2
Kilista ná-ɓɔɠɔmaayeii ta ná-bɔɔlɔi
1 Wo la iɲɔdɔɔi zɔlɔɔni wa-ɠilibalai zu wa Kilista ɓaa? Ná-nɛɛbɛi ɠa wo ɠaanɛɛnɛzu nɛi? Kpɔfaama ɠa nɛi wo yɔɠɔzu wa Zɛnvu Ɲadegai? Wo ɠilagilagiti nɛɛbɛ la wo yɔɠɔzu ɓaa, ta maawɔinɠai?
2 Deɠɛmu, à nà-koozunɛɛi laazeeli ga pagɔ, wo zoloo su, nɛɛ ɠilagi nɔ ɠɛ wo zaama, wo ɠili ʋa zɛnvu ɠilagi ta kisiɛ ɠilagi zu.
3 À mina faa nɔpɛ kɛ ga maaɠɔɔ faa, ɓaa nii wa kɛ wo lɔɠɔɠula, kɛlɛ kɛni wo ɓɔɠɔmaayei, wo deve ga zɔiti fizɔgɛ wo ʋa wa ɓɔɠɔi.
4 Wo tanɔpɛ ge mina ɠisiɛ tɔ ɓɔɠɔi ná-faa nɔ zu, kɛni wo ɗa ɠisiɛ ɓalaa zɔiti ta-vaa zu.
5 Kisiɛi é ɠɛni Yesu Kilista ma, naa ɠɛɠalai ɠɛ wo ma:
6 Tɔun kɛʋelei ɠɛni ga GALA kɛʋelei,
kɛlɛ é la ɠɛni naa ʋɛtɛni
ga fai nii a yeeɓata ma.
7 Kɛlɛ, tɔun é ɓɔɠɔ ɠɛʋelei pɛ zɛni ná,
é botiɠɛ nui ɠɛʋelei zeɠe,
é ɠɛ ga nuɓusɛiti kɛʋele,
é dɛɛ ga toɠa ga nuɓusɛi ɠɛʋelei.
8 É vaani bu, é ɓɔɠɔmaayei,
é ɠoloni eyɛsu saai,
é za vɔlɔ saa wului ma.
9 Naa ɠa é kɛai, GALA ge bɔɔlɔai la gola,
é daaseigi ʋɛɛ ba, nii é daaseigi pɛ unda,
10 naa ɠa a kɛ, ɲiibii pɛ ge nɔkɔ pilɛ Yesu laaseigi wɔɔlɔ vai ma,
niiti ti geeɠɔlɔgi zu, ta zooi ma, ta zooi wu,
11 ta nɛgi pɛ ge la ga, ti ɠɛ ma:
«Yesu Kilista ɠa é ga Maliɠii,»
Ɠɛɛɠɛ GALA ná-lɛbiyai ma vaa ma.
Kidaaleʋe nuiti tosuʋɛ eteai zu
12 Naa ɠa é ba, nɛ̀ɛɲɔɠɔiti, wo ɠɛni woozogi ɠɛɛzu yeenɔpɛ, siɛgi zu gè ɠɛni la wo ʋɔ bɛ, à wa-ɠizo fai ɠula kɛlɛma ga botii, wo lua GALA ba unfemai zu, é la nɔ ga kɛ̀ai ma wo ʋɔ bɛ, kɛlɛ anɛɛ niizu mɔnɔ pòluʋelei.
13 Mazɔlɔɔ GALA ka botii ɠɛɛzu wo yiima, é ziimai ta zobogi ve wo ʋɛ, wo naati daazeeli, eɠɛʋelei tɔ ɓɔɠɔi ná-faazeikpasui la.
14 À faiti pɛ kɛ, unsuyeli mina ɠɛ su, maaɠaali mina ɠɛ su,
15 ga peelalazu mina ɠɛ wo ʋa, wo ɲade, wo ɠɛ ga GALA dointi, kɔzɔzu la ti ʋa, sɔletala nuɓusɛi niiti saama, ti ga yaava nuiti. À volo ti zaama eteai zu eɠɛ wozakalagi,
16 wo ɗa li ti ʋɔ ga zɛnvui ma wooi. Naa ɠa a ɠɛ ga nà-lɛbiyai ma ungi Kilista ná-foloi, naa ɠa a dɛɛ ga gè la ɠɛni ɓizɛni wafuun, gè ʋa botii ɠɛ wafuun.
17 Anɛɛ ni nà ɠɛɛzu ga puya zalaɠai, é ɓɔ zalaɠai ʋa, wa-ɠidaaleʋei feezu GALA zea, kòozunɛɛʋɛ, nà wo ʋɔɔpɛɛzu nà-koozunɛɛi ʋa.
18 Zenɔ ɠana é la, wa ɓalaagi wo maanɛɛʋɛ wo ɠoozunɛ, wo nà ɓalaa pɔ̀ɔpɛɛ wa-ɠoozunɛɛi ʋa.
Timɔte ta Epafolodite
ti leʋe fai siɛi ma
19 Toɠa kìsu ga Maliɠii Yesu a laana ga, su mina mɔ ɠooza, gè Timɔte leʋe wo ma, naa ɠa a kɛ a ɠalena ma, é wo-maawooiti bo mà, ìɲɔ ge lɔ.
20 Mazɔlɔɔ nu nɔpɛ ge la zèa ʋɛ, gi-ɠigi ga ɠɛʋele, nii a yiizoolɛ gola ga wa-vaa.
21 Ti pɛ ta ta-undaanɛɛi nɔ ɠaiziɛzu, ti la Yesu Kilista nɔnɔ ɠaiziɛzu.
22 Wo kwɛni ga Timɔte losuʋɛ ɠulaʋɛ kɛlɛma, ʋelei gi botii ɠɛɛni la ʋɔɔma gá tɔ, eɠɛ doun ta kɛɛɠɛ, Woo Niinɛ Ʋagɔi ma wotii zu.
23 Nà ɠisiɛzu ga gè teʋe wo ma, siɛgi zu nɔ feya gè nà-faiti kɛʋele ʋɛtɛsu da ga pagɔ.
24 Dàaʋɛ da Maliɠii zaɓui zu, ga nà ɓɔɠɔi ɓalaa, su la mɔ ɠoozazu, gè ʋa wo ʋɔ bɛ.
25 Gè deveʋɛ ga gè kɛ̀ɛloin Epafolodite leʋe wo ma, gá tɔ ɠa gi botii ɠɛɛzu ʋɔɔma, gi kɔɔi ɠɔ ʋɔɔma, wa-ɠeelai wo teʋeni mà, é ʋa pɔ̀ ga wa-ɓɔbai màavaiti faa zu.
26 Wɔin ɠɛni ma gola ga é wo pɛ wo ʋɛtɛ. Ziiɓɔlɔni gola, tɔɔzei wo ná-seeɓɛi ma woo mɛnini.
27 É zeeɓɛni gola, ná tago é ʋa za, kɛlɛ GALA ge maawɔinɠaani. Tɔ ɠila nɔ laade, kɛlɛ nà ɓalaagi, nii a kɛ gè mina lɔ mɔnɔ ziiɓɔlɔ wolai zu.
28 Naa ɠa é kɛai, gè ɠaaɓaa, gè teʋe fala wo ma, wa kaana, wo ʋa ɠoozunɛ, naa ɠa a kɛ, nà ɓalaagi nà-ziizoolɛi ta zeɠe ba.
29 À suzo ga pagɔ koozunɛɛi zu, tɛi é ga Maliɠii nɔnɔi, wo unfemai ve naa ɠɛɠala nuiti bɛ,
30 mazɔlɔɔ é ɠɛnina saai maazɔlɔɔsu Kilista ná-botii ma vaa zu, é ɠikulani zɛnvui zu, é ʋa kpɔbai ɠɛ bɛ̀, nii wa ɓɔɠɔi wo la ɓena zoo kɛɛzu.