135
Maliɠii ʋagɛ
1 À Ɠɔoɠɔ GALAGI maamusɛ!
À Ɠɔoɠɔ GALAGI laaseigi maamusɛ,
À maamusɛ, Ɠɔoɠɔ GALAGI ná-botiɠɛ nuiti,
2 wɔi wo losu Ɠɔoɠɔ GALAGI zei ʋɛlɛi wu,
ada-ƓALAGI zei ʋɛlɛi ma ɠoizuʋɛti.
3 À Ɠɔoɠɔ GALAGI maamusɛ,
mazɔlɔɔ Ɠɔoɠɔ GALAGI ʋagɛ.
À daaseigi lɛbi ga guyeiti,
mazɔlɔɔ fizɔgɛ nu nɛɛ ʋɛ.
4 Ɠɔoɠɔ GALAGI yiimazeɠeni ga Zakɔɓe,
é ɠɛ Izilayɛle ɠɛ ga kpɔɠɔ gele.
5 Ungo, gè kwɛɛ gè ɠɛ Ɠɔoɠɔ GALAGI wɔɔlɔʋɛ,
ade-Maliɠii ɓudɛʋɛ gala kiligiti pɛ maazu.
6 Nii nɔpɛ Ɠɔoɠɔ GALAGI pɔ, naa ɠa a ɗa kɛ,
geeɠɔlɔgi zu, ta zooi ma,
kpoloɗɛi ɠaaʋɛ, ta kpomaʋɛti.
7 Toɠa ɗa tonaɓiingi wuzeɠe zou ɓela ga ná pɛ,
é mainmain zaɠa tonai zaamaʋɛ,
é fiilɛi ɠula ná-ani makɛsuʋɛ.
8 Toɠa ɓalaa é doun zunu mɔungiti pɛ paani Ezipete yooi zu,
é zo nuɓusɛiti tɔnɔiti ma, é li suaiti tɔnɔiti pɔ.
9 É poogiti dɛɛni, ta maaɓɛlɛ vaiti Ezipete yooi zu,
Falaɠɔn laalɔɠɔma ta ná-botiɠɛ nuiti pɛ.
10 É zii ɠiligiti ma mɔinmɔin koloɠoloni,
é zobobɛ masa golaiti paani:
11 naa ɠɛni ga Siɠon, Amool nuiti ta-masagi,
ta Wɔge, Ɓasan nuiti ta-masagi,
ta Kanaan yooi zu masagiti kpein.
12 É ta-yooi ɠɛɛni ga tɔnɔ,
é naa veeni ná-nuɓusɛiti zea, Izilayɛle nuiti.
13 Ɠɔoɠɔ GALAGI, è-lɔɠɔi ɠa ná eyɛsu ɠɔ.
Ɠɔoɠɔ GALAGI, zeema la woga è ma, yeeɠɛɠalaiti pɛ su.
14 Ungo, Ɠɔoɠɔ GALAGI ɠa sɔle fai ɠɛ ná-nuɓusɛiti bɛ,
toɠa maawɔinɠai ɠɛ ná-botiɠɛ nuiti bɛ.
15 Zii ɠiligiti ta-ɠɔɔɠɔ ganigiti ta ga walii ta zanugi,
niiti nuɓusɛiti ti ti ɓɛtɛai.
16 Daaʋɛ ɠa ti ʋa, kɛlɛ ti la ɓɔɛzu la,
gaazuʋɛ ɠa ti ʋa, kɛlɛ ti la wozaɠaazu la,
17 goiyeɠei ɠa ti ʋa, kɛlɛ ti la faa mɛnisu da,
fiilɛ go ɠila kpalaa ge la ti-laaʋɛ.
18 Ti ɓɛtɛ nuiti kulaʋɛ ga tiye,
ta niiti kpein ti ɠitosu ti ʋa.
19 Izilayɛle mavofodaiti, à Ɠɔoɠɔ GALAGI mama.
Zalaɠa ɠula nuiti, Aalɔn mavofodaiti, à Ɠɔoɠɔ GALAGI mama.
20 Levi mavofodaiti, à Ɠɔoɠɔ GALAGI mama.
Wɔiti wo luazu Ɠɔoɠɔ GALAGI ʋa, à Ɠɔoɠɔ GALAGI mama.
21 Mamagi ɠa Ɠɔoɠɔ GALAGI ʋɛ, é tɔɔzei Siyɔn gizei ma,
Ɠɔoɠɔ GALAGI, ná-masa kpɔkpɔgi zeini Zeluzalɛme.
À Ɠɔoɠɔ GALAGI maamusɛ!