104
Mamagi ɠa anii kpein kpɛtɛ ƓALAGI ʋɛ
1 Nà-nuɓusɛlai pɛ ge Ɠɔoɠɔ GALAGI maamusɛ!
Ɠɔoɠɔ GALAGI, nà-GALAGI, è wɔɔlɔʋɛ kwɛ ge la ba.
È maaɠiliʋɛ, è ɗa volo ga maayikii.
2 È ɓɔɠɔ maaɠiliʋɛ ga wozakalagi eɠɛ seɠei.
È geeɠɔlɔgi zuvie eɠɛ seɠe ʋɛlɛi.
3 È è-zeizuʋɛ loni geezuʋɛ ziɛiti maazuʋɛ,
ɗa ɗa tonaɓiingiti kɛ ga ɗa-ɠɔɔɠɔ wotoloiti,
è fiilɛi ɠɔma, é ɗa li ga ɗe.
4 È fiilɛi ɠɛ ga ɗa-ɠeelai,
è abuzogiti kɛ ga ɗa-wotiɠɛ aniiti.
5 È eteai loni ma wuulaagiti maazu kpaan,
nii a kɛ é mina ɲiikpi eyɛsu pɛ.
6 È maaɓɔleni ga kpoloɗɛi, eɠɛ seɠei,
ziɛiti ti gizeiti maaɓɔleni.
7 Siɛgi zu è zelii loni da ziɛiti ma, ti ʋelani,
ti ɓizɛni è-wooi ʋa, nii é ɠɛni eɠɛ tona ɓunɛ tugi,
8 ti lɛɛni gizeiti ma, ti yei nɛmɛiti su,
eyɛsu ti zeeli adaʋɛ, ʋɛ è ná leʋeni ti ʋɛ.
9 È ziɛiti kwɛgi laaʋɛ, nii ti la ɓudɛa maazu eyɛsu pɛ,
naa ɠa a kɛ, ti mina ʋa, ti ʋa eteai maaɓɔle mɔnɔ.
10 Ɗa ɠa è ziɛungiti ma ɗɛiti zeizu pɛtugiti su,
ti ɗa yei gizeiti zɔɠɔzuʋɛti.
11 Miná ɠa dɔɓɔ zuaiti kpein ta ɗa ʋa, ti ɓɔɔle ná,
ná ɠa dɔɓɔzu zoovalegiti ta ɗa ʋa, ti ɓɔɔle ná.
12 Wɔniiti ti laɠagiti to ná ɠobaʋɛ,
ti ɗa guyeiti too, ti ʋuuni guluiti su.
13 È-zeizuʋɛ geezuʋɛ, miná ɠa è tonai zeɠezu ná, é ʋu gizeiti ma,
è eteai laave ga ɗa-ɠulanumai, nii é ga è-yeei ná-botii.
14 Ɗa ɠa è tufai ʋɔnɔsu toganiiti bɛ, ta siinziin ganigiti nuiti ti botii ɠɛɛzu ga tiye.
Zekana ti-laamianigi zɔlɔɔsu da zooi ʋa,
15 ga dɔɔi nii é nuiti koozunɛɛzu,
ta gulɔi nii é ti-ɠaazuʋɛ volozu ga pagɔ,
ta ɓului nii é ti-zuvikɛi niinɛzu.
16 Ɠɔoɠɔ GALAGI ná-guluiti ta ziɛi zɔlɔɔsu ga pagɔ,
Liɓan sɛdele guluiti é ti ziinni.
17 Wɔni goiti ta ʋaazu ti laɠagi lo ti zu,
wɔni é ga sigɔɲegi, naa zeizuʋɛ ɠa ga gului naati su, niiti ti ga sipɛlɛgiti.
18 Dɔɓɔ woliiti ta ɗa ɠɛ gize ɠaaɠoozagiti ma,
fasaiti ti ɠɛ ga foevoegoiti dɔɔɠuzuʋɛti.
19 Ɗa ɠa è alugi ɓɛtɛa, é ɗa yeeɠɛɠalaiti dɛɛ,
foloi daa yeeɠɛɠalai ɠwɛɛ.
20 Ɗa ʋaazu ga kpidii, wɛlɛ kuai ɠa,
dɔɓɔzu aniiti kpein ta ɗa botii ɠɛɛ la,
21 zala ɓokpagiti ta ɗa zikɔ niina ta-laamianigiti polu,
ti ɗa ti-laamianigi ɠaiziɛ GALA zea.
22 Siɛgi zu foloi ɠulazu la, ta ɗa ɠaaɠale ma,
ti li ti la ta-yeɠeiti su.
23 Nui ɠa ɗa ɠula, é li ná-tii ɠɛɛzuʋɛ,
é yɛ ná-botii ma, eyɛsu kpɔkɔi zeeli.
24 Ee, Ɠɔoɠɔ GALAGI, ɗa-ɠɛɛwotiiti wola mɔinʋɛ!
È ti pɛ kpɛtɛʋɛ ga ɠimalai, eteai zulaavegɛ ga ɗa-ɓɛtɛanii.
25 Kpoloɗɛ wolai ʋɛtɛ, nu la kpela kaa,
fuluaniiti ti bu, nu la ti-lie kwɛɛga, ma wolaiti ta ma goiti,
26 ɓatoiti ti ɗa ziɛ ga,
ta ziɛ wu zua maayikiai,
nii è kpɛtɛai ga é ɗa ɠaɠo ná.
27 Fuluanii naati kpein kitogɛ ɗa nɔ è ʋa,
ga è ti-laamianigi ve ti ya, ma yeeɠɛɠalai ma.
28 Ɗa feena ti ya, ta ɗa seɠe,
ɗa yeaviena, ta ɗa yiɠo ga ani ʋagɔi naati.
29 Kɛlɛ ɗa ʋoluavena ti ʋa, ti zasu ɠa ɗa ɓali,
ɗa fiilɛi ɠulana ti ya, ta za,
ti ɠale ma, ti ɠɛ ga fufiligi.
30 Ɗa ɗa-viilɛi leʋena, ta ɓɛtɛ,
è zooi ɠaaʋɛ niinɛ ʋolu.
31 Ɠɔoɠɔ GALAGI ná-lɛbiyai yɛ ná ɠɔ!
É ɠoozunɛ ná-kɛɛwotiiti saama!
32 A ɠaazulona eteai ʋa, zooi ɠa ɓali,
a vɔɔɠuna gizeiti ba, ta ɠala.
33 Nà pɔ gè ɗa guyei loo Ɠɔoɠɔ GALAGI ʋɛ, nà-eteai pɛ su,
nà guyei loo nà-GALAGI ʋɛ, sìi ma voloi pɛ su.
34 Nà-kidafaawu wuyei nɛ tɔun bɛ!
Nɔ̀un nà, nà ɠoozunɛɛzu Ɠɔoɠɔ GALAGI ʋɔ.
35 Kotoba nuiti ti ɠula eteai ʋa!
Faa ɲɔu ɠɛ nu mina mɔ ɠɛ ná!
Nà-nuɓusɛlai pɛ ge Ɠɔoɠɔ GALAGI maamusɛ!
À Ɠɔoɠɔ GALAGI maamusɛ!