GALA Daawoo Zɛʋɛi Guyeiti 30

È zɛ̀nvui vea zèa ʋolu

1 GALA sei ʋɛlɛi laalao guyei. Davide ná-guyei.

2 Ee, Ɠɔoɠɔ GALAGI, nà è maamusɛzu,

mazɔlɔɔ è kùlaa zeɠe ɓokulagi zu.

È la vaani bu, sìli nuiti ti ʋa ɗa ɲɛɛɠula sù.

3 Ɠɔoɠɔ GALAGI, nà-GALAGI, gè è loligɛ ga è ɓɔ bà,

ɗa ma, è bàloʋɛ.

4 Ɠɔoɠɔ GALAGI, è mɛ̀ɛnni, è kùla saai ya,

è zɛ̀nvui ʋu sù, siɛgi zu gè ɠɛni liizu la kabayeɠei ʋɔ pelei.

5 À guyei loo Ɠɔoɠɔ GALAGI ʋɛ, wɔiti wo bɛ ga wooɠɛɠila nuiti.

À maamusɛ, wo ná-ɲadedai ɠula kɛlɛma.

6 Mazɔlɔɔ ná-ziiɠaawanai la ɗa ga lɛbiga,

kɛlɛ ná-nuɓɔɠɔlai ɠa ná nu zii ma voloi pɛ su.

Ni kpɔkɔi gɔlɔi ɠa é ná,

geelaa ɠa laosu ga koozunɛɛi.

7 Gè ɠɛni ɓɔɠɔ ɠaazu ga nà ziilɛi su, gè ɗa ɠɛ ma:

«Gè la ɲiikpiga eyɛsu pɛ.»

8 Ee, Ɠɔoɠɔ GALAGI, ɗa-nuɓɔɠɔlai ʋɔ, è sɛ̀bɛlɔɔni sèi ɠizei ma.

Kɛlɛ è ʋoluavega bà, gaamanɔ kiteʋei zeelia mà.

9 Ee, Ɠɔoɠɔ GALAGI, gè wooɠulaa è ma,

ee, Màliɠii, gè è maanɛɛnɛ, gè ɠɛ ma:

10 «Ni nà zaana, ni nà yeina kabayeɠei zu,

ɗa-ɠulanumai ɠa naazu ga leeni?

Zɔi é niina ga fufiligi nɔ, naa ɠa zoo ɠale è maamusɛzu?

Toɠa zoo ɠale ɗa-wooɠɛɠiladai ɠulazu kɛlɛma?

11 Ee, Ɠɔoɠɔ GALAGI, woilo, gàazumaawɔinɠa,

ʋa è ɓɔ bà, Ɠɔoɠɔ GALAGI.»

12 È nà-gɔlɔ wooiti faliboga ga kua wogai koozunɛɛi zu,

è saa wɔlɔ wo seɠeiti kula kɔ̀ba, è ti maavalibo ga fɛti ɠula zeɠeiti,

13 naa ɠa a kɛ gè è maamusɛ ga zìimaʋɛ pɛ, gè mina ɓɔlɔ.

Ee, Ɠɔoɠɔ GALAGI, nà-GALAGI, nà è maamusɛ eyɛsu ɠɔ.