4
Tukpɔlogi é Ɠɔoɠɔ GALAGI
ta Izilayɛle yɔɠɔzu
1 À woilo Ɠɔoɠɔ GALAGI laawooi ma, Izilayɛle nuiti,
mazɔlɔɔ Ɠɔoɠɔ GALAGI ɠa lukpɔzu ga zooi zu nuɓusɛiti pɛ daalɔɠɔ:
«Gaamai ta wooɠɛɠiladai ti ɲɛɛlɛa zooi zu,
GALA kwɛɛtalai ɠa é zooi zu.
2 Nii é zooi zu, naa ɠa ga:
foovooi, ta yaavai, ta nu ʋaai, naa ʋɛɛ unmai ta wɛɛnziɛgi ʋa,
ta tooma vaiti, ta ɲama ʋuu vai ta ɗa ʋɛɛ ta ʋa.
3 Naa ɠa é ba, zooi zu ɠa vɔ kpaankpaan,
nuɓusɛiti kpein ta vɔ ɠae ma,
naa ʋɛɛ dɔɓɔ zuaiti, ta wɔniiti ba.
Kpoloɗɛi wu ɠaleiti ɓalaa ta ɲɛɛlɛ.»
Zalaɠa ɠula nuiti ta-ɠotoi
4 «Kɛlɛ, nu nɔpɛ ge mina maaɠaali ɠɛ,
nu mina zeliloma ɠɛ,
mazɔlɔɔ wɔi wo ga zalaɠa ɠula nuiti,
ada wa ɠa ade lukpɔzu.
5 Wo-ɠɔɠɔi ɠa ziɠa folo gaalɔgai kpekpe,
wa GALA goo wo nui niiti wo ʋolu,
naati kɔɠɔi ɠa ziɠa kpidii zu,
nà wo-lee Izilayɛle undaaʋili.
6 Nà-nuɓusɛiti ti undaa ɠa ʋilisu tɔɔzei faaɠwɛtalai ʋa.
Tɛi wɔi wo ga zalaɠa ɠula nuiti, wo ɠɛlɛa faaɠwɛgi ʋa,
nà ɓalaa gè ɠɛlɛa wo ʋa,
wo la mɔ ɠɛa ga nà-zalaɠa ɠula nua pɛ.
Wo yeemaa wa-ƓALAGI ná-tɔgi ma,
nà ɓalaagi nà yeemazu wo-lointi ma.
7 Wo kpein kulaba la ba,
wo kotoi ɠɛɛʋɛ dàalɔɠɔma.
Nà wa-lɛbiyai valibosu ga ɓaaɠulamai.
8 Ta ɓɔɠɔ ɠɔnɔkulazu ga nà-nuɓusɛiti ta-vaaɠaaza golaiti,
ti yiima vai ɠa ga nà-nuɓusɛiti ti ɠɛ ga sɔba nuiti.
9 Kɛlɛ nii nɔ a zeeli nuɓusɛiti ma,
naa nɔ ɠa a zeeli zalaɠa ɠula nuiti ma.
Nà ti loɠazu tɔɔzei ti-ziɛ ʋelei ʋa,
ta ti-ziɛ ʋele ɲɔi zuɓoloɠɔmɔ.
10 Ta daami wo, ti la yiɠoa,
ti koloɠologi ma zii pɛ kɛɛ ʋa, ti la ɓuɠua,
mazɔlɔɔ ti la mɔ unfesu Ɠɔoɠɔ GALAGI ma.
11 Ti ɓɔɠɔ vea koloɠologi ta dɔɔi ya.
Tama dɔɔ niinɛi ti ʋalaga ɠigi ma.
12 Nà-nuɓusɛiti ta ta-ɠɔɔɠɔ ganigi ɠaazaɠasu, é ga gului,
tama gulu ɓeke kpuɠai ɠa é ti wooɠaaʋotesu,
mazɔlɔɔ koloɠolo fiilɛi ɠa é ti ɠakasu.
Ti koloɠologi ɠɛa ga ti ɠɛlɛ vai ta-ƓALAGI ʋa.
13 Ta zalaɠaiti kulazu gize unmaʋɛti,
ti ɗa ansansegiti gala gize goiti unmaʋɛti,
ta losu sɛne gului bu, ta pɛpele gului, naa ʋɛɛ telebɛnete gului ʋa,
niiti ti ma niinigiti bu ɠaanɛai.
Naa ɠa é ba, wo-loun anzanuiti ta ʋaazu koloɠologi ɠɛɛzu,
wo-loun anzaiti ti wɛɛnziɛgi wo.
14 Gè la ʋaazu wo-loun anzanuiti doɠazu ta-ɠoloɠologi ma vaa zu,
gè la wo-loun anzaiti ɓalaa doɠaa ta-wɛɛnzo faiti su.
Mazɔlɔɔ zalaɠa ɠula nuiti ɓɔɠɔgoi ta lɔɔɠuzu ta wɛɛnziɛ anzanuiti,
ti ɗa zalaɠa laamiiti bo ta koloɠolo anzanuiti ti wa-ɠala pɛlɛiti bu.
Nuɓusɛi niiti nɔpɛ kidafaawu la ti ya, naati ti looʋɛ ya.
15 «Ee, Izilayɛle, ni ɗɔun ɗa koloɠologi ɠɛɛzu,
Zuda mu ge mina ta ɠɛ pa!
À mina li Gilegale,
à mina lɛ Ɓɛte-Avɛn ɠizei ma,
À mina ɠona, wo ʋa ɗa ɠɛ ma: ‹Gè ɠonaa Ɠɔoɠɔ GALAGI ma, nii é vulua.›
16 Izilayɛle ɠaazulɛɛʋɛ, eɠɛ nikɛ zaai nii gaazulɛai.
Wa kaazu ga Ɠɔoɠɔ GALAGI ɠa yɛ losu ti luɠɔ
ga baala ziʋo ɓulugiti kɛʋele,
é ɗa li ga tiye tufa lɛnugiti su nɛmɛ wolai zu ɓaa?
17 Kɔɔɠɔ ganigiti ta Efelayime nuiti ka ti yeezogai.
À zɛna nɔ!
18 Kpega nɔ ɠa ga ná-dɔɔi ɓɔle,
tɔ ɠanu gaama é ɓɔɠɔ ʋalaʋalasu koloɠologi zu,
ná-kundiɠiiti ziima vai ɠa ga ɓaaɠulama vai.
19 Fiilɛ wolai ta ɠa ʋaazu nɔ, é ti zeɠe ɠɔɠɔzu,
ti ɗa unfe ga ta-zalaɠaiti.»