Tɛnɛbo Nui
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Tɛnɛbo Nui Ná-Sɛʋɛi ɠa ga sɛʋɛi nii é nu ɠalasu ga ɠimalai eteai ziɛ vai zu. Daaseigi é ba Eɓulu wooi zu naa ɠa ga «Zɔi é nuiti gaalɛɛzu ba». Faaɠwɛ nui bɔɔlɔzu laaʋɛ da ga Salomɔn ɠa é sɛʋɛa, tanigaa ma ti la vaani naa wu. Ni gaama ʋe ga Salomɔn ɠa é sɛʋɛi nii ɠɛai, naazu sɛʋɛʋɛ tanisu kona untaaʋuugɔ puulɔfelaiti zɔɠɔzuʋɛ ta untaaʋuugɔ puusaʋagɔ maazu ɠilagi (970-931), aisa Yesu Kilista ʋa zɔlɔɔ. Nui tanigaa ti ɠɛ nu ɠili ka é sɛʋɛai, tɔɔzei toɠa yɛsu ɓɔɛzu ná ta, eɠɛ botiɠɛ nui wooi, è la ka ga masa be (5:7-8). Faaɠwɛ nui naati ti ɠɛ Tɛnɛbo Nui Ná-Sɛʋɛi ɠɛɛʋɛ Salomɔn ná-yeeɠɛɠalai ʋoluma poun, tanisu kona unnaanigɔiti zɔɠɔzuʋɛ ta unfelegɔi (400-200), aisa Yesu Kilista ʋa zɔlɔɔ.
Tɛnɛbo Nui Ná-Sɛʋɛi tɔɔzeiʋɛ ga é ɠɛ fai pɛ ka ga wafuun faa nɔ (1:2). Naa ɠa bosu ade-yɛnvui ta ada-wotii ta nɔ ga yeeɠɛɠala go nɔ laawu vaa, ta gaaɠaazu ɓaaʋɛ. Zeemamai ɠa wosu ga gilazuʋɛ bɔɔlɔzu yeeɠɛɠala ɓuɠa ko laawu. Ada-zobo ge la ɓalaa bɔɔlɔzu ma. Fizɔgɛ ga nu yeezei eteai wu, eɠɛʋelei nu kaazu la, ta è undaanɛ zɔlɔɔ è zɔlɔɔ ganiiti su (9:9). Eteai ma ɓɔlɔiti ta ma ɠoozunɛɛiti maaʋele ma, sɛʋɛi nii unseizuʋɛ ɠa ga nu lua GALA ba, ta è ná-deveiti so (12:13). Naa ɠa é ga faa ɓiigi.
Unsosuʋɛ
1. Sɛʋɛi ɠɛɛ nui ta fai tanigaa niiti é ti ɠwɛɛgai etea ziɛgi zu (1:1-11).
2. Eteai ziɛ vaa ma ungi (1:12—6:12).
3. Kalamɔn lɛnɛ gooiti (7:1—12:8).
4. Etea ziɛgi ma un kpiigi ɠa ga nu lua GALA ba ta è ná-deveiti so (12:9-14).
1
Faiti kpein ka ga wafuun faa
1 Tɛnɛbo Nui laawooiti kaa, Davide ná-doun zunui, é ɠɛni ga masagi Zeluzalɛme.
2 Tɛnɛbo Nui ɠɛ: «Wafuun faa ʋɛɛ wafuun faa ʋa,
ti kpein ka ga wafuun faa nɔ.»
3 Botii kpein nuɓusɛi kɛɛzu zooi ɠa,
ná-kulanumai ɠa su ga leeni?
4 Yeeɠɛɠalai ta ɠa leʋesu ta su nuiti,
yeeɠɛɠalai taɠili ge ʋa ta su nuiti,
tama zooi ɠa ɠɛʋelei nɔ ma.
5 Foloi ɠa ɠulazu, foloi li,
é ɠaazuvilɛ ga é ɠaaɠale ma, ʋɛ seɠeai ná.
6 Fiilɛi ɠa ɗa li yeeta ga lɛkpɛmaʋɛ nu yeezazu ʋelei,
yeeta lɛkpɛmaʋɛ nu ɠɔʋɛzu ʋelei,
ʋele ɠana fiilɛi a ɗa latilati da,
é ʋilɛ ná-pele wɔlɔmaiti ma ʋolu.
7 Ziɛ wolaiti pɛ ta ʋuuzu kpoloɗɛi ma,
tama kaipa kpoloɗɛi la vega.
Ziɛ wolaiti ti la losu,
ta liizu ti-liizu ɠilagi nɔ.
8 Fai tanɔpɛ ge la losu,
nu la zooga fai pɛ bosu,
nu ɠaazuʋɛ yii la laa pɛ ga wozaɠaai,
nu woiyeɠei yii la laa pɛ ga faa mɛnigi.
9 Nii é ɠɛni ná mɔungi, naa nɔ ɠa é ʋaazu ɠɛɛzu ná.
Nii é ɠɛɛni mɔungi, naa nɔ ɠa é ʋaazu ɠɛɛzu.
Faa niinɛ nɔpɛ ge la zooi ɠa.
10 Ni da ɠɛna ma: «Wɛlɛ, faa niinɛ ɠa-ee,»
tama naama vai ɠɛni ná kaite wɔlɔwɔlɔ.
11 Kɛlɛ nu ɠi ka é la mɔ wɔlɔwɔlɔ vaiti su,
zɔiti ɓalaa ti ʋaazu ga ʋelela ʋelei,
ti ʋoluʋele geleiti, ki ge la yɛga ti zu.
Ɠimalai ɠa ga wafuun faa
12 Nɔ̀un nà, Tɛnɛbo Nui, gè masadai ɠɛɛʋɛ Izilayɛle unda Zeluzalɛme.
13 Gè faiti buuʋɛtɛgɛ ga ɠimalai, niiti ti ɠɛɛzu zooi ɠa ná pɛ. Naa ɠa ga maanɔɠɔ woti, nii GALA ge nuɓusɛiti pilɛgai ma.
14 Gè faiti kpein kaaʋɛ, niiti ti ɠɛɛzu zooi ɠa. Gè pɛtɛgɛ ga, ti pɛ ta ga wafuun faa nɔ, eɠɛ nu ɠa ɠɛ ɓizɛzu fiilɛi ʋolu ga é so.
15 Anii suɓiligai, nu la zooga naa zɔlesu,
anii nii é la ná, nu la zooga naa ɠaalusu.
16 Gè ɠɛni ɓɔɠɔ ma: «Gè ɠimalai zɔlɔɔga, é wɔɔlɔ gola, é leʋe naati kpein ba, ti masadai ɠɛai tùɠɔ Zeluzalɛme. Gè ta ɓɔga nà-keleɠelegi ʋa, ta nà-faaɠwɛgi.»
17 Gè ɠaaɓaaʋɛ ga gè ɠimalai ɠwɛɛ ta ɠimalalai. Gè pɛtɛgɛ, naa ɓalaa ka ga eɠɛ nu ɠa ɠɛ ɓizɛzu fiilɛi ʋolu ga é so.
18 Mazɔlɔɔ pelei ta ɓɔsu la nu ɗa-ɠimalai ʋa,
ʋele nɔ ɠana ta ɓɔsu la ɗa-iɲɔteʋei ʋa.
Zɔi é ta ɓɔsu ná-faaɠwɛgi ʋa,
toɠa ta ɓɔsu ná-ziizoolɛi ʋa.