6
1 Tɛi giya-o, GALA-o, gi botii ɠɛɛzu ʋɔɔma, gá wo maanɛɛnɛzu ga zaalai wo sɔlɔɔgai GALA zea, naa mina ɠɛ ga faa ɲaka.
2 GALA ge bogɛ daawooi zu, é ɠɛ ma:
«Gè è wooɠaaʋoteni yeeɠɛɠala ʋagɔi.
Kizo foloi, gè ɓɔni è ʋa.»
Tama wɛlɛ, gaamazu, niizu ɠa é ga yeeɠɛɠala ʋagɔi, wɛlɛ, za ɠa é ga kizo foloi.
3 Gi la pɔ ga zeliloma ɠɛ gá-wotii ʋa, naa ɠa é ba, gi la kɔɠɔziɠa zaɓu laazu nu luɠɔ faa nɔpɛ su.
4 Kɛlɛ gá ɓɔɠɔ lɛɛzu fai pɛ su ga gá ga GALA ná-botiɠɛ nuiti. Gá vaazu fai pɛ bu ga ziilɔɔi: kpɔlɔiti, kidaaʋiligiti, koozuʋili faiti,
5 doɠaiti, kasoɠa vaiti, bɛbɛiti ta-wuzeɠe daalɔɠɔmaiti, boti ɓaagiti, ɲiigaazuɠaiti, ta puluiti.
6 Gá ɓɔɠɔ lɛɛzu ga gá ga GALA ná-botiɠɛ nuiti ɲadedai zu, faaɠwɛgi zu, ziilɔɔi zu, nuɓɔɠɔlai zu, Zɛnvu Ɲadegai zaɓui zu, ta nɛɛbɛi zu, nii wooveleda la su,
7 gaama ɓɔɛi zu, GALA ná-zɛbɛi zu ga telebodai ma ɠɔɔɠɔ zɔɔlaiti, gá ɠɔɔ la, ɓaa gi ɓɔɠɔ maalobo da.
8 Ta ɗa gi lɛbi, ti ɗa gi ʋɛlɛlala, ti ɗa gi-laasei ɲɔi wo, ti ɗa gi-laasei pagɔi wo. Ta ɗa gi leve ga zɛɛ wo nuiti, tama gaamai ɠa gi bosu.
9 Ta gi ʋɛtɛsu eɠɛ nu la gi ɠwɛɛ, tama ɛsɛ pɛ ge gi ɠwɛɛ, eɠɛ gá ɠɛ zaazu niina, tama gi vulua, eɠɛ ta gi loɠa, kɛlɛ gi la zaani.
10 Ta ɗa gi yiiɓɔlɔ vai ɠɛ, kɛlɛ gi ɠoozunɛɛʋɛ yeenɔpɛ. Gi ɠɛai eɠɛ bala nua, kɛlɛ gá ma mɔinmɔin kɛɛzu ga kpɛtɛ nuiti. Gi ɠɛai eɠɛ ani nɔpɛ ge la gi ya, kɛlɛ anii pɛ ka é gi ya.
11 Gi laazeɠea fai pɛ ma wo ʋɛ, gi-wɔɔla Kolɛnte nuiti, gi yiimaʋɛ pɛ daalaogɛ wo ʋɛ.
12 Gi la ɠɛlɛni gá-nɛɛbɛi veezu wo ya, kɛlɛ wa ɠa wo wo-yiimaʋɛti daaɠulugai.
13 Nà ɓɔɛzu wo ʋɔ, eɠɛʋelei nu ɠa ɓɔɛ la deaiti pɔ: À va bu, wo naa ɠɛɠalai ɠɛ gi ʋɛ, wa ɓalaagi, à wo-yii pɛ daalao gi ʋɛ!
À dama ga kidaaleʋelala nuiti ta-vai
14 À mina ɓɔ su wa kidaaleʋelala nuiti, wo-ziɛ ʋelei ʋa ɠɛ ga ani ɠila. Mazɔlɔɔ telebodai ta tɔ koloɠolo fai ta zoo nɛi ti ɓɔ su ɓaa? Wozakalagiti ta kpidii ta zoo nɛi ti ɓɔ su ɓaa?
15 Kilistani ta zoo nɛi ti zoloo faa ɠila ma ta Inɛgi ɓaa? Ɓaa lee ɓɔfaama ɠa é kidaaleʋe nuiti zɔɠɔzu ta kidaaleʋelala nui?
16 Soloo faamai ɓɛgele ɠa é GALA sei ʋɛlɛi yɔɠɔzu ta kɔɔɠɔ ganigiti? Mazɔlɔɔ ada ga zɛnvu su ƓALAGI zei ʋɛlɛiti, eɠɛʋelei GALA ɓɔɠɔi bogai la, é ɠɛ ma:
«Nà zeizu ti zaama, gè ziɛ ti zaama,
nà ɠɛ ga ta-ƓALAGI, ti ɠɛ ga nà-nuɓusɛiti.»
17 Naa ɠa é ba, Maliɠii bogɛ, é ɠɛ ma:
«À zeɠe ti ʋa, wo bali ma.
À mina vɔɔɠu kɔzɔba ani nɔpɛ ba,
nɔ̀un nà, nà yeezei wo wu.»
18 Zɛbɛi-Pɛ-Maliɠii ɠɛ ma:
«Nà ɠɛ wo ʋɛ ga ɠɛɛɠɛi,
wa ɠɛ bɛ̀ ga doun zunua, ta doun anzanua.»