Neɠemi
Ná-Sɛʋɛi
Sɛʋɛi lɔɔzeizuʋɛ ma woo mɔungiti
Ɛsedalase ta Neɠemi ta-zɛʋɛiti ta faiti suɠulazu, niiti ti leʋegai siɛgi zu zobogi veeni la Izilayɛle nuiti zea ga ti ɠale ma ta-yooi zu, ti ɓega ʋoluma ga li ga tiye duɔlai zu Pɛɛlese ta Ɓaɓilɔne. Neɠemi ná-kisiɛi pɛ gaaʋoteni siɠigiti to fai ʋa ʋolu Zeluzalɛme maaɠoolii zu. Faaɠwɛ nu mɔinmɔin daaʋɛ da ga Ɛsedalase ɠa é Dɔlɔ Sɛʋɛ felegɔiti kɛa ta é ti ɠaalɛ ba, naa ʋɛɛ sɛʋɛi nii ʋa tɔ ɓɔɠɔ daaseigi ba, ta Neɠemi nɔnɔi. Ni Ɛsedalase ɓɔɠɔi la ɠɛni de, kɛlɛ tanisu nu ɠila kpegi nɔ ɠa é naama zɛʋɛiti pɛ gaalɛai ba. Tanisu Neɠemi Ná-Sɛʋɛi ɠɛɛʋɛ kona unnaanigɔ puusaʋagɔi (430) ma yeeɠɛɠalai zu, aisa Yesu ʋa zɔlɔɔ.
Neɠemi ɠa é ɠɛni botii ɠɛɛzu Pɛɛlese masagi Aaletazɛɛlesɛse ʋɛ ga é ɗa naa ná-dɔɔi ʋuu bɛ. É masagi ná-kpɔbai maalolini ga naa vaa bu, é yeeɠɛɠala ve zea, é ɠale ma Zeluzalɛme, nii a kɛ é kpɔba ɠɛ siɠigiti to fai zu ʋolu Zeluzalɛme ma. Aaletazɛɛlesɛse vaani bu ga Neɠemi ɠale ma, é botii naa ɠɛ. Suɠoozaai ma é Neɠemi zeini ga Zuda you zɛʋɛ ɠundiɠii, koʋii nii é Zeluzalɛme maaɠoolii (5:14). Anɛɛ ɓalaa nui tanigaa ti fai pɛ kɛɛni, nii a kɛ ti pele ɓesa Neɠemi luɠɔ ga é mina siɠigiti to ʋolu Zeluzalɛme ma, kɛlɛ botii ɓeni folo ʋuulɔɔlugɔ maazu felegɔ (52) laawu, GALA ná-kpɔbai maaʋele ma. Naa ʋoluma Ɛsedalase ɓɔni Neɠemi ʋa, ti Izilayɛle nuiti kɛʋele ɓɛtɛ, ti ta-minazeɠegi niinɛ ʋolu ti yɔɠɔzu ta GALA.
Unsosuʋɛ
1. Neɠemi ɠaleni ma ʋolu Zeluzalɛme ta é loni botiiti untuɠɔ siɠigiti to fai zu ʋolu Zeluzalɛme ma (1:1—6:19).
2. Izilayɛle nuiti ti tɔɔzeini ga ti ɗa ɲii Zeluzalɛme, ta ti tɔɔzei ga ti ɗa ziɛ ga GALA ná-tɔgiti ʋolu (7:1—13:31).
1
Neɠemi ná-GALA falii
1 Ɠakalia ná-doun zunui Neɠemi ná-faiti siɛ ʋelei ɠa.
Gè yɛni Suze taa wolai zu, masagi Aaletazɛɛlesɛse ná-konagi ʋuufelesiɛi (20) ma masadai zu, alugi naa laawu nii daa ga Kiselɛve.
2 Kɛ̀ɛloin gila, nii daa ga Ɠanani, naa ʋa, é zeɠe Zuda yooi zu ta zunui tanigaa. Gè ti ɠaazaɠani Zuifuiti faa ma, niiti ti ɠalegai ma, ti ɠula duɔlai zu, ta Zeluzalɛme ɠɛʋelei ma.
3 Ti gòoɠaaʋoteni, ti ɠɛ mà: «Duɔ wɔlɔmai niiti ti ɠalegai ma, ti zei Zuda you zɛʋɛi ma, ta ná maanɔɠɔ wolai ta unfegi zaama. Zeɠeiti ta Zeluzalɛme ziɠigi ʋa, ta ma ɓogiti galaʋɛ ga abui.»
4 Gè naama wooiti mɛnigai ma, gè zeini, gè ɗa wɔlɔ, gè yɛni gaazuɠilii zu folo mɔinmɔin daawu. Gè zugi zo, gè GALA fali, nii é geeɠɔlɔgi zu,
5 gè ɠɛ ma: «Ee, Ɠɔoɠɔ GALAGI, ɗɛi è geeɠɔlɔgi zu, GALAGI bɔɔlɔai, maayikiai, ɗɛi è ɗa-minazeɠegi ta ɗa-wooɠɛɠiladai makɛsu naati bɛ ti è nɛɛzu ʋɛ, ti ɗa-leveiti so,
6 woilo kae, è ɠaazuzeɠe ma, è nà-fali wooi ɠaaʋote, nii gè daazeelizu è ma, nɛ̀i gè ga ɗa-wotiɠɛ nui. Nà è valizu niizu kpidi ʋɛɛ folo ʋa, ɗa-wotiɠɛ nuiti bɛ, Izilayɛle nuiti, gè laa zɔ ga ga Izilayɛle nuiti gá-ɠotoiti, nii gi kɛai è laalɔɠɔma, gá mɛ̀mɛwolani.
7 Gi ɓaaɠogɛ è ma gaamazu, gi la ɠoloni deveiti, faa ziɛ ʋeleiti ta tɔgiti bɛ niiti è ti veeni ɗa-wotiɠɛ nui Moize ya.
8 Ɠitoo niima wooi zu, nii è boni ɗa-wotiɠɛ nui Moize ma ga: ‹Ni wa ɠɛna ga wooʋalada nuiti, nà wo vaza zii ɠiligiti saama.
9 Kɛlɛ ni naa ʋoluma wa ɠalena ma pɔ̀, wo nà-tɔgiti so, wo ɗa kɛ, naazu anɛɛ ɓalaa wo maaɠoozaʋɛ geeɠɔlɔgi ɓela ga, nà wo zeɠe ná, gè ʋa ga woye, ʋɛ gè yiimazeɠeai ga ná, ga gè zei ná.›
10 Gá ga ɗa-wotiɠɛ nuiti ta ɗa-nuɓusɛiti, niiti è ti unmɔɔgai ga ɗa-zobo golai ta ɗa-zɛbɛsu yeei.
11 Ee, Màliɠii, soma è woilo falii wooi nii ma, gè daazeelizu è ma, ta nii ɗa-wotiɠɛ nui zɔiti ti daazeelizu è ma, niiti wɔin ti ma ga ti lɛbiya ve è ʋɛ. Va bu za faa ɠaaɠulabai nii gè tɔɔzeizu, naa zoloo, va bu ɓalaa gè gooɠaaʋote pagɔ zɔlɔɔ masagi ya.»
Naama ziɛgi zu, nà ɠa gè ɓena masagi ná-dɔɔi ʋuu bɛ.