14
Fɔɔvɔgi ta pului
1 Wɛlɛ keela wooi ʋa Zelemi sɔlɔɔni Ɠɔoɠɔ GALAGI ya é ʋilɛ fɔɔvɔgi ná-fai ʋa.
2 «Gɔlɔɗɛi ɠa Zuda nuɓusɛiti gaazu.
Ná-taa wolaiti suwoga,
su nuɓusɛiti gaazuɠilia,
kidaaʋili kpeei ɠa loozu Zeluzalɛme ná-faa zu.
3 Nu wolaiti ta ta-wotiɠɛ nuiti teʋesu ziɛ mɛɛnsuʋɛ,
naati ta liizu ziɛyeɠeiti su, ti ka ga ti vɔa,
ti ɠale ma ga ta-liɠiiti suɲakaai,
ti unfe, ti ɓalaa ga ɓɔɠɔ, ti seɠei ʋɛɛ ɠaazu.
4 Zooi laaʋaliʋalia, tɔɔzei tona la puuzu,
tii ɠɛɛ nuiti iɲɔ ge leʋea, ti ɗa ɠaazulɔɔɠu.
5 Anɛɛ dopai ɓɔɠɔi é dɔɓɔi zu,
toɠa yiʋoi ʋuuzu, é ɠɛlɛ ba,
tɔɔzei tufa lɛnu ge la ná.
6 Dɔɓɔ zoovalegiti ta lɛɛzu gizeiti ma ti maaɓologai
ti ɗa fiilɛi zo eɠɛ koʋeiti,
ti ɠaazuɓɔiɗai su ga tufa ɠaiziɛi.»
7 Gá-ɠotoiti ta zeele wooi wosu gi laalɔɠɔma.
Ee, Ɠɔoɠɔ GALAGI, faa ɠɛ è-laaseigi ma unfemai maaʋele ma!
Mazɔlɔɔ gá-wooʋalada vaiti gola zuwɔɔlɔʋɛ.
Gi kotoi ɠɛa è laalɔɠɔma.
8 Izilayɛle ná-kitogi,
ná-kizo nui kidaaʋiligi ma ziɛgi zu,
leeni vaa zu è è-ziɛ ʋelei ɠɛɛzu eɠɛ wɛɛn zooi nii zu,
eɠɛ siɛ wo nui é ná-seɠe ɠotai losu kpidi ɠila faa nɔ ma?
9 Leeni vaa zu è ziɛzu eɠɛ zunui nii gaaɓaa la bɛ,
eɠɛ kɔɔɠɔ ɠuluɓai zobo ge la bɛ é ʋa nu ɠizo?
Tama ɗa gi zaama, ee, Ɠɔoɠɔ GALAGI,
è-laaseigi ʋɛɛʋɛ gi ʋa,
mina ɠɛlɛ gi ʋa!
10 Ɠɔoɠɔ GALAGI wooi ɠaa niima nuɓusɛiti ma:
«Ti nɛɛbɛ vai ɠa ga ti ɗa leʋeteʋe,
ti mina ɠɔɠɔzu looɠo.
Kɛlɛ naa la nɛɛni Ɠɔoɠɔ GALAGI ʋɛ,
é la yeemaa ta-vaaɠaaza golai ma,
toɠa ta-ɠotoi zala ti ma.»
11 Ɠɔoɠɔ GALAGI ɠɛni mà: «Mina màanɛɛnɛ ga gila kpalaa niima nuɓusɛiti ta-vaa zu.
12 Anɛɛ ta zugi zosu, gè la woiloga ɲɛgɛlɛin ta-ɠidaaʋili kpeeiti ma. Anɛɛ ni ta gala zalaɠaiti kula bɛ̀, ti vebɛ zalaɠaiti fe, gè la yeezeiɗa ti wu pɛ. Kɛlɛ nà niiti ma vaa ɠaaɓelazu ga kɔɔi, ta pului, ta ɗɔfɔ zeeɓɛi.»
13 Gè gooɠaaʋoteni, gè ɠɛ ma: «Ee, Maliɠii Ɠɔoɠɔ GALAGI! Wɛlɛ nii ɠa GALA goo wo nuiti ti bosu ti ma, ti ɠɛ ma: ‹Kɔɔ la loa wo ma, ɓaa pului, kɛlɛ GALA ka dituɠɔma ɠitei ve wo ʋɛ, naa ɠa ɠɛɛzu ʋɛ ɓɔɠɔi nɔ.› »
14 Ɠɔoɠɔ GALAGI ɠɛni mà: «GALA goo wo nui naati ta kɛɛzu eɠɛ nà woo ʋu ti la ga ti bo bɛ̀. Zɛɛ ɠana, mazɔlɔɔ gè la ti leʋeni, gè la deve nɔpɛ feeni ti ya, gè la faa nɔpɛ boni ti ma. Nii ti bosu wo ma, naa ɠa nɔ ga zɛɛ ɠulakɛlɛma, ta zɛɛ ʋelela ʋele vaa wogi, kaka faa ɓɛtɛiti nɔ ʋe!»
15 Naa ɠa é ba, Ɠɔoɠɔ GALAGI wooi ɠaa GALA goo wo nui tɛiti daalɔɠɔma: «Gè la ɠɛni ti leʋeni, ta kulazu eɠɛ nà ɠa gè valiai ti ma, ga kɔɔ la ɠɔa, pului la loa zooi tɛi su. Tama-o, kɔɔi ta pului nɔ ɠa a ti undaaʋili ti pɛ!
16 Nuɓusɛi mɔtaiti ma, niiti ti ɠɛni ʋelela ʋele vai wosu ti ma, naati gaa ɠa ʋalasu ba Zeluzalɛme taazuʋɛ nɔ kɔɔi ta pului ya. Nu la zɔlɔɔga é ʋa niima nuiti maaɠulu, ti-anzaiti, ti-loun zunuiti, ɓaa ti-loun anzanuiti. Ʋele ɠana nà faa ɲɔi laa la ti unma, nii ti kɛɛni.
17 «Ɗa ʋe, nii wo ti ma ga:
‹Yeenɔpɛ, folo ʋɛɛ kpidi ʋa,
gàazuɗɛiti nɔ ɠa ti ʋuuzu,
maaleʋe la ba!
Mazɔlɔɔ nimiza vaa wolai ɠa ʋaazu nà-nuɓusɛiti daalɔɠɔma,
toɠa ɠɛɛzu ga kidaaʋili gola.
18 Ni nà ɠulana, gè li dɔɓɔi zu,
wɛlɛ nu ʋoomaiti nɔ ɠa ti ná,
ti yɛgai kɔɔi zu.
Ni nà lɛɛna taazuʋɛ,
nu ʋooma letele nɔ ɠa gè ti ɠaazu ná,
ti zaai ga pului.
GALA goo wo nui ta zalaɠa ɠula nui ta ziɛzu zooi zu,
ti la faa nɔpɛ gaaɠaa.› »
19 È Zuda yooi ʋiliga ya gaamazu ɓaa?
Siyɔn wɔinzeɠea è ma ɓaa?
Leeni vaa zu è faa laa gi ma ga naa ma zii
nii nu nɔpɛ ge la gi ɠulaa su?
Gi ɠigi ɠɛa ziilɛigi ʋa,
kɛlɛ faa ʋagɔ nɔpɛ ge la ɠɛɛzu.
Gi ɠɛa maaɓɔungi wosu, gi ʋa ɠɛdɛ,
kɛlɛ wɛlɛ, kidaaʋiligi ʋa!
20 Ɠɔoɠɔ GALAGI, gi gá-nu ɲɔulai ɠwɛɛ,
ta gi-mɛmɛwolani ta-vaaɠaaza golai,
mazɔlɔɔ gi kotoi ɠɛa è laalɔɠɔma.
21 È-laaseigi ma unfemai maaʋele ma, mina gi wɔinzeɠe,
mina ɓaaɠula ɗa-lɛbiyai ma masa kpɔkpɔgi ma!
Mina yeema ɗa-minazeɠegi ma è boni gi ʋɛ, mina seɠe ma!
22 Zɛɛ ɠalagiti saama, ti zii ɠiligiti zea,
taɠila kpalaa ɠa ná nɛi, a zoo é tonai ʋu?
Geei ɠa nɛi, a ɗa sabalagiti pu?
Ɗa la de nɛi ɓaa, Ɠɔoɠɔ GALAGI, gá-ƓALAGI,
ɗɛi gi ɠitogai è ʋa?
Mazɔlɔɔ ɗa ɠila kpe nɔ ɠa
ɗa ɗa niima vaiti kpein kɛ.