16
Zelemi ná-gaalɛi vai
1 Ɠɔoɠɔ GALAGI ɓɔɛni pɔ̀, é ɠɛ mà:
2 «È maa la nɛɛni è ʋa anza zeɠe, è ʋa doun zunua ta doun anzanua zɔlɔɔ niima yooi tɛi su.
3 Mazɔlɔɔ Ɠɔoɠɔ GALAGI wooi ɠaa é ʋilɛ doun zunuiti ta doun anzanuiti ta vaa ʋa, ti ʋaazu zɔlɔɔsu naama yooi zu, é ʋilɛ ɓalaa ti-ɠɛɛni ta ti-leeni ba:
4 ‹Ta zaa ga seeɓɛ ɓaaɓaagiti, nu nɔpɛ ge la ta-zaa wɔlɔ woga, kɛlɛ ta yɛ laani zooi ma, ti ɠɛ ga kpoɠa pɔlɔi. Ti ma vaa ɠaaɠaaɓela ga boɠa zɔkpɔi ta pului, ti-ma ʋoomaiti ta ɠɛ ga daamianigi wɔniiti bɛ ta dɔɓɔ zuaiti.›
5 «Mazɔlɔɔ Ɠɔoɠɔ GALAGI wooi ɠaa: ‹Mina lɛ saa ʋolu ʋɛlɛ wu, mina li maaɠulu bosu, mina saa luʋɔ bo ga nu nɔpɛ, mazɔlɔɔ gè nà-ziilɛigi ɠulaa nuɓusɛi niiti zea, ti ʋalaga nà-wooɠɛɠiladai ma, ta nà-wɔinlai,› Ɠɔoɠɔ GALAGI wooi ɠana.
6 ‹Naama yooi zu, naavolo nuiti ta bala nuiti ta za, nu la zɔlɔɔga é ʋa ti maaɠulu, ta-zaa wɔlɔ la woga, nu la wɛn dɔa ɓaa pɔlɔpalɛ ɓɔɠɔ ma, nu la nɔun kpuyega ta-vaa zu.
7 Nu nɔpɛ ge la saa ʋolu nuiti ta-ʋɛlɛyeɠei ɠɔa ga daamiani, é ʋa ti ɠaanɛɛnɛ, nu nɔpɛ ge la ziawɔ ɲɛ gila ɗɛi vea ti ya ti ɠaanɛɛnɛ vaa zu, tɛi ti-ɠɛɛ zaai ɓaa ti-lee.
8 « ‹Mina lɛ ɓalaa fɛti ɠula ʋɛlɛi wu, è ʋa zei ná ti ɠoba, è ʋa daami wo ná, è ʋa ɓɔɔle ná.
9 Mazɔlɔɔ Ɠɔoɠɔ GALAGI, Fai-Pɛ-Maliɠii, Izilayɛle ná-GALAGI wooi ɠaa: Nà niima vaiti pɛ kpesu wo ɠaazu wa-eteai zu, fɛti ɠula zɔngɔ wooiti ta koozunɛ ɓain gooiti, naa ʋɛɛ seipɛlɛla nu niinɛiti ta-wuyeiti ba.
10 « ‹Siɛgi zu è niima ɠeela wooi wosu da niima nuɓusɛiti ma, ta è ɠaazaɠana ga: Leeni vaa zu deɠɛmu Ɠɔoɠɔ GALAGI bosu ga, toɠa maanɔɠɔ wolai naa la gi ma? Faa ɲɔi ɓɛgele ɠa gi kɛɛni? Faaɠaazagi ɓɛgele ɠa gi kɛai Ɠɔoɠɔ GALAGI laalɔɠɔma, gá-ƓALAGI,
11 ɗa ti wooɠaaʋote ga: Toɠa ga wo-ɠɛɛni ti ɠɛlɛni bà, Ɠɔoɠɔ GALAGI wooi ɠana. Ti ɠilini gala kiligiti ba, ti ɗa ti lɛbi, ta ti ɗa nɔkɔ ti wu. Ti ɠɛlɛni bà, ti la ziɛni ga nà-tɔ gooi.
12 Wɔun, wo-ziɛ ʋelei ɲɔuʋɛ é leʋe wo-ɠɛɛni ba. Wɛlɛ ɛsɛ ka liizu nɔ ga ziima ʋele ɲɔi nɔ, wo la woilosu gòo ma.
13 Nà wo ʋilisu ya, wo ɠula zooi tɛi ba, wo li zooi naa zu nii wa-o, wo-ɠɛɛni-yo, wo la ɠɛni kwɛɛ. Miná, folo ʋɛɛ kpidi ʋa wa ɠɛ nɔkɔsu ná gala kiligiti bu, mazɔlɔɔ gè la mɔ wo maawɔinɠaa.› »
Galema wolai
14 « ‹Naa ɠa é ba, foloi tanigaa ta ʋaazu, nu la ɠɛa názu: Gè ɠonaa Ɠɔoɠɔ GALAGI ma, nii é vulua, nii é Izilayɛle nuiti kulani Ezipete yooi ʋa! Ɠɔoɠɔ GALAGI wooi ɠana.
15 Kɛlɛ toɠa wo ga: Gè ɠonaa Ɠɔoɠɔ GALAGI ma, nii é vulua, nii é Izilayɛle nuiti kulani lɛkpɛmaʋɛ nu ɠɔʋɛzu ʋele yooi ʋa, ta zooi pɛ ba, ʋɛti é ti ɓɛɛni, ti vaza náti! Nà ʋa ga tiye ʋolu ta-yooi zu, nii gè feeni ti-mɛmɛwolani zea.› »
Nu ɲɔiti kpein ta zo
16 « ‹Nà nu zo nu ɓulugi leʋesu ti ma, naati ta ti zo,› Ɠɔoɠɔ GALAGI wooi ɠana. ‹Naa ʋoluma nà doso ɓulugi leʋe ti ma, naati ta ti zo adaʋɛ pɛ, gize wolaiti ma, gize nɛmɛiti su, eyɛsu ti lɔ kɔtu yeɠeiti su.
17 Nà ɠidaazu ti-ziɛ ʋelei ɠilagilagi pɛ bu, gila kpalaa ge la ɠɛɛzu zèemazu, ta-ɲamaba vai la zooga é ʋa lɔɔɠu bà.
18 Nà ti zala dɛ ga ta-vaaɠaazagi ta ta-ɠotoi ma ʋɛɛdai, mazɔlɔɔ ti nà-zooi ɠɔzɔa, tɔɔzei ti nà-zooi zulaavega ga ta-ɠɔɔɠɔ ganigiti ti la zɛnvu vea kɛni poomaiti, ti nà-zooi zulaavega ga ta-ɠɔzɔba yɛɛ ɠalagiti.› »
Eteai pɛ ka Ɠɔoɠɔ GALAGI ɠwɛɛ
19 Ɠɔoɠɔ GALAGI, ɗa ɠa è ga nà-zobogi,
màkɛ ƓALAGI, dɔ̀ɔɠuzuʋɛ kidaaʋili siɛgi zu.
Ɗa ɠa zii ɠiligiti ti ʋaazu è ʋɔ,
ti zeɠe zou ɓela ga ná pɛ,
ti ɗa ɠɛ ma: «Gi-ɠɛɛni ta-ʋoganii ɠɛni ga zɛɛ zaleiti nɔ,
wafuun galagiti ti la faa nɔpɛ paa.
20 Nui ɠa zoo nɛi é galagiti kpɛtɛ ɓɔɠɔ ʋɛ?
Tama ti la ga galagaa!»
21 Maliɠii ɠɛ ma: «Tama, naa ɠa é ba niizu,
nà nà-zobogi ta nà-zeeɠaaɓaai lɛɛzu ga tiye.
Ta suɠwɛɛ ga dàasei ka ga Ɠɔoɠɔ GALAGI.»