34
Edɔme lukpɔ vai,
ta Izilayɛle ɠalema vai
1 Zii ɠiligiti, à maaɓuɠa lɛɛ, wo woilo!
Nuɓusɛiti, à mɛnigi wo!
Zooi woilo, ta su aniiti,
eteai ɓalaa, ta gaa aniiti pɛ!
2 Mazɔlɔɔ Ɠɔoɠɔ GALAGI ná-ziiɠaawanai ɠana ʋa zii ɠiligiti daalɔɠɔma.
Ziiɠulaʋɛ ta-ɠɔɔɠɔ nuiti pɛ daalɔɠɔma.
É devea ga ti undaaʋili, ti ti ʋaa.
3 Ta-wɔvɛiti ta ʋili ya,
ti ma ʋoomaiti makugi ɗa ziɛ,
ti-ma ɲamai ɗa yei ga gizeiti.
4 Nii kpein é volozu geeɠɔlɔgi ɠa, ti pɛ ta ɲɛɛlɛ,
geeɠɔlɔgi ɠa ɓili, eɠɛ nu a sɛʋɛ ɓili,
ma ɠɔɔʋɛbɛi ɠa loo bu,
eɠɛ leezɛn ansaɠɔgi ma laai a ɠɛna loa bu,
ɓaa kooleɠoole gului ma laai a ɠɛna loa bu.
5 Ɠɔoɠɔ GALAGI ná-boɠa zɔkpɔi ɠula kɛlɛma geeɠɔlɔgi zu,
wɛlɛ toɠa na yei Edɔme ma,
nuɓusɛiti Ɠɔoɠɔ GALAGI ti voovoai ga ti zuwuɠaaleʋe.
6 Ɠɔoɠɔ GALAGI ná-boɠa zɔkpɔi yiɠoa ga ɲamai,
ma wulɔi ɠɛ ma ná pɛ,
baala ziʋoiti ma ɲamai, ta boli zinɛiti ma ɲamai,
ta baala sinɛiti ma lɔɠɔiti ma wulɔi.
Ɓosela taa wolai zu ɠa Ɠɔoɠɔ GALAGI zalaɠai ɠulazu ná,
nu ʋaa vaa wolai ɠa é ɠɛɛzu Edɔme yooi zu.
7 Teɠuiti ta loo ʋɔɔma ta nikɛ zinɛiti ta nikɛ zinɛ wolaiti,
zooi maaʋɛ pɛ ka yɛɓɛ ga ɲamai,
zooi ma vufiligi yɛɓɛ ga ma wulɔi.
8 Mazɔlɔɔ toɠa ɠɛ ga potokula voloi Ɠɔoɠɔ GALAGI ʋɛ,
sala ve ɠonagi Siyɔn maalobo fai zu.
9 Edɔme yooi ma ɗɛ wolaiti ta valibo,
ti ɠɛ ga managi,
ma vufiligi ɠɛ ga timinigi,
ná-zooi ɠaaʋɛ pɛ ka ɠɛ ga managi é galai wosu.
10 É ɗa ɠala folo ʋɛɛ kpidi ʋa, é la zaa,
ma luului ɠa yɛ lɛɛzu geezuʋɛ, kwɛ ge la ba.
Yeenɔpɛ nɔ, zooi ɠoloɠologai ɠa yɛ de,
eyɛsu ɠɔ nu nɔpɛ ge la mɔ leʋega ná.
11 Ná ɠa ɠɛ ga buungiti ta zɛligoiti seizuʋɛ.
Ɗuaiti ta kalawɔniiti ta zeizu zɔlɔɔ ná.
Ɠɔoɠɔ GALAGI ɠa zooi ɠoloɠolo.
Ná ɠa ɠɛ eɠɛ ada ɲaka wolai
nii é ɠɛni ná aisa eteai ʋa ɓɛtɛ.
12 Seizumaanɛ ge la ɠɛa ná
ziimazeɠe ge ʋa wo da é ʋa ɠɛ ga masagi ti zaama.
Gaa ɠa ʋala ná-kundiɠiiti pɛ ba.
13 Ɠaingiti ta ʋɔnɔ ná-masa pɛlɛiti bu,
koozeiti ta kpolo ɠaingiti ti ʋɔnɔga ná-siɠigiti ba.
Ná ɠa ɠɛ ga koʋeiti seizuʋɛ,
ta saa wɔnigiti ɲiizuʋɛ.
14 Teʋebai zu zuaiti ta ɗa ɠomi ná ga zuluɓuiti,
boliiti ti ɗa ɓɔɠɔ loli ná.
Miná ɠa buungi a ɠɛ looɠosu ná ga kpidii,
mazɔlɔɔ toɠa naa ɠaazu ga dooɠosu ʋagɔ.
15 Náʋɛ nɔ ɠa kaalii a laɠagi lo ná,
é ɠainti da su, é ʋɛɛ ti ma,
é yɛ wɛlɛzu ti ma, ti saɠa.
Ná nɔ ɠa ɗuaiti ma ɓulugiti ti ɠaalɛɛzu ba ná.
16 À wɛlɛ lɛɛ Ɠɔoɠɔ GALAGI ná-sɛʋɛi zu, wo kala!
Suai naati tanɔpɛ ge la ɠula da,
taɠila kpalaa ge la mɔ bɔɔla ɠaiziaa wafuun,
mazɔlɔɔ Ɠɔoɠɔ GALAGI ɓɔɠɔi ɠa é ma levei veeni,
ná-Zɛnvui ɠa é ti ɠaalɛɛni ba.
17 Ta ɓɔɠɔi ɠa é kɛɛni ga kpakutoomai,
é ɛsɛ pɔɔda ve zea,
é zooi ɠaaɠwɛɛni ti ʋa ga galui.
Zooi naa ɠɛa ga tɔnɔ eyɛsu ɠɔ,
ta yɛ zeini ná, eyɛsu ɠɔ.