20
Zelemi ɠɛɛ vai kasoi ɠa
1 Zalaɠa ɠula nui Pasuul, nii é ɠɛni ga Ɠɔoɠɔ GALAGI zei ʋɛlɛi ma wɛlɛma ɠundiɠii, Imɛɛl ná-doun zunui, é Zelemi woomɛnini, é ɗa GALA gooi wo ɠani.
2 Pasuul GALA goo wo nui Zelemi loɠani, é gilini Ɓɛnzamɛn Siɠidaʋɛ ma ɓogi ʋa nii é ɠɛni maazuʋɛ, nu lɛɛzuʋɛ Ɠɔoɠɔ GALAGI zei ʋɛlɛi ma ɠoizuʋɛ.
3 Poluma zobui, Pasuul Zelemi vieni, é kula kɔlui ɠa. Zelemi ɠɛni ma: «Ɠɔoɠɔ GALAGI la mɔ è loliga ga Pasuul, kɛlɛ ‹Mini-o-Mini Maalua Vai!›
4 Mazɔlɔɔ Ɠɔoɠɔ GALAGI wooi ɠaa: ‹Wɛlɛ, nà è lɔɔzu maalua vai zu, ɗa-o, è-wɔɔlaiti-yo. Naati kpein ta yɛ ti zili nuiti ta-woɠa zɔkpɔiti ga, ɗa ɠɛ ná, è ti-zaazuʋɛ ɠa. Nà Zuda nuiti pɛ dɔ ɓalaa Ɓaɓilɔne masagi yeezu, nii a li ga tiye Ɓaɓilɔne, ɓaa é ti ma vaa ɠaaɓela.
5 Niima laaʋeaiti ta-naavoloiti kpein, ta ta-wotii ma lɔnɔgiti, ta ani ʋagɔi é ti ya, naa ʋɛɛ Zuda masagiti ta-naavoloiti pɛ ba, nà ti pɛ dɔ ti zili nuiti zeezu, ta ti-yeaɠɔligi pɛ kula ti ya, ti naati gaalɛ ba, ti li ga tiye Ɓaɓilɔne.
6 Ɗɔun ɗa, Pasuul, ta niiti ɓalaa ti è ʋɔ bɛ, wa liizu duɔlai zu. Ɗa zeelina Ɓaɓilɔne, miná ɠa è zaazu ná, è maaɠulu ná, zenɔ ɠana ɓalaa é ɠɛɛzu la ga è-wɔɔlaiti kpein, niiti è zɛɛ vaawokɛɛyeeluɠɔ ɓɔɛi wogai ti ma.› »
Zelemi ɓain fai GALA goi zu
7 Ɠɔoɠɔ GALAGI, è nɛ̀ɛnɛsogɛ,
gè ɓɔɠɔ yɛgɛ na è nɛ̀ɛnɛso!
È sòni, è vɔni mà.
Gè ɠɛa ga ɲɛɛɠulazu ani folo-o-folo,
ɛsɛ pɛ ka ɲɛɛɠulazu nɔ̀un su.
8 Mazɔlɔɔ kpɔɛla ɠilagila kɛni gè kpeei loo,
nà tooma vai ta faa zuɠoloɠolo fai laazeelizu.
Foloi laawu ɲɛgɛlɛin, Ɠɔoɠɔ GALAGI,
è-laawooi ɠa ɓaaɠulamai ta ɲɛɛɠulasui ʋilɛsu pòlu.
9 Siɛgi zu nà ɠɛna ɓɔɠɔ ma:
«Nà pɔ gè yeema daawooi ma,
gè la mɔ ɓɔɛa GALA daaseigi zu,»
anii ta ɠa zìimaʋɛ eɠɛ abui, è gàlazu,
dɔɔɠuʋɛ mà ɠaeiti su,
nà ɓɔɠɔ ɓɔlɔzu, kɛlɛ gè la ziɛzu bu.
10 Nà ma mɔinmɔin goomɛnisu, ti ɗa woo ɲɔi wo dàalɔɠɔma,
ti ɗa dàasei pɛɛ ga: «Mini-o-Mini Maalua Vai».
Tanigaa ti ɠɛ ma: «À kula kɛlɛ zu!»
Zɔiti ɓalaa ti lɛɛni naama wooi ma, ti ɠɛ ma: «Ungo, ade kula kɛlɛ zu!»
Niiti kpein ziilɛigi ɠɛni gi yɔɠɔzu gá tiye,
naati ta tòo ɠeleɠele gaiziɛzu, ti ɗa ɠɛ ma:
«A ɓɔɠɔ yɛna ná, é yaava, ada vɔni ma,
ada so, de dɔnɔ ʋotokula ma.»
11 Kɛlɛ Ɠɔoɠɔ GALAGI, è zuɓaaʋɛ, ɗa kɔɔi ɠɔɔzu bɛ̀.
Niiti ti wɔ̀inzeɠezu, naati ka ti ɓunɛsu,
ti la pilɛ sɔlɔɔga pɛ.
Ta unfe, tɔɔzei ti la zobo sɔlɔɔga,
toɠa ɠɛ ga unfegi nii é la yeema eyɛsu ɠɔ.
12 Ɠɔoɠɔ GALAGI, Fai-Pɛ-Maliɠii,
è zoogɛ kwɛɛsu ni nui ɠa è ʋɛ ga wooɠɛɠila nui,
ɗa ná-kisiɛiti fɛɠɛlɛfɛɠɛlɛsu niiti ti lɔɔɠuai.
Gè ná ʋɛtɛ, ʋelei è ʋaazu ti zalazu la,
mazɔlɔɔ ɗa ɠa gè nà-faiti kalivaai è ma.
13 À guyei loo Ɠɔoɠɔ GALAGI ʋɛ, à maamusɛ,
mazɔlɔɔ toɠa ɗa maawɔin nui ɠizo,
é kula faa ɲɔu ɠɛ nuiti zeezu.
14 Foloi gè zɔlɔɔni ma, naama voloi ɠotoʋɛ!
Foloi dèe gàazulaani la eteai ma,
nu nɔpɛ ge mina tuya loo ma voloi ʋɛ!
15 Naama zunui ɠotoʋɛ, zɔi é liini ga ma wooi é bo kɛ̀ɛ ma ga:
«Doun zunu zɔlɔɔga è ʋɛ,»
é zɛba é ɠoozunɛ gola.
16 Zunui naa ɠɛ eɠɛ taa wolaiti Ɠɔoɠɔ GALAGI ti woloni,
é la wanani ma!
Geelaa a laona nɔ feya, é ɗa kpeei mɛni ga a ʋa bɛ,
kpɔkɔ volo ziɛgiti su, é ɗa kɔɔɠɔ ɓeei mɛni.
17 Mazɔlɔɔ é la zɛ̀ni ná, gè ʋa za dèe ɠoozu!
Dèe a la ɠɛ ga nà-kabai,
a la màkɛ ɠoozu eyɛsu ɠɔ.
18 Lee vaa zu kùlaai dèe ɠoozu,
ni kpɔlɔi ta kidaaʋiligi zɔlɔɔ fai ʋe,
gè nà-eteai ziɛ unfegi zu?