21
Fai pilɛgai Zuda masagiti ba
1 Keela wooi Ɠɔoɠɔ GALAGI feeni Zelemi ya masagi Sedesiyase ná-faa zu. Masagi Sedesiyase Malikiya ná-doun zunui Pasuul leʋeni Zelemi ma, ta zalaɠa ɠula nui Sofoni, Maaseya ná-doun zunui, ga ti gaazaɠa ga:
2 «Soma, è Ɠɔoɠɔ GALAGI ɠaazaɠa gi ʋɛ, mazɔlɔɔ Ɓaɓilɔne masagi Neɓukadenɛzaal kɔɔi ʋɛa gi ʋa. Tanisu Ɠɔoɠɔ GALAGI ɠa ná-laavɔɔ vai ta ɠɛ gi ʋɛ, é ná-kɔɔi ɠaaɠale ma ʋolu.»
3 Zelemi keelaiti gooɠaaʋoteni, é ɠɛ ti ma: «À li, wo ɠɛ Sedesiyase ma:
4 Ɠɔoɠɔ GALAGI, Izilayɛle ná-GALAGI wooi ɠaa: ‹Kɔɔɠɔ nuiti ti siɠigi ʋoluʋɛ, ti ɗa ɲɛpii ɠɔ ga ta-ɠɔɔɠɔ zɔɔlaiti Ɓaɓilɔne masagi laalɔɠɔma ta Ɓaɓilɔne nuiti ti wo maalatigai, nà ti ɠaaɠalesu ma, ti ʋa taai tɛi koozuʋɛ.
5 Nà ɓɔɠɔ ɠa gè kɔɔi ɠɔɔzu wo laalɔɠɔma, gè nà-zobogi ɠula kɛlɛma, ta nà-ziiɠaawanai, ta nà-ziiɠulagi, ta nà-faawanama wolai.
6 Nà yeeʋɛɛzu taai nii zu nuiti pɛ ma, nuɓusɛiti ta toganiiti ta za ga ɗɔfɔ zeeɓɛ ɲɔi.
7 Naa pɛ poluma, nà Zuda masagi Sedesiyase zeɠe, ta ná-kundiɠiiti, ta nuɓusɛiti ta yɛ vulua ɗɔfɔ zeeɓɛi ʋoluma, ta kɔɔi, ta pulu wolai, gè ti ve Ɓaɓilɔne masagi ya,› Ɠɔoɠɔ GALAGI wooi ɠana. ‹Ungo, nà ti ve ti zili nuiti zea, niiti ti ti ʋaa ɠeleɠele gaiziɛzu. Neɓukadenɛzaal ɠa ti ʋaa, é la ti maawɔinɠaa, é la nu nɔpɛ zɛga ná, é la yeeɠulaa ɓɔɠɔ wu.›
8 «Niima nuɓusɛiti tetegi, ɗa ɠɛ ti ma: ‹Ɠɔoɠɔ GALAGI wooi ɠaa: Gè wo ʋilɛ ziimazeɠe pele zaɠalaʋɛ, zɛnvu ʋelei ta saa ʋelei yɔɠɔzu.
9 Nu nɔpɛ a yɛna taai tɛi su, naa ɠa za ga kɔɔi, ɓaa pului, ɓaa ɗɔfɔ zeeɓɛi. Kɛlɛ zɔi nɔpɛ a ɓɔɠɔ veena Ɓaɓilɔne nuiti zea, ti wo zeiɗai kɛlɛ su, naa yɛnvui ɠa yɛ zea, toɠa naa mu sɔlɔɔ ɓalaa.
10 Nà ɠaaʋotesu taa wolai nii laalɔɠɔma, ga gè faa ɲɔu ɠɛɛ la, gè ʋa li ma ʋagɔ ɠɛɛzu, Ɠɔoɠɔ GALAGI wooi ɠana. Toɠa lɔ Ɓaɓilɔne masagi yeezu, é gala ga abui.› »
Keela wooi é boni
Zuda masagi ná-pɛlɛyeɠei ma
11 «Ɗa ɠɛ Zuda masagi ná-pɛlɛyeɠei ma:
‹À woilo Ɠɔoɠɔ GALAGI laawooi ma,
12 Davide ná-pɛlɛyeɠei! Ɠɔoɠɔ GALAGI wooi ɠaa:
À ɗa foloiti tɔɔzei ga tukpɔi ɠaaleʋea ga telebodai.
Zɔi ti loozu ma, à unmɔɔ, wo kula ti ya.
Ni naa laade, nà-ziiɠaawanai ɠa so,
eɠɛ abui nii nu la zooga é ʋa paa,
tɔɔzei wo-ɠɛɛwotiiti ba ti ɲɔuɗai.
13 Nà laalɛɛzu wo wu, wɔi wo zeini
fasai ma nɛmɛi ɠa,
Ɠɔoɠɔ GALAGI wooi ɠana,
ungo, wo laalɔɠɔma wɔi wo ɠɛɛzu:
Ɓɛ ɠa a ʋa gi laalɔɠɔma?
Ɓɛ ɠa a zoo é lɔ gi-lɔɔɠuzuʋɛti?
14 Nà wuzeɠezu wo laalɔɠɔma,
é zoloo wo-ɠɛɛwotiiti ma,›
Ɠɔoɠɔ GALAGI wooi ɠana,
‹nà abui losu wa-lɔɓɔi ʋa,
toɠa wo-maaɠoolii zu pɛ gala.› »