48
Faa niinɛiti ma wooi wo fai
1 À woilo nii ma, Zakɔɓe ná-nuiti,
wɔiti Izilayɛle laaseigi ʋɛai wo ʋa,
wɔiti wo ɠulaai Zuda mavofodai zu.
Wa konai wosu Ɠɔoɠɔ GALAGI laaseigi zu,
wa Izilayɛle ná-GALAGI valizu,
kɛlɛ wo la kɛɛzu gaamai zu ta telebodai!
2 Wo ɓɔɠɔ laasei pɛa ga taa ɲadegai zu nuiti.
Wɔi wo ʋoluzeiɗai Izilayɛle ná-GALAGI ʋa,
nii daa ga Ɠɔoɠɔ GALAGI, Fai-Pɛ-Maliɠii.
3 «Faiti ti leʋegai kaite suɠooza,
gè naati boni wo ma.
Gè ti laazeelini wo ma,
gè wo loo ɠisu é lo ti ʋa.
Gaamanɔ gè botii ɠɛɛni,
ti pɛ ti ɠɛɛni.
4 Gè kwɛni ga wa-vai ɓaaʋɛ,
è-ɠɔgi ɠɛɛʋɛ eɠɛ kɔlu lukpɔi,
è-loʋalaʋɛ ɠa ga kɔlu ɓɔigi.
5 Kaite gè niima vaiti boni è ma ná luɠɔ,
gè ti woni, è ti mɛni, aisa ti ʋa ɠɛ,
naa ɠa a kɛ è mina ɠɛ ma:
‹Nà-kɔɔɠɔ ganigi ɠa é niima vaiti kɛai,
nà-vololibai ɓaa nà-kɔlu ɠaawuungai ɠa é ma leveiti feeni.›
6 È mɛnini ga pagɔ, wɛlɛ ga ɠaazuʋɛ,
ti pɛ ti ʋilɛga su.
Wa ɓalaa wo la daazeelia?
Nà ga faa niinɛiti bo è ma, ti lɔɔɠuai,
è la ti ɠwɛɛ.
7 Ti ɓɛtɛa nɔ ɠa niizu, é la ga kaite,
eyɛsu za voloi è la ɠɛni dɛ ta mɛnini, é ʋa wo,
è ʋa zoo ɠɛɛzu ma: ‹Gè ɠɛa niina kwɛɛ!›
8 Ɓa, è la ɠɛni ta mɛnini,
è la ɠɛni tanɔpɛ gaaɠaani kaite,
ta la looni è woizu.
Mazɔlɔɔ gè ɠɛni è ɠwɛɛ,
gè è ɠwɛɛni ga yaava nui.
Ungo, è-laasei ka ga:
‹Zɛgai dee ɠoozu é ɠɛ ga kololala nui!›
9 Kɛlɛ tɛi gè ga GALA,
gè nà-ziiɠaawanai zuzoni.
Nà-lɛbiyai maaʋele ma, gè ɓɔɠɔ zo,
gè mina è-ma zuwu ɠaaleʋe.
10 Gè è ʋoluɠulaa,
é la ga walii ɠaawuun faa,
ungo, maanɔɠɔi ma liɠii ɠa gè è ʋoluɠulaai su.
11 Nà-nɛɛbɛi maaʋele ma,
nà ɓɔɠɔi nà-nɛɛbɛi vaa ɠa gè kɛɛzu ma,
mazɔlɔɔ gè la zooga gè ʋa va bu,
ga tɔ̀ɠɔi ʋa ɠoloɠolo.
Lɛbiyai a ve bɛ̀, gè la zooga gè ʋa va bu,
naa ʋa ve taɠili bɛ.
12 «Woilo gòoi ma, Zakɔɓe mavofodai,
Izilayɛle, ɗɛi gè è lolini,
nà ɠɛʋele ma yeenɔpɛ,
nà ga ma mɔungi
nà ga ma ɠaaɓelagi ɓalaa.
13 Nà ɓɔɠɔi zèeiti ka gè zooi ɓɛtɛni la,
zèezai ɠa gè geeɠɔlɔgiti kpɛtɛni la,
nà ti lolina, ta ɗa ʋa ʋɔɔma, ti ɓɔɠɔ lɛ.»
14 Wo pɛ à ɠaalɛ ba, wo woilo!
Ɓɛ ɠa é ti zaama, é niima vaiti boni ti ɠɛɛzu?
Zɔi Ɠɔoɠɔ GALAGI nɛai ʋɛ,
naa ɠa é ʋaazu ziima vaiti kɛɛzu Ɓaɓilɔne laalɔɠɔma,
zeei ɠa wuzeɠe Ɓaɓilɔne nuiti daalɔɠɔma.
15 «Nà ʋe, nà ʋe de, gè ɓɔɛni,
nà ɠa gè tolini, gè ʋaa la.
Nà ɠɛ ga zaɓu zeavaiti suɓɛtɛ.
16 À maaɓuɠa bà, wo nii mɛni!
Kaipa tɔɔzeizu gè la ɓɔɛni dɔɔɠuzu,
niima vaiti tɔɔzei yeei gè ɠɛni ná.»
Niizu, Maliɠii Ɠɔoɠɔ GALAGI tèʋegɛ ga ná-Zɛnvui.
Nii GALA wɔinɗai la
17 Ɠɔoɠɔ GALAGI wooi ɠaa,
è Unmɔɔ Nui, Izilayɛle ná-GALA Ɲadegai:
«Nà ga Ɠɔoɠɔ GALAGI, ɗa-ƓALAGI,
nà è ɠalasu ɗa-ɠulanuma vai ma,
gè pelei lɛ ga ɗe, nii maanɛai è ziɛ la.
18 Ee, ni è ɠoloni ga pagɔ nà-deveiti bɛ!
Ɗa-yiilɛigi a la ɠɛ yeizu eɠɛ ziɛ wolai,
da-lelebodai ɠɛ eɠɛ kpoloɗɛi ma lakpatakpagiti.
19 È-mavofodai ɠa mɔin, eɠɛ ɲaɠaegi é kpoloɗɛi laaʋɛ,
daaseigi ɠaa la ʋalaga ba,
é ʋa ɲɛɛlɛ gàazu pɛ!»
Kulaai wo fai Ɓaɓilɔne ʋa
20 À ɠula Ɓaɓilɔne ʋa!
À ɓizɛ Ɓaɓilɔne nuiti ba!
À ɠoozunɛ, wo zeze ga ma wooi!
À daazeeli, wo faza ɠoozamaʋɛti, eyɛsu zou ɓela ga,
wo ɠɛ ma: «Ɠɔoɠɔ GALAGI ná-botiɠɛ nui Zakɔɓe unmɔɔga.»
21 Siɛgi zu é loni la ti luɠɔ,
ti ɗa ziɛ teʋebai zu,
kpɔɔle wɔin la ɠɛni ti ɓɔlɔni,
mazɔlɔɔ é ziɛi ɠulani ti ʋɛ fasai ʋa,
é kɔtu wolai ʋalini su, ziɛi zulu.
22 Kɛlɛ Ɠɔoɠɔ GALAGI ɠɛ:
«Ziilɛi ge la faa ɲɔu ɠɛ nuiti bɛ pɛ!»