33
Maanɔɠɔi ɠa faa zuɠoloɠolo nui luɠɔ
1 Maanɔɠɔi ɠa è ʋɛ, ɗɛi è zɔiti koloɠolosu,
tama è la dɛ ɠoloɠoloni,
è zɔiti yaavazu, ti la dɛ è yaavani!
Siɛgi zu è ɓesu la ga zɔiti koloɠolo,
ɗa ɠoloɠolo niina, ɗa ɓalaagi.
Siɛgi zu è ɓesu la mɛtu ga yaavai ɠili zɔiti ma,
ta è maayaava niina ɓalaa.
2 Ee, Ɠɔoɠɔ GALAGI, gi maawɔinɠa!
Gi ɠitogɛ è ʋa.
Zɛbɛi ve gi ʋɛ, sobu-o-sobu,
gi unmɔɔ kidaaʋili foloi.
3 Siɛgi zu tonai kpunɛsu la,
nuɓusɛiti ta ɗa ʋela.
Siɛgi zu è wuzeɠezu la,
ziiti su ɠa vaza.
4 Ti ʋu ta-ɠɔɔzoganiiti ma, eɠɛ koto kpulugiti.
Ti ɓungulu ti ma, eɠɛ kpazinɛ kpulugaa.
5 Ɠɔoɠɔ GALAGI ɠa fai pɛ unda,
mazɔlɔɔ toɠa zeini geezuʋɛ.
É Siyɔn laavega ga sɔledai ta telebodai.
6 Ɗa ɗa-eteai ziɛ gaanɛɛi zu.
Ɠimalai ta faaɠwɛgi ta ga kizo fai ɓɛtɛi.
È unfe Ɠɔoɠɔ GALAGI ma,
naa ɠa é ga ɗa-naavoloi.
7 Kɔɔɠuluɓaiti ta kpeei loozu taazuʋɛ,
ziilɛi fai ma ɠeelaiti ta wɔlɔzu gola.
8 Peleiti suɲakaʋɛ,
nu nɔpɛ ge la mɔ ziɛzu peleiti su.
Unfama la wosu ga fai niiti solomai ɠɛai ti ma,
zeeleiti daa ɗa ʋili, ta ɛsɛ pɛ bɛlɛʋilisu.
9 Zooi ɠaalɛiɗa eɠɛ saa ɠa loo, su ɗa vɔ,
unfegi yeiɗa ga Liɓan, toɠa na vɔ,
Salon nɛmɛ wolai zu ɠɛa eɠɛ teʋebai.
Ɓasan ta Kaalamɛle ta-ʋagi ɠulaa ti ʋa.
Siɛgi zu Ɠɔoɠɔ GALAGI wuzeɠezu la
10 «Niizu, nà ga wuzeɠe,»
Ɠɔoɠɔ GALAGI ɠɛ ma,
«niizu nà ga ɠaalɔ,
niizu nà ga bɔ̀ɔlɔ ʋelei lɛ.
11 Wa-vaazeikpasuiti ta ga kpakuɓakugi nɔ,
ta zɔlɔɔsu ga kaʋazaɠagi nɔ,
wo-laa viilɛi ɠa ga abui, nii a wo ɠala.
12 Nuɓusɛiti ta ɠala, ti ɠɛ ga zuʋui,
eɠɛ ɠaingiti ti leʋeai ga ti ɠalazu abui zu.
13 Wɔiti wo maaɠoozaai, à mɛni nii gè kɛɛni!
Wɔiti wo maaɓuɠaai, à nà-zobogi zuɠɔɠɔ!»
14 Kotoba nuiti ti lua Siyɔn,
GALA gaazuluabalala nuiti suɓalia, ti ɠɛ ma:
«Ade zu, ɓɛ ɠa a zoo yɛsu niima abuzogi ɠoba?
Ade zu, ɓɛ ɠa a zoo zeizu ɠɔoɠɔ abulekai tɛi koba?»
15 Zɔi é ziɛzu telebodai zu,
é ɗa ɓɔɛ ga sɔledai,
é ɗa ɠɛlɛ tɔnɔgi ʋa é zɔlɔɔsu ga toomai,
é yeevoɓesu ga é mina vɔɔɠu lobɛani ʋa,
é la woilosu ɲama ʋuu vaa ma,
é ɠaazu ʋɛɛzu ma, a ʋa faa ɲɔi ɠa.
16 Naama nui ɠa a zei ada wuzeɠeaiti,
fasaiti ta ɠɛ ga siɠigiti, ti ɗa makɛ,
ná-daamiani fai ɠaa ɠa ɠula ba,
ziɛi la ʋalaga zea.
Zeluzalɛme unmɔɔ fai
17 È-ɠaazuʋɛti ta masagi ʋɛtɛ ná-padai zu,
ta zooi ɠoozuʋɛ pɛ pɛtɛ.
18 Ɗa ɠisiɛ naazu è maalua vai zu teʋegai,
è gaazaɠagi wo ga:
«Mini ɠa mulu zo nuiti ti ná,
ti ɠɛni sosu, ti ɗa gaalu?
Ɓɛɛni ka ti ɠɛni wɛlɛzu pɛlɛ ɠaaɠoozagiti ma?»
19 È la mɔ waso nuɓusɛi tɛiti kaa pɛ,
nuɓusɛiti ti-laawooi ɠaa la ɠaa,
ti-wooi zuɓidiai, gaa la ɠaa.
20 Kɛlɛ ɗa Siyɔn ʋɛtɛ,
ada-vɛti ɠula laa wolai,
ɗa Zeluzalɛme ʋɛtɛ ga ɠaazuʋɛti,
ziilɛi sei wosuʋɛ,
seɠe ʋɛlɛi é yɛsu loni ada ɠilagi,
kɔɠɔiti tɔɔ la ɠula bu eyɛsu pɛ,
gili ɠaluiti ta la viega pɛpɛ.
21 Miná ɠa Ɠɔoɠɔ GALAGI ná-bɔɔlɔlai lɛɛzu ná ga giye.
Ziɛ wolaiti ta ɠɛ náʋɛ,
ziɛ wolaiti ti ɠaawɔɔlɔai,
kɔɔɠɔ ɓatoa ti la leʋega ná,
ɓato wolaiti ti la ziaa ná ʋelei.
22 Mazɔlɔɔ Ɠɔoɠɔ GALAGI ɠa ga ada-lukpɔɠaaleʋe nui,
Ɠɔoɠɔ GALAGI ɠa ga da-lɔ sei nui,
Ɠɔoɠɔ GALAGI ɠa ga da-masagi,
tɔ ɠa é ga de Ɠizo Nui.
23 Wa-ɠaluiti ti viega,
ti la mɔ ɓato zeɠei ɠilia,
ti ʋa zoo ti ʋa ma zeɠei zuvie.
Naa ma, ta kɔɔzoganii pɛ gaaɠwɛ ɓɔɠɔ ʋa,
dɛkpu nuiti ɓalaa ta tɔnɔ zɔlɔɔ su.
24 Zeluzalɛme nu nɔpɛ ge la ɠɛ ma: «Nà zeeɓɛzu!»
Nuɓusɛiti ti zeini Zeluzalɛme ta ta-vaaɠaaza golai ma zuvaayɛgi zɔlɔɔ.