱tu̱li̱ki̱ti̱ ya Panfu̱li̱ya.
25 Baatebeja kighambo kya Luhanga mu tau̱ni̱ ya Peluga eghi. Haanu̱ma yʼeki baahona mu tau̱ni̱ ya Atali̱ya haa mwalo.
26 Malu̱gha haala baani̱i̱na bwati̱ baabhasuka mu tau̱ni̱ ya Anti̱yoki̱ya, hambali bahi̱ki̱li̱ja baadu̱bhi̱ye kubasabila bati Luhanga abaghilila ngughuma haabwa mulimo oghu baaghendi̱ye kukola kandi baaghumala.
27 Obu baaki̱dhi̱ye mu tau̱ni̱ ya Anti̱yoki̱ya, baabilikila ki̱bbu̱la kya bahi̱ki̱li̱ja baagumbaana hamui, baabaghambila byona ebi Luhanga aabagu̱bhi̱i̱si̱i̱ye kukola kandi ngoku aakooneeye batali Bayu̱daaya ku̱hi̱ki̱li̱ja.
28 Paulo na Balanaba baamala bwile bukani̱ye mu tau̱ni̱ ya Anti̱yoki̱ya eghi banali na beeghesebuwa aba.