13
1 Ɠima loun zunui ɠa ɗa ɠizɛ maaɠoloi zu, kɛɛɠɛ bogai la,
kɛlɛ waso doun zunui la ɗa ga woiloga zeliloma ɠila kpalaa ma.
2 Ɗa zoo è ani ʋagɔiti sɔlɔɔ ga nu laawooiti maaʋele,
kɛlɛ faa ɲɔu ɠɛ nuiti ta-etea ziɛi ɠa ga toomai.
3 Zɔi a dama ga daawooiti, naa ɠa zɛnvui makɛsu,
zɔi é kpɔɛi wola zuɠulazu, é la ɠidaazu bu, naa ɠa ɗa ɓɔɠɔ loo ya.
4 É la faa ʋaa dɔɔʋɛ nui ma, gaazu ʋa ɠula ani ʋa,
kɛlɛ botiɠɛ nu wolai ɠa ɗa naa zɔlɔɔ, nii wɔin ma.
5 Telebo nui ɠa ɗa zɛɛ ɓɔɛiti wɔinzeɠe,
kɛlɛ nu ɲɔi ɠa ɗa unfe fai ɠɛ, ta tɔɠɔ ɠoloɠolo fai.
6 Zɔi é siɛ ʋelei zɔlegai, telebodai ɠa ɗa naa makɛ,
kɛlɛ faa ɲɔi kotoba nuiti ti kɛɛzu, naa ɠa a ɗa ti undaaʋili.
7 Tanigaa ta kɛɛzu eɠɛ ta ɓɛtɛ, tama ani nɔpɛ ge la ti ya,
tanigaa ti ɓɔɠɔ ɠɛ eɠɛ bala nu, kɛlɛ anii ti ya ga gola.
8 Tanisu naavolo nui ɠa ɗa ani zala, é ʋa zɛnvui unmɔɔ,
kɛlɛ bala nu la woiloga zeliloma ma.
9 Telebo nui ɠa volozu, eɠɛ wozakalagi gola volozu,
kɛlɛ faa ɲɔu ɠɛ nui ɠɛɛʋɛ eɠɛ lanboi, nii é zaazu.
10 Sakpegi kpein ka ɠulazu wasogi zu,
ɠimalai ɠa naati zea, niiti ti woilosu tɛnɛgiti ma.
11 Naavoloi nii sɔlɔɔgai ga wuugi, gaa ɠa ɗa ʋala ba,
kɛlɛ nii sɔlɔɔgai vaa, vaa, naa ɠaa ɠa ɗa wɔɔlɔ.
12 Nui ná-kitogi a ɠoloɠolona, toɠa ɗa ziiɓɔlɔ,
kɛlɛ nui yiima vai a ɠɛɛna, naa ɠɛɛʋɛ eɠɛ zɛnvu wului.
13 Zɔi a wooi ʋɛlɛʋilina, naa ɠa suɓoloɠɔmɔ,
kɛlɛ zɔi a devei zona, naa ɠa ma zalai zɔlɔɔ.
14 Ɠima nui ná-kalagi ɠa ga zɛnvu ɗɛungi,
toɠa ɗa kaka faiti kpudɛ nu maazu, niiti ta ɠɛ ga nu zaa vaa.
15 Kɛʋele ʋagɔi ɠa ɗa zaalai la nu ma,
kɛlɛ gaaɓelazu la yaava nuiti ta-ʋelei ʋa.
16 Ɠima nu la faa ɠɛa, ni é la ɠigaiziɛni su,
kɛlɛ ɠimalala nuiti ta ɗa ta-ɠimalala vaiti sulɛ.
17 Keelai ɲɔuɗai, naa ɠa ɗa lɔ maanɔɠɔi zu,
kɛlɛ gooleʋe nui sɔlegai, naa ɠa ɗa faiti suɓɛtɛ.
18 Baladai ta unfegi ɠa naama nui luɠɔ, nii é ɠɛlɛzu maaɠoloi ʋa,
kɛlɛ zɔi a va tɛnɛ gooiti bu, naa ɠa lɛbiyai zɔlɔɔ.
19 Toɠa ga faa ʋagɔ nui wɔinma vai laazeeli,
kɛlɛ ɠimalala nuiti ti la wɔinni ga ti yeeɠula faa ɲɔi zu.
20 Nui é ziɛzu ɠima nuiti polu, toɠa ɗa ɠɛ ga ɠima nu,
kɛlɛ zɔi é zeizeisu ɠimalala nuiti koba, naa ɠa faaɓaagi zɔlɔɔ.
21 Maanɔɠɔi ɠa kotoba nuiti polu,
undaanɛɛi ɠa ɗa telebo nui zala.
22 Zunu ʋagɔi ɠa ɗa poganii yɛ ná mavofodaiti bɛ,
kɛlɛ kotoba nui ná-sɔlɔɔgiti makɛgɛ ga telebo nuiti tɔnɔ.
23 Bala nui ná-woza wogai zu ɠa a ɗa ɠɔnɔgi zɔlɔɔ ná, ga bɔɔlɔa,
kɛlɛ telebotalai ɠa ɗa ɠɔnɔgi ɠoloɠolo.
24 Zɔi é ɠɛlɛzu ná-doun zunui loɠa vai ʋa, naa la nɛɛni bɛ,
zɔi é nɛɛzu ʋɛ, naa la inɛinɛga maaɠolo vai ʋa.
25 Telebo nui ɠa ɗa daami wo, ziila,
kɛlɛ faa ɲɔu ɠɛ nuiti koozu ɲakai ɠa ɗa yɛ de.