6
Doun zɔlɔɔ nuiti ta ti-lointi
1 Dointi, à ɠolo wo zɔlɔɔ nuiti bɛ, Maliɠii maaʋele ma, mazɔlɔɔ naa ɠa soloogai.
2 «È-ɠɛɛ lɛbi ta è-lee,» deve mɔungi ɠana, minazeɠegi polu,
3 «naa ɠa a kɛ è undaanɛ, è-zii zuɠooza gola eteai zu.»
4 Wa ma, doun kɛɛɠɛiti, à mina wo-lointi sopele ɲɔu, wo ʋa ti yiiɠaawana, kɛlɛ à ti ɠula su, wo ti maaɠolo, wo ti lɛnɛ, é zoloo Maliɠii ná-faiti ma.
Duɔiti ta duɔ kɛɛɠɛiti
5 Duɔiti, à ɠolo wa-luɔ kɛɛɠɛiti bɛ eteai zu, wo lua ti ʋa unfemai zu ta zii zɔledai, eɠɛʋelei wo kɛɛzu la Kilista ʋɛ.
6 Naa mina ɠɛ ga ti ɠaazu vaa nɔ, wo ʋa nu ɛnɛkɛ nɔ, kɛlɛ à kɛ eɠɛ wa ɠɛ ga Kilista ná-duɔiti, wo GALA ziimai laazeeli ga wo-yɛnvui pɛ.
7 À botii ɠɛ ti ʋɛ ga ɠi pagɔi, eɠɛ nɔ wa ɠɛ kɛɛzu Maliɠii ʋɛ, nuiti taade.
8 À ɠizɛ su ga, è ɠɛni ga duɔ, ɓaa wɔɔlɔ, ɛsɛ ka ná-kulanumai zɔlɔɔ Maliɠii ya, eɠɛʋelei é faa ʋagɔi ɠɛa la.
9 Wa ma, wɔiti wo ga duɔ kɛɛɠɛiti, à wo-ziɛ ʋelei ɓɛtɛ, é lo ti ʋa. À mina ti zulua. À dama naazu, wo ɠizɛ su ga wa tiye, wo-Maliɠii ɠa é geeɠɔlɔgi zu, é la ɗa ga zeelɔzɔɠɔzu ɠɛ.
GALA nui ná-kɔɔɠɔ zɔɔlaiti
10 Gaaɓelagi ɠa ga: À wa-zobogi ɠaiziɛ wa-ɠilibalai zu wa Maliɠii, tɔun ná-zobo golai zu.
11 À ɓɔɠɔ maaɠili ga GALA ná-kɔɔɠɔ zɔɔlaiti pɛ, naa ɠa a kɛ wo lo kpaan, Inɛgi ná-yaava vaiti pɛ daalɔɠɔma.
12 Mazɔlɔɔ nuɓusɛiti tɛi, de ʋa ɠɛ ti zakpesu, kɛlɛ zɛnvu ɲɔiti ka de ti zakpesu, niiti ti geezuʋɛ: niiti ti devei wosu, ta niiti zobogi ti ya, naa ʋɛɛ niiti ba, ti zeini niima etea ɲɔi unda.
13 Naa ɠa é ba, à GALA ná-kɔɔɠɔ zɔɔlaiti pɛ seɠe, naa ɠa a kɛ wo zoo wo kɔɔi ɠɔ folo ɲɔi zu, wo yɛ loni kpaan, wo ɓega ʋoluma ga ti pɛ maazuɓudɛ.
14 À lo kpaan: wo gaamai ɠɛ ga wa-zaamaɠiligi, wo telebodai ɠɛ ga wo-ɠakai makɛ ɠɔɔɠɔ zɔɔlai.
15 À wo-ɠɔɠɔa zaʋalagi ɠɛ ga zɛbɛi nii wa ziilɛigi ma Woo Niinɛ Ʋagɔi laazeeli la.
16 Yeeɠɛɠalai pɛ su, à kidaaleʋei zeɠe ga kɔɔɠɔ zɛpɛgi, nii wa zoo wo Inɛgi ná-abu ba mɛɛinti paa su la.
17 À kizogi ma ɠɔɔɠɔ wɔɔlɔgi lɔ unba, wo Zɛnvu Ɲadegai ná-boɠa zɔkpɔi zeɠe, nii é ga GALA daawooi.
18 À GALA falii ɠɛ yeenɔpɛ GALA Zɛnvui ná-kpɔbai zu, ga GALA falii ta maanɛɛnɛi ma zii pɛ. Naa ɠa é ba, à ɠaaɓa ga ziilɔɔ laazeeliai pɛ, wo GALA falii ɠɛ GALA ná-nuiti pɛ bɛ.
19 À GALA fali nà ɓalaa bɛ̀, wooi ve zèa, nà ɠɛna ɓɔɛa, gè Woo Niinɛ Ʋagɔi ma lɔɔɠuzu vai lɛ ladalai zu ga pagɔ,
20 nii gè ga ma ɠeelai, gìliai ga yɔlɔɠɔiti. À GALA fali bɛ̀, ga gè ɗa ɓɔɛ ga ladalai, eɠɛʋelei maanɛai gè kɛ la.
Tuʋɔgiti
21 Gi-ɠɛɛloin, gi-nɛɛɲɔɠɔi Tisike, wooɠɛɠila nui Maliɠii ná-botii zu, tɔ ɠa a nà-faiti pɛ bo wo ma, naa ɠa a kɛ wo ɠɛ kwɛɛ nii gè su.
22 Nà teʋesu wo ma, naama vai nɔ ma, naa ɠa a kɛ wo gá-vaiti kwɛɛ, é wo iɲɔdɔ ga pagɔ.
23 Ɠɛɛɠɛ GALA ta Maliɠii Yesu Kilista ti ziilɛigi ve ade-ɠɛɛlointi pɛ bɛ, ta nɛɛbɛi, é ɓɔ kidaaleʋei ʋa.
24 GALA ná-zaalai yɛ naati pɛ ba, niiti ti ade-Maliɠii Yesu Kilista nɛai ʋɛ, ga nɛɛbɛi nii maa la valiboga eyɛsu pɛ.