15
Kɛɛɠeleɠele kili ge la ná,
kɛni maaɠoloi wo
1 Ɠɔoɠɔ GALAGI ɠɛni mà:
«Anɛɛ ni Moize ta Samiyɛle ta losu kàkala maanɛɛnɛ vaa zu,
niima nuɓusɛiti ta-vaa la mɔ zìima.
Ti zeɠe lɛɛ gàazu, ti li, ti maaɠooza bà!
2 Naazu ni ta ɠɛna è ma:
‹Mini ɠa gá li ná?›
ɗa ɠɛ ti ma: ‹Ɠɔoɠɔ GALAGI wooi ɠaa:
Niiti deveai ga ti za ga ɗɔfɔi, naati ta za ga ɗɔfɔi,
niiti deveai ga ti za ga boɠa zɔkpɔi, naati ta za ga boɠa zɔkpɔi,
niiti deveai ga ti za ga pului, naati ta za ga pului,
niiti ti makɛgai duɔlai ɠɛɛ vai ma, naati ta li duɔlai zu!›
3 «Nimizai ma zii naanigɔ ɠa gè teʋesu ti ma,» Ɠɔoɠɔ GALAGI wooi ɠana, «boɠa zɔkpɔi ɠa a ti ʋaa, gilɛiti ti ti ɓokpo, wɔniiti ta dɔɓɔ zuaiti ta ti zaɓo su, ti ti ɠaaʋala ba.
4 Nà ti ɠɛ ga maalua ani eteai ma masadaiti pɛ bɛ, Manasé maaʋele ma, Ezekiase ná-doun zunui, Zuda masagi, faa ɲɔi pɛ faa zu nii é kɛɛni Zeluzalɛme.»
Faa kula ɠɛa ga Ɠɔoɠɔ GALAGI
5 «Tɔun ɓɛ ɠa a Zeluzalɛme maalobo?
Ɓɛ ɠa è maawɔin a so?
Ɓɛ ɠa a zeɠe ziɛ ʋele ʋa, é è maaɠaazaɠabo?
6 È ɠɛlɛni bà, è ʋoluavega bà,»
Ɠɔoɠɔ GALAGI wooi ɠana.
«Kɛlɛ gè zeei wuzeɠea è laalɔɠɔma,
gè è ɠoloɠolo, mazɔlɔɔ é kula ɠɛa.
7 Gè nà-sɛpɛgi leʋega taa wolai ɠilagilagi pɛ su,
gè nà-nuɓusɛiti fazaga,
gè zɛ ná ti undaaʋili,
gè ti ʋala dointi ma,
kɛlɛ ti la valiboni, ti ʋa zeɠe ti-ziɛ ʋeleiti ɲɔiti polu.
8 Gè ɠɛa ga zaɓu poanzaiti ti mɔin ti zaama,
é ʋooʋa kpoloɗɛi ma ɲaɠaegi ma.
Folo ɓekpegi, gè ʋaani ga maanɔɠɔi kɔɔɠɔ zunu loungoi dee ʋɔ,
gè sasuɓalii ta dualuagi yei ma ga kulafilibai.
9 Anzanui unfemai ɠɛa veezu bɛ
ga é doun lɔfela zɔlɔɔni,
gaamago nɔ zeaɲakai ʋe niina.
Anzanui naa ʋalaga fiilɛi ma, ná-foloi lia,
siɛgi zu folo ɓekpegi ʋe dɛ.
É ɠɛa ga unfegi bɛ, ɓaaɠula ma.
Mɔtai niiti ti ná, gè naati fea ga ti zili nuiti ta-woɠa zɔkpɔi laamianigi,»
Ɠɔoɠɔ GALAGI wooi ɠana.
GALA goo wo nui ná-kpee wooi
10 Maanɔɠɔ ɠa bɛ̀!
Leeni vaa zu, ee, dèe, è sɔ̀lɔɔni eteai zu?
Gè ɠɛa zooi pɛ zea ga zunui maaɠaalii ta sakpegi polu!
Gè la ani ziingaosu, gè la nu ziingaosu ga ani,
anɛɛ naa ʋe ti pɛ ta fòovoozu nɔ!
11 Ɠɔoɠɔ GALAGI gòoɠaaʋoteni, é ɠɛ ma:
«Nɔ̀un nà, nà è unmɔɔsu ɗa-maanɔɠɔ ziɛgi zu,
ta ɗa-ɠidaaʋili siɛgi zu,
è zili nuiti ka ta ʋa è ʋɔ, ti è maanɛɛnɛ!
12 Nu ɠa zoo nɛi é kɔlui ɠaleɠale,
kɔlui é zeɠezu lɛkpɛmaʋɛ nu ɠɔʋɛzuʋɛ, ɓaa kɔlu ɓɔigi?
13 «Nii wo niima nuɓusɛiti ma:
‹Nà wo-yeaɠɔligiti ta wa-naavoloiti kwɛɛzu ga kɔɔzoganiiti,
wo la poto sɔlɔɔga,
wa-ɠotoiti wo ti ɠɛɛni wa-yooi zu ná pɛ, ma zalai ɠana.
14 Nà wo lɔɔzu duɔlai zu wo zili nuiti zea,
zooi naa zu nii wo la kwɛɛ,
mazɔlɔɔ nà-ziiɠaawanai soga eɠɛ abui,
toɠa sosu wo pɛ wo laalɔɠɔma.› »
15 Kɛlɛ ɗɔun ɗa, Ɠɔoɠɔ GALAGI, è nà-fai kpein kwɛɛ.
Ɠisiɛ nɔ̀un su, màalobo,
nɔ̀nɔ ʋotokula wɔ̀inzeɠe nuiti ma.
Mina yɛ yiilɔɔzu sìli nuiti bu,
è ʋa va bu gè ʋa zeɠe ná!
Suɠwɛɛ ga ɗa-vaa ɠa gè poomugi zuzosu da!
16 Gè ɓena è-laawooi zɔlɔɔ nɔ feya, gè mi,
ti ɠɛni bɛ̀ ga koozunɛɛi ta undaanɛɛi,
mazɔlɔɔ è-laaseigi ɠa é bà,
ee, Ɠɔoɠɔ GALAGI, GALA Fai-Pɛ-Maliɠii!
17 Gè la ʋɔɔpɛɛni ɲɛɛɠulasu nuiti ta-maaɓɔgi ʋa,
gè ʋa ɠoozunɛ ti ɠoba.
Kɛlɛ è-yeei zizini mà, gè li yɛ,
mazɔlɔɔ è dàaveni ga ziiɠaawanai.
18 Leeni vaa zu kwɛ ge la nà-taɓai ʋa?
Leeni vaa zu nà-palai ɠɛlɛzu kpe fai ʋa,
é ʋa ɠɛ ga pilii?
Gaamazu ɗa ɠɛɛzu bɛ̀ ga kiteʋe ɗɛungi,
eɠɛ ziɛi nu la laa da?
19 Naa ɠa é ba, Ɠɔoɠɔ GALAGI wooi ɠaa:
«Ni ɗa ɠalena ma, è ʋa pɔ̀ ʋolu,
nà è ɠaaɠale ma ʋolu ɗa-wotii zu.
Ni anii fizɔgai, ɗa naati zeeɠaaɠwɛɛna ta zɔi tosu la ba,
ɗa ɠɛ ga dàaʋɛ.
Tiya ɠa ta ʋa ʋolu è ʋɔ,
kɛlɛ ɗa laade ɗa li ʋolu ti ʋɔ.
20 Nà è ɠɛɛzu niima nuɓusɛiti tuɠɔ
ga kɔlu ɓɔigi ma ziɠi sɛbɛlɛgi.
Ta laalɛ è wu ga kɔɔi,
kɛlɛ ti la vɔniga è ma,
mazɔlɔɔ nà è ʋa, ga gè è ɠizo, gè è unmɔɔ,»
Ɠɔoɠɔ GALAGI wooi ɠana.
21 «Nà è ɠula nu ɲɔiti zea,
nà è ɠizo toosu nuiti ma.»