20
Poogi é lo Asiili yooi ná-pilɛ sɔlɔɔ fai ʋa
Ezipete yooi ma
1 É ɠɛni ga ma ɠonagi, Asiili zalaʋusu ɠundiɠi wolai liini, é laalɛ Asadɔde taa wu, é Filisiti yooi zu, é vɔnini ma. Asiili masagi Saligon ɠa é ma levei veeni.
2 Naama ziɛgi zu ɠa Ɠɔoɠɔ GALAGI ɓɔɛni la Amɔse ná-doun zunui Ezayi ʋɔ. É ɠɛni ma: «Li, è saa wɔlɔ wo seɠei ɠula zaama, è saʋalagiti kula ɠɔɠɔa.» Naa ɠa Ezayi kɛɛni, é ɗa ziɛziɛ, seɠe la ma, saʋala ge la kɔɠɔa.
3 Ɠɔoɠɔ GALAGI ɠɛ ma: «Kona saʋagɔ laawu nà-botiɠɛ nui Ezayi ziɛʋɛ ga maaɲakai, saʋala ge la kɔɠɔa, nii a kɛ naa ɠɛ ga poogi ta tookisui Ezipete yooi ʋɛ ta Etiyopi yooi.
4 Zenɔ ɠana Asiili masagi a lii la ga Ezipete nuiti ti zogai ga duɔiti ta Etiyopi nuiti, nu niinɛiti ta nu wɔlɔzaɠaiti, ti maaɲakai, saʋala ge la ti ɠɔɠɔa, ti ʋoluʋɛti ɲakai, toɠa ɠɛ ga unfe faa Ezipete yooi ʋɛ.
5 Toɠa ɠɛ ga laavɔɔ vaa ta unfegi naati bɛ, niiti ti laani Etiyopi la, ta niiti ti ʋoluzeini Ezipete ʋa.»
6 Naama volo ná, tɛiti kpein ti zeini ziɛlaʋɛ, ta ɗa ɠɛ ma: «Wɛlɛ nii ɠa seeliai gi ma, gá-ɠitogi zu! Gi ɠɛni ɠɛɛzu munu ɠa gá lɔɔɠu ná, gi kpɔba ɠaiziɛ, gi unmɔɔgi zɔlɔɔ, gi ɠula Asiili masagi ya! Gá ɠizo niina ɠale?»