7
1 «Nii deveai nuɓusɛi ma eteai zu, kpaaʋɛ eɠɛ salaʋusulai,
sii ma voloiti kulaʋɛ eɠɛ nui é zalai ɠaiziɛzu.
2 Eɠɛ duɔi é foloi ɠa, é niinigi maaɓɔunsu,
ta eɠɛ botiɠɛ nui é zalai maaɓɔunsu,
3 zekana gè la, gè alugiti kɛa taɓai zu,
nà kpidiiti kɛɛzu nɔ kpɔlɔi zu.
4 Nà laana nɔ feya, nà ɗa ɠisiɛ ga: ‹Nà wuzeɠe siɛ kpɛgele zu?›
Siɛgi zu kpidii zuɠoozazu la, dàa ɠa vesu ga kɛunga wuuleegi eyɛsu geelaalao.
5 Koegi ʋua kpùsɛi ʋa ná pɛ, kɔ̀lɔgi ɓaa ga pɔlɔi ɠɛʋelei,
kɔ̀lɔgi ɗa ʋaliʋali, é ɗa ɠula ɓɔɠɔ ʋa.
6 Nà-eteai ɠa leʋesu ga maavilɛ, é leʋe seɠe vɛlɛ nui ná-keingi ʋa.
Toɠa liizu, é ɓe, kito nɔpɛ ge la ɠɛa ná.
7 «Ee, GALA, ɠizɛ su ga zɛ̀nvui ɠa ga fiilɛi nɔ,
gàazuʋɛ la mɔ undaanɛɛi ɠaa ʋolu eyɛsu ɠɔ.
8 È-ɠaazuɠɛzɛi è ɠɛa wɛlɛzu mà la, naa la mɔ zooga é ʋa kà,
siɛgi zu è wɛlɛzu la, gè la mɔ ɠɛa ná.
9 Tonaɓiingi ɠa ɗa ɲɛɛlɛ, é li,
zekana é la, zɔi é yeizu gɔvɛalaazu, é la mɔ lɛa ʋolu.
10 É la mɔ ɠalega ma ʋolu, é ʋa ʋa ná-pɛlɛi wu,
ta yeema ma seizuʋɛ ɓɔɠɔi.
11 «Naa ɠa é ba, gè la mɔ maaɠɛsu kpɔ ʋolu,
zɛ̀nvui ɠa kidaaʋiligi laawu, kɛni mu gè ɓɔɛ.
Nà kpalagi wosu nà-ziiɓɔlɔi laawu.
12 Nà ga kpoloɗɛi ɓaa, ɓaa kpoloɗɛ wu zua wolai,
è nua ʋilɛsu dàalɔɠɔma ga ti ɗa wɛlɛ mà?
13 Siɛgi zu gè ɠɛɛzu ma la: ‹Nà-betei ɠa gàanɛɛnɛ,
dàazuʋɛ ɠa ɓɔ bà ta zeɠe nà-taɓai ʋa,›
14 naazu ɠa è màaluazu la ga se wuulewuulegi,
è gàalua ga kulakɛlɛmaiti.
15 Wɔ̀inʋɛ ga è dɔ̀ɔɓa,
Ungo, saai vizɔgɛ mà, gè ʋa lia yɛsu ga mà ɠaei nɔ!
16 Faa kula ɠɛa, gè la yɛga ná ɠɔ,
zɛ̀nvui la ga ani nɔpɛ, zɛ̀ ná dɔin.
17 «Nuɓusɛi ɠa ga leeni, è ʋa wola ɠigaiziɛ ná-faa zu,
ta ná-fai wola ʋa ɠɛ è-yii ma,
18 è ʋa ɗa ná-fai wuuʋɛtɛ sobu-o-sobu,
ta è ɗa ʋa poluɠulazu yeeɠɛɠalai pɛ su?
19 Siɛgi ɓɛgele ɠa è-ɠaazuʋɛ zeɠezu la bà?
Siɛgi ɓɛgele ɠa è ɓesu la bà, gè dàaɗɛi ɓɔle?
20 Tɔun, anɛɛ ni gè koto ɠɛɛni, leeni ɠa gè kɛai ga ɗe, ɗɛi è wɛlɛzu nuɓusɛiti ma?
Leeni vaa zu è daalogai nà nɔ bà?
Gè ɠɛa ga kasɔ, ɓaa?
21 Leeni vaa zu è la nà-tɔ koloɠologiti suvaayɛsu,
è ʋa ɓudɛ nà-faaɠaaza golai maazu?
Mazɔlɔɔ nágo ʋe na, gè ʋa la fufiligi zu.
Ɗa gàiziɛ, kɛlɛ gè la mɔ ɠɛa ná.»