7
1 Nɛ̀ɛɲɔɠɔiti, niima minazeɠegiti pɛ ta ná ade ma vaa ma. Naa ɠa é ba, ade ɓɔɠɔ ɲade kpusɛi ɠɔzɔ vaiti pɛ ma, ta zɛnvui ɠɔzɔ vaiti. Ade ɠaaɓa, de ɲade ga pagɔ mɛtu, de da-eteai ziɛ unfemai zu, de feezu GALA bɛ.
Pɔle ta Kolɛnte nuiti zɔɠɔzuɓɛtɛ vai
2 À seizu ve gi ʋɛ wo-yiimaʋɛti! Gi la telebotala vaa ɠɛɛni ga nu nɔpɛ, gi la nu nɔpɛ koloɠolo faa ɠɛɛni, gi la nu ná-kulanuma ɠulani zea.
3 Gè la nii wosu wo ʋeelala vaa ma, mazɔlɔɔ eɠɛʋelei gè bogai la, wa-vai ɠa gi-yiimaʋɛti, ade ɠiliʋɛ ʋa, ade zɛnvui wo ʋɔɔma, ade za ʋɔɔma.
4 Dàaʋɛ wo la ga gola, gè ɗa ɓɔɠɔ wɔɔlɔ gola wa-vaa zu. Gá-ɠidaaʋiligiti pɛ su, nà iɲɔdɔɔi zu, zìimaʋɛ laavegɛ ga koozunɛɛi, daa ge leʋe.
5 Mazɔlɔɔ kaipa gi zeelini Masedoane, gi la lago pa dooɠoni, kɛni kidaaʋiligi ma zii pɛ nɔ: sakpegi gi-maaɠoolii zu, dualuagi ɠɛ gi zaama.
6 Kɛlɛ GALAGI nii a ɗa kpala nuiti iɲɔdɔ, naa ɠa é gi iɲɔdɔɔni ga Tite ʋaa vai gi ʋɔ bɛ.
7 Tite ʋaa vai nɔ lɛi é ʋa gi iɲɔdɔ, kɛlɛ nii é boni gi ma mɔnɔ, ga ʋelei wo tɔ ɓɔɠɔi iɲɔdɔɔni la. É naa woni gi ma, ʋelei wɔin wo ma la gola ga wo nɔ̀un ka, ta wa-yiiɓɔlɔ wolai, ta ʋelei wo zɛbɛzeɠeai la nà-faa zu. Naa pɛ ge ta ɓɔni nà-koozunɛɛi ʋa ga gola.
8 Anɛɛ ɓalaa ni sɛʋɛi gè teʋeni wo ma, é wo yiiɓɔlɔni, gè la nimizazu ga naa. Gè nimizani la, siɛgi zu gè kaani la ga sɛʋɛi naa wo yiiɓɔlɔni yeeɠɛɠala go laawu.
9 Kɛlɛ niizu, nà ɠoozunɛɛzu, é la ga tɛi wo ziiɓɔlɔi zɔlɔɔni, kɛlɛ tɔɔzei wa-yiiɓɔlɔi ɓɔgɛ wo ʋa, wo wo-ziɛ ʋelei maavalibo. Mazɔlɔɔ wa-yiiɓɔlɔi zolooni GALA gaazu, naa ma gi la kakama vaa nɔpɛ kɛɛni ga woye.
10 Mazɔlɔɔ GALA ziimai ma yiiɓɔlɔi ɠa ɠaa ɗa ɓela ga nu ziɛ ʋelei maavalibo, é kizogi ve nui ya, nii nu la nimizaa su eyɛsu ɠɔ. Kɛlɛ eteai ná-ziiɓɔlɔ vai, naa ɠaaɓelazuʋɛ ɠa é ga saai.
11 Ziiɓɔlɔi naa é ga GALA ziimai, naa ʋaaʋɛ wo ʋɔ ga: unsuvilɛi wo goozuɠulagiti bo, ta ziiɠaawanaiti, dualuagi wo zo, wɔin wola wo zo ga wo kà ʋolu, naa ʋolu wo gaaɓaai zɔlɔɔ, wɔin ɠɛ wo ma gola ga wo faa ɲɔi laazale. Wo dɛɛni ʋele-o-ʋele ga wo-zɔ ge la fai tɛi su.
12 Wa kaana deɠɛmu, gè niima zɛʋɛi ɠɛɛni, gè teʋe wo ma, é la ɠɛni ga zɔi é faa ɲɔi ɠɛai naa maaʋele, ɓaa zɔi ti kɛɛni la naa maaʋele, kɛlɛ nii a kɛ ʋelei wo ɠiliai la gi ʋa, naa ɠula kɛlɛma GALA gaazu wo zaama.
13 Naa ɠa é ba, gi iɲɔ ge lɔɔni.
Kɛlɛ gá-iɲɔdɔɔi ʋoluma, gi wola ɠoozunɛɛni mɔnɔ ga Tite ná-koozunɛɛi, tɔɔzei wo ziilaani wo pɛ.
14 Ni gè ɓɔɠɔ maamusɛni tago tɔun gaazu wa-vaa zu, gè la mɔ unfeni, kɛlɛ eɠɛʋelei gi ɠɛni ɓɔɛzu la wo ʋɔ yeenɔpɛ ga gaamai, naa ma ka gi ɓɔɠɔ maamusɛni la wa-vaa zu Tite ɠaazu, naa ɠɛa ɓalaa ga gaamai.
15 Ná-koozunɛɛi wola wɔɔlɔʋɛ wo ʋɛ, a ɠigaiziɛna wo pɛ wa-woozogi zu fai pɛ su, mazɔlɔɔ wo yeezeini bu, duai zu ta kpalii.
16 Nà ɠoozunɛɛzu ga gè laa wo la fai pɛ su.