GALA Daawoo Zɛʋɛi Neɠemi 2

Neɠemi lii vai Zeluzalɛme

1 É ɠɛni ga yeeta, masagi Aaletazɛɛlesɛse ná-masadai ma ɠona ʋuufelegɔ (20) ma, alugi naa zu nii daa ga Nisan, masagi ɠɛni zeini taɓalii ɠakala, gè ná-dɔɔi ʋuuni, gè fe zea. Gàazuɠilini, tama kaipa gàazu la ɠɛni dɛ ɠilini ɠana gaazu. 2 Masagi zɛba é gàazaɠa, é ɠɛ mà: «Toɠa ɠale è ɠaazuɠiliai ɠani? Ɗa ma, è la zeeɓɛzu. Lee yiizoolɛ ɠa é è ma ɠani?» Gè wola luani názu. 3 Gè masagi wooɠaaʋoteni, gè ɠɛ ma: «Masagi, è lɛbi ɠeke! Leeni vaa zu gàazu la ɠilia, taai nii mɛ̀mɛwolani maaɠuluai su, naa ɠoloɠologai, ma ɓogiti galaai abui ʋɛ?» 4 Masagi gàazaɠani, é ɠɛ mà: «Leeni ɠa è pɔ ga gè kɛ è ʋɛ?»

Gaamago gè geeɠɔlɔgi zu ƓALAGI valini. 5 Naa ʋolu gè ɠɛ masagi ma: «Masagi, ni nɛɛʋɛ è ʋɛ, ta ni ɗa ɗa-nuɓɔɠɔlai makɛsu bɛ̀, nɛ̀i gè ga ɗa-wotiɠɛ nui, tèʋe Zuda you zɛʋɛi ma, taai ná zu ʋɛ mɛ̀mɛwolani maaɠulugai ná, gè li gè to ʋolu.» 6 Masagi ɠɛni zeini, anzai koba zeini, é gàazaɠani mɔnɔ, é ɠɛ mà: «Ɗa yɛsu siɛi ma eyɛsu yeelɛ? Yeelɛ ɠa è ʋaazu la?» Masagi vaani bu, é ɓe bà, gè li, gè galema voloi lɛɛni la.

7 Gè ɠɛni ma ʋolu: «Masagi, soma, è sɛʋɛa ve zèa zou zɛʋɛ ɠundiɠiiti faa ma, niiti ti ziɛ wolai Efelate ʋoluʋɛ munu ʋele, nii a kɛ ti ɓe bà, gè leʋe, gè zeeli Zuda. 8 Sɛʋɛi gila kɛ ɓalaa Azafe ma, nii é wɛlɛzu dɔɓɔi ma masagi ʋɛ, é gului ve zèa, nii a kula ɠɛ pɛlɛ maalɛɛ vai zu, taai makɛ ziɠigi ma ɓogiti kpɛtɛ vai zu GALA sei ʋɛlɛi ɠobaʋɛ, ta taa ma ziɠigi ma ɓogiti, naa ʋɛɛ pɛlɛi ʋa, nii gè ɠɛɛzu ɲiizu bu.» Masagi naama zɛʋɛiti feeni zèa, mazɔlɔɔ nà-GALAGI yee ʋagɔi ɠɛni zɛlɛni màazu.

9 Gè liini ga masagi ná-sɛʋɛi naati zou zɛʋɛ ɠundiɠiiti pɔ, ti ziɛ wolai Efelate folo liizu ʋelei. Masagi salaʋusu ɠundiɠiiti ta soo ɓizɛ zalaʋusuiti pilɛni pòlu ga ti màaza. 10 Sanebalate, Ɠɔlɔnayime nui, ta ná-seikoba Toɓiya, Amɔn nui, ti mɛnigai ma ga nà ga ʋa, ti wola yiiɠaawanani ga nu zɔlɔɔga, nii é ʋaazu é ɠaaɓa Izilayɛle nuiti ta-undaanɛɛi ma.

Neɠemi siɠigiti kɛʋelei ʋɛtɛ fai

11 Sèeliai ma Zeluzalɛme, gè looɠoni folo saʋagɔ laawu. 12 Naa ʋoluma, gè wuzeɠeni ga kpidii, gè la faa nɔpɛ boni nu ma, ga nii nà-GALAGI puuni zìima ga gè kɛ taai ʋɛ, nui tanigaa nɔ ɠa ti ʋilɛni pòlu. Gè la ɠɛni liini ga togani nɔpɛ, kɛni toganii nɔ nii é ɠɛni sèɠezu. 13 Gè ɠulani taai ʋa kpidii ga Pɛtugi Ʋɔ Pele Ziɠidaʋɛ, gè li ga Koʋe Ɗɛungi ʋɔ pelei, ta Kpoɠa Siɠida ʋelei, gè ɠɛni Zeluzalɛme ziɠigiti sumɔsu, gè kaani ga zeɠei ɠa ti pɛ ba, ta abui ma ɓogiti galaʋɛ. 14 Gè liini ga Ziɛun Siɠida ʋelei, ta Masa Kpoigi ʋɔ pelei, kɛlɛ nà-toganii nii gè ɠɛni kɔma, naa la mɔ ɠɛni leʋe pele ɠaazu. 15 Kpidii gè leʋeni ga zeɠezaɠa wolai ʋɔ pelei, gè ɗa siɠigiti sumɔ, naa ʋoluma gè ɠale ma ga Pɛtugi Ʋɔ Pele Ziɠidaʋɛ, ʋele ɠana gè taai maaɠakuni la. 16 Kundiɠiiti ti la ɠɛni kwɛɛ ʋɛ dìai ná, ta nii dìai kɛɛzu, tɔɔzei eyɛsu foloi nuu zeeli, gè la ɠɛni dɛ faa woni Zuifuiti ma, ta zalaɠa ɠula nuiti, ta nu ɓiigiti, naa ʋɛɛ kundiɠiiti ba, ta botiɠɛ nui tanɔpɛ.

17 Gè ɓɔɛni ti ʋɔ ɠani: «À wɛlɛ lɛɛ kpɔlɔi ʋa, nii ade su! Zeluzalɛme ɠoloɠologa, abui ma ɓogiti gala! À ʋa, ade Zeluzalɛme ziɠigiti to ʋolu, naa ɠa a kɛ ade ɠula ɓaaɠulamai nii laawu.» 18 Gè dɛɛni ga tiye ʋelei nà-GALA yee ʋagɔi ɠɛni bà la, ta ʋelei masagi ɓɔɛni la pɔ̀, gè naa wo ti ma. Ti ɠɛni mà názu: «Ade wuzeɠe, ade taai lo!» Ti ɓɔɠɔ iɲɔdɔɔni ga naama wotii ɠɛɛ vai zu.

19 Kɛlɛ Sanebalate, Ɠɔlɔnayime nui, ta ná-seikoba Toɓiya, Amɔn nui, naa ʋɛɛ Gesɛme ʋa é ga Alaɓui, ti mɛnigai ma, ti tɔɔzeini ga ɲɛɛɠula gi zu, ti ɗa gi ʋɛlɛlala. Ti ɠɛni gi ma: «Leeni ɠa wo kɛɛzu ʋɛ? Wa pɔ wo wuzeɠe masagi laalɔɠɔma ɓaa?» 20 Gè gooɠaaʋotegi nii woni ga tiye: «Geeɠɔlɔgi zu ƓALAGI ɓɔɠɔi ɠa é zobogi veezu gi ʋɛ. Gɛi gi ga ná-botiɠɛ nuiti, gá wuzeɠezu, gi taai lo. Kɛlɛ wɔun, maa la nɛɛni wo ʋa ani nɔpɛ sɔlɔɔ Zeluzalɛme. Nu nɔpɛ ge mina ɠizɛ wo zu!»