2
Ɠima nu wolaiti ti zeeli vai Zeluzalɛme
Yesu zɔlɔɔni Ɓɛteleyɛme, Zudé yooi zu, masagi Elɔde ná-siɛgi zu. Naa ʋoluma ɠima nu wolaiti ti zeɠeni folo ɠulazu ʋelei yooiti su, ti ʋa Zeluzalɛme. Ti gaazaɠagi woni, ti ɠɛ ma: «Mini ɠa Zuifuiti ta-masagi ná, nii sɔlɔɔga niinɛi? Tɔɔzei gi ná-somideɠai ʋɛtɛgɛ folo ɠulazu ʋelei, naa ɠa é kɛa gi ʋaai nɔkɔsu bɛ.»
Siɛgi zu masagi Elɔde naama wooi mɛnini da, ziiɓɔlɔni gola, ta Zeluzalɛme nuiti pɛ. É Zuifuiti ta-zalaɠa ɠula ɠundiɠiiti pɛ gaalɛɛni ba, ta tɔ kalamɔinti, é ti ɠaazaɠa Kilista zɔlɔɔsuʋɛ ma. Ti gooɠaaʋoteni, ti ɠɛ ma: «Ɓɛteleyɛme ʋe, Zudé yooi zu, tɔɔzei naa ɠa GALA goo wo nui sɛʋɛai ga:
‹Ɗa ɓalaa, ɗɛi è ga Ɓɛteleyɛme, è Zuda yooi zu,
gaamazu è la lɔini Zuda laa wolaiti saama.
Tɔɔzei è ʋɔ bɛ ɠa totuɠɔi a zɔlɔɔ ná,
nii a zɔɓela zo nà-nuɓusɛi Izilayɛle ma.›*»
Elɔde zɛba é ɠima nuiti toli dɔɔɠuzu ga naati ti yeeɠɛɠalai ɠiteɠitegi wo ma, nii somideɠai ɠulani ma. Naa ʋoluma, é ti leʋeni Ɓɛteleyɛme, é ɠɛ ti ma: «À li, wo doungoi ná-faiti buuʋɛtɛ ga pagɔ. Wa kaana, à ʋa, wo bo mà, naa ɠa a kɛ nà ɓalaa gè li, gè nɔkɔ bɛ.»
Siɛgi zu ti ɓeni la ga masagi wooi mɛni, ti pele zoni. Somideɠai nii ti kaani folo ɠulazu ʋelei, naa loni ti luɠɔ. É zeelini naama adɛ maazuʋɛ, ʋɛ doungoi ɠɛni ná, é lo. 10 Siɛgi zu ti somideɠai ɠaani la loni, ti wola ɠoozunɛɛni. 11 Ti lɛɛni pɛlɛi wu, ti doungoi ʋɛtɛ ta dee Mali. Ti nɔkɔni bu. Naa ʋoluma, ti ta-ɠasɔiti maavieni, ti sabai ve ga zanugi, ta ansansegi, naa ʋɛɛ miilegi ʋa. 12 Naa ʋoluma, tɛi GALA ge ti lɛnɛni segi zu ga ti mina ɠale ma ga Elɔde ʋɔ pelei, ti liini ta-yooi zu ga pele ɠili.
Yesu maaʋela vai ti lii la Ezipete
13 Siɛgi zu ɠima nu wolaiti ti liini la, Maliɠii ná-geezuɠeelai gila ge ɠulani kɛlɛma Zozɛfe ʋɛ segi zu, é ɓɔɛ pɔ, é ɠɛ ma: «Wuzeɠe, è doungoi zeɠe ta dee, è ʋela ga tiye Ezipete yooi zu, miná ɠa è yɛsu ná, eyɛsu yeei gè ɓɔɛzu la ʋolu è ʋɔ. Tɔɔzei Elɔde ɠa doungoi ʋaa ɠeleɠele gaiziɛzu.» 14 Naa ɠa é kɛɛni Zozɛfe wuzeɠeni kpidii, é doungoi zeɠe ta dee, é ʋela ga tiye, é li Ezipete yooi zu. 15 É yɛni ná eyɛsu Elɔde za, naa ɠa a kɛ Maliɠii wooi ʋilɛsu, nii GALA goo wo nui boni ga: «Gè dòun zunui loliga ga é ɠula Ezipete yooi ʋa.»
Ɓɛteleyɛme loungoiti paa vai
16 Elɔde kaai ma ga ɠima nuiti ti gaaʋɛa, é wola yiiɠaawanani. É devei veeni ga ti zunu loungoiti pɛ paa Ɓɛteleyɛme taazuʋɛ ta ná maaɠoolii zu, niiti pɛ ti kona felegɔ zɔlɔɔgai na, é yei bu, é zoloo yeeɠɛɠalai ma nii ɠima nuiti ti dɛɛni la. 17 Ʋele ɠana naama wooi ʋilɛni la su, nii GALA goo wo nui Zelemi boni ga:
18 «Woo ɠa mɛnisu Lama,
kpee wooiti, ta gɔlɔ woo mɔinmɔingiti.
Lasɛle ɠa é ná-dointi saa wɔlɔi wosu,
é la kɛɛni gaa ʋa nɛɛnɛ,
mazɔlɔɔ ti la mɔ ná.»
19 Elɔde zaai ma, Maliɠii ná-geezuɠeelai gila ge ɠulani kɛlɛma Zozɛfe ʋɛ segi zu Ezipete. 20 É ɠɛni ma: «Wuzeɠe, è doungoi zeɠe ta dee, è ɠale ma Izilayɛle yooi zu, tɔɔzei zɔiti doungoi undaaʋili wɔin ɠɛa ti ma, naati ti zaa.»
21 Zozɛfe wuzeɠeni, é doungoi ta dee zeɠe, é ɠale ma Izilayɛle yooi zu. 22 Kɛlɛ é mɛnigai ma ga Aalakelayuse ɠa masadai ɠɛɛzu Zudé yooi zu kɛɛɠɛ Elɔde ʋotogi zu, é luani ga dii vai ná. Tɛi GALA ge tɛnɛni segi zu, é liini ga Galilé yooi zu ʋele. 23 É zei taa wolai ta zu nii daaseigi ga Nazalɛte, naa ɠa a kɛ naama wooi ʋilɛsu, nii GALA goo wo nuiti ti boni ga: «Daaseigi ɠa ɠɛ ga Nazalɛte nui.»
* 2:6 Mis 5:1. 2:15 Woz 11:1. 2:18 Zel 31:15.