8
Ɓilidade ná-kpɔɛzuɠula mɔungi
1 Suɠa nui Ɓilidade kpɔɛi zeɠeni, é ɠɛ ma:
2 «Ɗa yɛsu niima ɓɔɛzuɠulaiti bosu eyɛsu yeelɛ?
Tɔngɔlɔ fiilɛ ɓɔɛi naati maa ɠa leʋezu yeelɛ?
3 È laaʋɛ da gaamazu ga GALA ka ɗa telebodai valibo,
ɓaa Zɛbɛi-Pɛ-Maliɠii ɠa ɗa sɔle fai maaʋe?
4 Ni è-loun zunuiti ti kotoi ɠɛa,
é ta-lɔ koloɠologiti salaa ti ma.
5 Kɛlɛ ɗɔun, ni ɗa GALA gaiziɛzu,
è kpɔbai ɠaiziɛ Zɛbɛi-Pɛ-Maliɠii ya,
6 ni peelalazu la è ʋa, è zɔlegɛ,
gaamazu, naazu toɠa ɠaaɓa è ma,
é tosuʋɛ ve è ya nii soloogai è ma.
7 È ɠɛʋele mɔungi è ɠɛni su, naa ɠa lɔi è ɠaazu,
ɗa pokɔɠɔna ma niinɛi ma ɗa ɠɛ su.
8 Deɠɛmu, nuiti ti etea ziaa è luɠɔ, naati gaazaɠa dɛɛ,
è ɠida faiti bu niiti ti-mɛmɛwolani ti ziaai ti zu.
9 Mazɔlɔɔ ade zɔlɔɔgɛ wogi nɔ, ade la faa nɔpɛ kwɛɛ,
tɔɔzei de-zii ma voloiti eteai zu, ta leʋesu eɠɛ niinigi.
10 Kɛwolaiti ta ɠigi ve è ya, ti è ɠala,
ti kula naa zu, nii ti ziaa su.
11 «Tɛmui la ʋɔnɔga ni kpetei ɠɔmaʋɛ la de,
seeligi la ʋɔnɔga ni dɛilɛigi la ná.
12 Anɛɛ ni puaʋɛ, nu la teʋeni ga,
ziɛi maa a leʋena, é vɔ tufai zɔiti tuɠɔ.
13 Zekana a ɗa ɠɛ la ga naati, niiti ti yeemazu GALA ma,
faa ɲɔu ɠɛ nui ná-kitogi ɠa ɠoloɠolo.
14 Kitosuʋɛ ɠa ɠoloɠolo,
ná-ladalai ɠa nɔ ga ziingo lɛdɛi ɠɛʋele.
15 Siɛgi zu ti ʋoluzeizu la ta-ʋɛlɛi ʋa, naa ɠa ɗa ɲiikpi,
ta ɠaaɓaana ga ti zɛlɛ da, é la yɛga loni.
16 Ti ɠɛɛʋɛ eɠɛ siinziin ganigi, ziɛi su foloi ɠa,
é ma ɓekegiti maalesu kpelei maazu.
17 Toɠa ma zapeiti dɔɔzu kɔtuiti zɔɠɔzuʋɛti,
ti pele zɔlɔɔ, eyɛsu ti yei fasai wuʋɛ.
18 Ta folona seizuʋɛ,
ná ɠa kɛ eɠɛ kaipa é la ɠɛni kwɛɛ.
19 Wɛlɛ koozunɛɛi ʋa, nii é sɔlɔɔsu ná-pelei zu.
Taɠili ka ʋɔnɔ potogi zu zooi ma.
20 «Ɓa-o, GALA ge la sɔbalala nui ʋiliga ya,
é la ɓɔga faa ɲɔu ɠɛ nuiti ba.
21 Nágo ʋe na, é ʋa é è laave ga ɲɛɛ wɔin,
è-lakɔlɔgiti ti ɗa zeze ga koozunɛ wooiti.
22 Niiti ti è wɔinzeɠezu, unfegi ɠa naati maaɓɔle.
Nu ɲɔiti ta-zeɠe ɠotaiti ta ɲɛɛlɛ.»