GALA Daawoo Zɛʋɛi Ezayi 47

Ɓaɓilɔne ɠoloɠolo fai

1 «Yei, zei fufiligi zu, Ɓaɓilɔne nuɓusɛi,

zei zooi ma, mazɔlɔɔ è zeɠea masa kpɔkpɔgi ɠa,

Ɓaɓilɔne nuiti ta-nuɓusɛi,

mazɔlɔɔ è la mɔ loliga ga ‹pagai› ta ‹zaalamai›.

2 Ɓulu vukɔ ɠɔtu felegɔiti seɠe,

è ɓulu vukɔi ɓɛtɛ,

bɔɔlɔgi ɠula ɠaazu,

ɗa-lookɔbai laaʋɛ lɛ ba,

seɠei lɛ ba, é zeɠe è-ɠɔɠɔiti ma,

è ɓudɛ ziɛ wolai maazu.

3 Naazu è ɠabei ɠa ɠaazu folo wolai ɠa,

è-unfesuʋɛ ɠa ɠula kɛlɛma.

Nà nà-potokulai wosu,

nu nɔpɛ ge pele leʋega tùɠɔ.»

4 Ade Unmɔɔ Nui laasei ka ga Ɠɔoɠɔ GALAGI, Fai-Pɛ-Maliɠii,

Izilayɛle ná-GALA Ɲadegai.

5 «Zei gaalɛii zu, lɔ kpidii zu,

Ɓaɓilɔne nuiti ta-nuɓusɛi,

mazɔlɔɔ è la mɔ loliga ga anzanu masagi masadaiti unda.

6 Zìiɠaawanani nà-nuɓusɛiti ma,

gè zèaɠɔligiti kɔzɔni,

gè ti lɔɔni è yeezu,

è la ɠɛni ti maawɔinɠaani.

È ɗa-unbawului ɠizini kɛwola wɔlɔi ma.

7 È ɠɛni ɠɛɛzu ma:

‹Nà yɛsu anzanu masadai zu eyɛsu ɠɔ.›

È la ɠidaani ti pɛ bu.

È la ɠisiɛni su, ʋelei naa ɓesu da.

8 Deɠɛmu woilo nii ma, ɗa ʋe, ziimaɠɛɛ nui,

è zeini kitogi zu,

è ɗa ɠɛ ɓɔɠɔ ma è-yiimaʋɛ:

‹Nà ɠa gè ɓɔɠɔ ɠaazu!

Gè la ɠɛa ga poanza eyɛsu pɛ,

gè la ʋalaga dòinti ma pɛ!›

9 Niima nimiza vaa felegɔiti

ta zeeli è ma ʋɔɔma folo ɠila nɔ,

è ʋala è-lointi ma, è ɠɛ ga poanzai.

Naati ta vɔɔɠu è ʋa ga ɲɔuɗa,

anɛɛ ɗa-zoɠolai pɛ su ta ɗa-ʋotedai ma zobogi pɛ, è kɛɛzu.

10 È ɠigi loni ɗa-zuɲɔulai ʋa,

è ɗa ɠɛ ma: ‹Nu nɔpɛ ge la kàazu!›

Kɛlɛ ɗa-ɠimalai ta ɗa-ɠeleɠelegiti ka ɗɔungi zeɠea ma.

È ɠɛni bosu è-yiimaʋɛ ga:

‹Nà ɠa gè ɓɔɠɔ ɠaazu!›

11 Maanɔɠɔi ɠa zei è ma,

nii è la zooga è ʋa seɠe ɓɔɠɔ ʋa,

nimizai ɠa lɔ è ɠɔba,

nii è la zooga è ʋa ɠula su,

faaɓalakalagi zeeli è ma ga kulafilibai,

è-ɠi ge la ba.

12 «Ɠaaɓa deɠɛmu ɗa-zoɠo vaiti ma,

ta ɗa-ʋote faiti è ti ɠɛɛzu.

È ɓɔlɔni naati kala fai zu è-ma loungo yeei zɔli,

kitogi zu ga ɗa ʋaazu tɔnɔ sɔlɔɔsu su,

è ɠɛ ga nui gola ɠaazumaayikiai.

13 È ɓɔɠɔ ɓɔlɔni ga ungaiziɛ nuiti gaazaɠa fai,

ti ʋaana, ti è ɠizo,

tɛi ti geeɠɔlɔgi zeizeizu su,

ti wɛlɛ somideɠaiti ba ta alugi,

alu to daa ɠilagila ti ɗa faiti bo,

ti ʋaazu ɠɛɛzu ga ɗe.

14 «Wɛlɛ miná, ti pɛ ti ɠɛa

eɠɛ daazaɠagi abui galazu.

Ti la zooga pɛ ti ʋa ti-yɛnvui ɠizo abuzogi ma,

é la ga daaɠoli wo abu go nɔ,

tutu zu abui nɔ nu a zei koba!

15 Wɛlɛna ti ɠɛʋelei ʋa, niiti è ɠɛni ɓɔlɔzu ti ʋɛ,

è ʋoluzeini ti ʋa, è-ma loungo yeei zɔli.

Ti ɠɛa ga teʋeteʋe nuiti,

tanɔpɛ ge la zooga é ʋa è ɠizo!»