21
Ɓaɓilɔne wolo vai wo fai ma yeeluɠɔ
1 Keela wooi é wosu é lo teʋebai ʋa kpoloɗɛi laaʋɛ.
Eɠɛʋelei tɔngɔlɔ fiilɛi a ɗa leʋe da teʋebai zu lɛkpɛmaʋɛ nu yeezazuʋɛ,
tooma nui ɠa ʋaazu, é zeɠe teʋebai zu
zooi naa zu, ɛsɛ pɛ ge luazu ba.
2 Kulakɛlɛma maayikiyikigi ɠa dɛai ga ze:
«Yaava nui ɠa ɗa yaavai ɠɛ,
ada ɠoloɠolo nui ɗa faa zuɠoloɠologi ɠɛ.
Elame nuiti, à laalɛ bu.
Mɛde nuiti, à taai zei kɛlɛ su.
Nà kpalagi kpein kpesu.»
3 Naa ɠa é ba, sàamaʋɛ zulaavegɛ ga taɓai.
Taɓai sòni, eɠɛ anzanui a ɠɛna doin zɔlɔɔga.
Nii gè mɛnisu, toɠa kpɔ̀lɔzu,
nii gè kaazu, naa ɠa màaluazu.
4 Zìi ɠa ɓɔlɔzu, nà ɓalizu ga duai.
Kpɔkɔi gè ɠɛni maaɓɔunsu,
naa ɠɛa nɔ̀un bɛ ga maalua anii.
5 Ti daamianigi ɠɛʋele ɓɛtɛa,
seɠei ʋɛɛ taɓalii ɠa,
daamii wo, kpɔɔlei wo.
Gaamago nɔ, maalua ɓeei loa:
«Kɔɔɠuluɓaiti, à wuzeɠe!
À gulɔi ziɛ wa-ɠɔɔɠɔ zɛpɛgiti ma!»
6 Mazɔlɔɔ ʋele ɠa Maliɠii ɓɔɛni la pɔ̀:
«Li, è pelezu ʋɛtɛ nui zei, é naa laazeeli, nii a ka!
7 Ni a kɔɔɠɔ wotoloi ɠaana, soo felegɔi ɗa mɛɛn,
ɓaa kɔɔɠɔ nuiti ti soovalegiti kɔma,
ɓaa tanigaa ti ɲɔmɛiti kɔma,
é naa wuuɓɛ ga pagɔ, é dama kpɛ!»
8 Pelezu ʋɛtɛ nui wooɠulani, é ɠɛ ma:
«Màliɠii, nà loni nà-ada makɛsuʋɛ folo-o-folo,
nà kpidiiti kpein kɛɛzu ɠaazu ʋa nà-ada makɛsuʋɛ.
9 Wɛlɛ nui ta ɠa ʋaazu, toɠa kɔɔɠɔ wotoloi zu,
soo felegɔiti ka ti mɛɛnsu.
É ɓɔɛni, é ɠɛ ma:
‹Ɓaɓilɔne loa bu,
Ɓaɓilɔne loa bu,
ta ná-kɔɔɠɔ ganigiti ti ga ná-galagiti,
ti pɛ ka, ti zuɠaleɠaleai zooi ma!› »
10 Ee, nà-nuɓusɛiti, ti loɠani eɠɛ moloi molo loɠazuʋɛ,
nii gè mɛnini Ɠɔoɠɔ GALAGI la,
Fai-Pɛ-Maliɠii, Izilayɛle ná-GALAGI,
gè daazeelini wo ma.
Fai é ʋaazu zeelizu Duma ma ta Seyiil
11 Keela wooi é wosu é lo Duma ʋa.
Ta wooɠulazu mà Seyiil:
«Ɲiigaazuɠa nui, lee ɠa è bosu kpidii ná-faa zu?
Ɲiigaazuɠa nui, lee ɠa è bosu kpidii ná-faa zu?»
12 Ɲiigaazuɠa nui sulooni, é ɠɛ ma:
«Sobui ɠa zeelizu, kpidii ɓalaagi.
Ni wo wɔinni wo gaazaɠa bo, à gaazaɠagi wo,
wo lati, wo ʋa ʋolu.»
Dedan ta Kedaal nuiti ti ʋelazu
13 Keela wooi é wosu é lo Alaɓe ʋa.
Wa kpidii ɠɛɛzu Alaɓe yooi ma lɔɓɔiti su,
Dedan zoo ɓulu kɛɛ nuiti.
14 Tema yooi zu nuiti, à li, wo naati daaɠomi,
niiti ti zaazu ga kpɔɔle wɔin,
à ziɛi ve ti ya.
À pela nuiti daaɠomi,
wo li ti ʋɔ ga daamianigi.
15 Mazɔlɔɔ ta ɓizɛzu boɠa zɔkpɔi ʋa,
ta boɠa ɠɛzɛi nu la loga tuɠɔ,
ta mɛɛin ɠaalɛai ti laalɔɠɔma,
ta kɔɔi ná-kpɔi é ti ɓɔlɔzu.
16 Mazɔlɔɔ wɛlɛ nii ɠa Maliɠii boni mà: «Kona gila nɔ, eɠɛʋelei nu a ɗa botiɠɛ nui ná-konagi ɠaalu da, Kedaal ná-lɛbiyai pɛ gaa ɠa ʋala ba.
17 Kedaal ná-nu ʋɛbɛiti su, mɛɛn ʋili nuiti ta salaʋusu ɠɛzɛiti saama, nii goi a yɛ ná, é la ɠɛa ga faa nɔpɛ.» Mazɔlɔɔ Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI ɠa é boni.