12
1 Zɔi nɛai bɛ ga maaɠolo, faaɠwɛgi wɔin ɠa naa ma,
kɛlɛ zɔi zelilomai ɠaawanazu la, naa la ɠeleɠeleni.
2 Nu ʋagɔi ɠa ɗa Ɠɔoɠɔ GALAGI ná-undaanɛɛi zɔlɔɔ,
kɛlɛ Ɠɔoɠɔ GALAGI ɠa ɗa naama nui ʋeelala, nii é kisiɛ ɲɔiti bosu.
3 Suɲɔu vai la ɗa ga nui losu ɓɛtɛa,
kɛlɛ zɔi sɔlegai naa lɔɔ la ɠulaa.
4 Ziilɔɔ anzanui ɠa ɗa sinigi nɔungi wuzeɠe,
kɛlɛ anzanui é unfetala vai ɠɛɛzu, toɠa sinigi ʋa ga kae wana zeeɓɛi.
5 Telebo nuiti ta-ɠisiɛiti ta faa zɔle faiti nɔ ʋa,
kɛlɛ faa ɲɔu ɠɛ nuiti siɛ ʋelei ɠa nɔ ga yaavai.
6 Faa ɲɔu ɠɛ nuiti daawooiti ta ga baliiti ti nui ʋaazu,
kɛlɛ telebo nuiti daawooiti ta ɗa ti ɠizo.
7 Faa ɲɔu ɠɛ nuiti ta lokana, ti la mɔ ɠɛa ná!
Kɛlɛ telebo nuiti ta-ʋɛlɛi ɠa yɛ loni kpaan.
8 Nui ɠa ɗa maamusɛi zɔlɔɔ, é zoloo ná-kisiɛ ʋagɔiti ma,
kɛlɛ zɔi kigi la zɔleni, naa wɔin ɠa zeɠe.
9 Fizɔgɛ nu ɠɛ ga nui zobo ge la bɛ, botiɠɛ nu ɠila nɔ ɠɛ è ya,
è ʋa ɠɛ ga nui tɔɠɔi ɠulaai, kɛlɛ é ʋalasu kɔnɔgi ma.
10 Telebo nui ɠa ɗa ɠaaɓa ná-toganiiti ma,
kɛlɛ faa ɲɔu ɠɛ nuiti koozu vai ɠa ga gaazumaavɔi nɔ.
11 Zɔi é ná-tii ɠɛɛzu, naa ɠa daamianigi zɔlɔɔ ga bɔɔlɔa,
kɛlɛ zɔi é ʋilɛsu gaaʋalaba vaiti polu, naa ʋalagɛ ɠigi ma.
12 Nu ɲɔi ɠaazu ɠa ɗa ɠula faa ɲɔu ɠɛ nuiti daamiizuʋɛ ʋa,
kɛlɛ telebo nuiti ma zapei ɠa a ɗa gwaa wo.
13 Faa ɲɔu ɠɛ nui ɠa ɗa ɠɔ ga tɔ ɓɔɠɔi ná-zɛɛiti ma ʋalii,
kɛlɛ sɔle nui ɠa ɗa ɠula faaɓaagiti kpein su.
14 Nui laawooi ʋɔ, toɠa zoo é undaanɛɛ wola ɠaalɛ ba,
eɠɛʋelei nu a ɗa ná-botii ma zalai zɔlɔɔ da.
15 Ɠimalala nui ná-pelei zɔlegɛ tɔ ɓɔɠɔi ɠaazu,
kɛlɛ ɠima nui ɠa ɗa woilo zɔiti tɛnɛ gooi ma.
16 Ɠimalala nui ɠa ɗa ná-ziiɠaawanai ɠula kɛlɛma gaamago nɔ,
kɛlɛ ɠima nui ɠa ɗa ná-daazuɠɔli vaiti buuɓɔle.
17 Nui é gaamai ɠulazu kɛlɛma, naa ɠa telebo fai lɛɛzu,
kɛlɛ zɛɛ zeelei ɠa ɗa yaavai ɠɛ.
18 Kpɔɛzuɠula ɲakaiti ta ɗa maawanai wo eɠɛ boɠa zɔkpɔi,
kɛlɛ ɠima nuiti daawooi ɠa ɗa ʋa ga kɛdɛyai.
19 Gaama nui ɠa yɛ ná ɠɔ,
kɛlɛ zɔi é zɛɛi wosu, naa la lɛbiga.
20 Niiti ti faa ɲɔiti kpɛtɛzu, naati ziimaʋɛti daavegɛ ga yaava vaiti,
niiti ti nuiti tɛnɛsu ga faa ʋagɔi, naati ta ɗa koozunɛɛi zɔlɔɔ naa zu.
21 Maanɔɠɔ nɔpɛ ge la zeelia telebo nui ma,
kɛlɛ kpɔlɔi ɠa ɗa ɠɛ faa ɲɔu ɠɛ nuiti unma.
22 Ɠɔoɠɔ GALAGI la wɔinni ga zɛɛ wo nuiti,
kɛlɛ toɠa gaama wo nuiti polu.
23 Ɠima nui la ɗa ga ná-faaɠwɛgi zulɛa,
kɛlɛ ɠimalala nui ɠa ɗa zeze ga ná-faaɠaaɠaalalai.
24 Niiti ti botii ɠɛɛzu gola, naati ta ɗa lo faa wolaiti untuɠɔ,
kɛlɛ ɲaka nuiti ta ɗa lɔ duɔlai zu.
25 Ziizoolɛi a ɠɛna nui yiimaʋɛ, toɠa ɗa vɔ,
kɛlɛ iɲɔdɔɔ ɓɔɛi ɠa ɗa nui ɠoozunɛ.
26 Telebo nui ɠa ɗa ɠɛ ga ʋelela ʋagɔ bɔɔlaiti bɛ,
kɛlɛ faa ɲɔu ɠɛ nuiti siɛ ʋelei ɠa ɗa ti ɠaka.
27 Sua ɓɛ nui nii dɔɔʋɛai, naa la sua zɔlɔɔga, é ʋa gee.
Faa ʋagɔi, nii pagai ti pɛ ba nuɓusɛi ná-faa zu, naa ɠa ga é ɠɛ ga botiɠɛ nu.
28 Ʋɛ telebodai ɠɛɛzu ná, miná ɠa zɛnvui ná,
naama ʋelei ɠa nu ɠizosu saai ma.