11
1 Ɠɔoɠɔ GALAGI maaɲɛɛi ɠa ga zɛɛ ɠɔɠɔ bo ganiiti,
kɛlɛ kiloiti ti laazeeliai, naati nɛɛʋɛ bɛ.
2 Wasogi ʋolu anii ɠa é ga wɔinzeɠemai,
kɛlɛ ɠimalai ɠa loni ɓɔɠɔmaayei nuiti kobaʋɛ.
3 Ladalai ɠa loni sɔle nuiti tuɠɔ,
kɛlɛ yaava nuiti ta-woyai ɠa ɗa lati, é ti ɠoloɠolo.
4 Naavoloi la levea ga ani nɔpɛ, tukpɔɠaaleʋe voloi,
kɛni telebodai ɠɛɛ vai nɔ ɠa a nu ɠizo saai ma.
5 Telebo nui ná-ladalai ɠa ɗa ná-eteai zɔle,
kɛlɛ faa ɲɔu ɠɛ nui ɓɔɠɔ vaa ɲɔi ɠa a ɗa too.
6 Telebo nui ná-sɔlegi ɠa ɗa kizo faaɓaagiti ma,
kɛlɛ woovele nuiti koozu ɠisiɛi ɠa ɗa ɠɛ ga balii, ti ɠɔɔ la.
7 Siɛgi zu nu ɲɔi zaazu la, ná-kitogi pɛ ge ɠoloɠologa,
ná-kitogi é ɠɛni ga naavoloi, naa loa ya.
8 Telebo nui ɠa ɠula kidaaʋiligi zu,
faa ɲɔu ɠɛ nui ʋilɛ potogi zu.
9 Nui é ɠɛlɛzu GALA ba, naa ɠa ɗa zɔiti koloɠolo ga daawooiti,
kɛlɛ telebo nuiti ɠimalai ʋɔ, ta ɠizo.
10 Siɛgi zu telebo nuiti undaanɛɛzu la, taai kpein koozu ɠa ɗa nɛ,
siɛgi zu faa ɲɔu ɠɛ nuiti undaaʋilisu da, nuiti ta ɗa wooɠula ga koozunɛɛi.
11 Sɔle nuiti daa luyai ɠa ɗa ʋa ga ɓɔɠɔzɔlɔɔgi ta-laazuʋɛ.
Kɛlɛ faa ɲɔu ɠɛ nuiti daa ɓɔɛi ɠa ɗa koloɠolo.
12 Zɔi é seiɲɔɠɔi ʋɛlɛʋilisu, naa la ga faaɠaaɠaa nu,
kɛlɛ nui nii é faa ɠaaɠaazu, naa ɠa ɗa maaɠɛ kpɔ.
13 Fama wo nui ɠa ɗa dɔɔɠuzu vaiti kula kɛlɛma,
kɛlɛ sɔɓelama nui ɠa ɗa ti makɛ ɠoozu.
14 Siɛgi zu totuɠɔ ʋagɔ la zooi ʋɛ la, nuɓusɛiti ta ɗa loo bu,
kɛlɛ kizogi ɠa ɗa zɔlɔɔ tɛnɛ bo nu mɔinmɔingiti zea.
15 Zɔi é yeelaazu wɛɛn maaɠuyei ɠa, toɠa ɓaa ma,
kɛlɛ zɔi é ɠɛlɛzu zeelaga vai ʋa, naa ɠa ɠɛ ziilɛigi zu.
16 Anzanu ʋagɔi ɠa ɗa lɛbiyai zɔlɔɔ,
suɓa zunuiti ti naavoloi zɔlɔɔ.
17 Zunui é nuɓɔɠɔlai ɠɛɛzu, naa ɠa kɛɛzu ɓɔɠɔ nɔ ʋɛ,
kɛlɛ suɲɔu zunui ɠa ɓɔɠɔ maanɔɠɔzu.
18 Faa ɲɔu ɠɛ nui ɠa ɗa yaava lɔnɔgi ɠaiziɛ,
kɛlɛ zɔi é telebodai ɠɛɛzu, naa ɠa ɗa zala ɠitei zɔlɔɔ.
19 Zekana, telebodai ɠaaɓelazuʋɛ ɠa ga zɛnvui,
kɛlɛ zɔi é ʋilɛsu faa ɲɔi ʋolu, naa ɠa saai laaɠomisu.
20 Ɠɔoɠɔ GALAGI la wɔinni ga naati, niiti ti-yiimaʋɛ laavegai ga yaavai,
kɛlɛ toɠa losu naati polu, niiti ti ziɛzu ga sɔledai.
21 Gaamazu, faa ɲɔu ɠɛ nuiti salalalai la yɛga,
kɛlɛ telebo nuiti ti-mavofodaiti ta ɠizo.
22 Anzanui nii pagai, kɛlɛ balagai ɠigi ma,
kɛɛʋɛ eɠɛ zanu balaɠaegi piligai boigi zokpai ʋa.
23 Telebo nuiti wɔinma vaa ɠila kpegi nɔ ɠa faa ʋagɔi.
Nii nɔ faa ɲɔu ɠɛ nuiti ta zoo ti ɠito ba, naa ɠa nɔ ga GALA ná-ziiɠaawanai.
24 Tanigaa ta ɗa faanɛɛi ɠɛ gola, tama ti ɗa wola ɓɛtɛ.
Tanigaa ma ti ɗa ɠikpa naavoloi ma gola, tama ti ɗa ʋala.
25 Faanɛɛ ɠɛ nui ɠa ɗa sɔlɔɔgi wo gola,
zɔi a nu ɠɔ ga kpɔɔleɗɛi, tɔ ɓalaa ka kpɔɔleɗɛi zɔlɔɔ.
26 Nuɓusɛiti ta ɗa molo makɛ nui voovo, zɔi é ɠɛɛzu, é ʋa pɔdi ga daaɓaai,
kɛlɛ ta ɗa tuya loo naa ʋɛ, nii é liizu la ga é pɔdi.
27 Zɔi é faa ʋagɔi ɠɛɛ vai ɠaiziɛzu, naa ɠa ɗa undaanɛɛi zɔlɔɔ,
kɛlɛ zɔi é faa ɲɔi ɠaiziɛzu, faa ɲɔi ɠa ɗa zeeli naa ma.
28 Zɔi a ʋoluzei ná-naavoloi ʋa, naa ɠa loo bu,
kɛlɛ telebo nuiti gaa ɠa wɔɔlɔ eɠɛ gulu wola, nii gaalaagi mɔinɗai.
29 Zɔi a gooɠaavazagi lɔɔna ná-pɛlɛyeɠei wu, toɠa sulɔnɔgi zɔlɔɔ ga fiilɛ wolai,
faaɠaaɠaalala nui ɠa ɠɛ ga ɠima nui ná-duɔi.
30 Telebo nui ná-kɛɛwotiiti ta ga zɛnvu wului,
ɠima nui ɠa ɗa nui taɠiligaa ʋilɛ pele ʋa.
31 Ni telebo nui ɠa zalai zɔlɔɔsu gaamanɔ eteai zu,
koleʋɛ ɓalaa ga, faa ɲɔu ɠɛ nui ta kotoba nui, ta ti-zalai zɔlɔɔ!