3
Zɔɠɔzuɓɛtɛi ma zalai
1 Ɠɔoɠɔ GALAGI ɠɛni mà: «Li ʋolu mɔnɔ, è wɛɛnzo anzanui naa nɛɛ ʋɛ, tama wɛɛn zea. Mazɔlɔɔ ʋele ɠana Ɠɔoɠɔ GALAGI Izilayɛle nuiti nɛai la ʋɛ, anɛɛ ni naati ta ɠaaʋotesu gala kiligiti ma, ta ti wɔinɗai ga leezɛn vɔɔi ma ɓuungiti.»
2 Gè ànzai unmɔɔni ga wali ɠae puugɔ maazu lɔɔlugɔ (15), ta moloi nii daa ga wɔɔlezegi, naa ma ɠilo unnaanigɔ puulɔɔlugɔ (450).
3 Gè ɠɛni ma: «Ɗa yɛsu pɔ̀ bɛ yeeɠɛɠala mɔinmɔin daawu, è mina koloɠolo kɛ, ta è mina wɛɛn zo. Nà ɓalaa, ʋele nɔ ɠana nà kɛɛ la è ʋɛ.»
4 Tɔɔzei Izilayɛle nuiti ta yeeɠɛɠala mɔinmɔin kɛɛzu, masa ge la ti unda, kundiɠi la ti ʋɛ, ti la zalaɠa ɠula, sale ɠɔtu la ti ʋɛ, ɓaa zalaɠa ɠula zeɠe, ɓaa pɛlɛ wu zale.
5 Naa ʋoluma, Izilayɛle nuiti ta ta-ƓALAGI, Ɠɔoɠɔ GALAGI ɠaiziɛ, ta ta-masagi Davide. Ʋelela ʋelei ta ɠaaʋote Ɠɔoɠɔ GALAGI ta ná-faaɓɔɠɔiti ma.