31
Dàaʋɛ Ɠɔoɠɔ GALAGI la
1 Guye loo ɠundiɠii nɔnɔi ʋe. Davide ná-guyei.
2 Ee, Ɠɔoɠɔ GALAGI, ɗa ɠa gè lɔɔɠuzu è ʋoluʋɛ,
màkɛ eyɛsu pɛ, gè mina lɔ unfegi zu!
Ùnmɔɔ ɗa-lelebodai zu!
3 Woilo gòoi ma, zuvilɛ è ùnmɔɔ!
Ɠɛ bɛ̀ ga dɔɔɠuzu vasai, ta siɠigi, nii a kɛ gè ɠizo!
4 Mazɔlɔɔ ɗa ɠa è ga nà-fasai, ta nà-siɠigi,
è-laaseigi lɛbi vai ma, ɗa lo tùɠɔ, è ɓɔ bà.
5 Ɗa kùla tumɔi zu, nii ti seiɗai tùɠɔ,
mazɔlɔɔ ɗa ɠa è ga siɠigi é màkɛsu.
6 Nà zɛ̀nvui ɠalivaazu è ma,
ɗɛi è ùnmɔɔni, Ɠɔoɠɔ GALAGI, gaama ƓALAGI.
7 Gè naati wɔinzeɠea, niiti ti ɠilizu zɛɛ zaleiti ba.
Nà ɠalivaazu Ɠɔoɠɔ GALAGI ma.
8 Nà ɠɛ wuulee ga koozunɛɛi, ɗa-wooɠɛɠiladai maaʋele ma,
tɔɔzei è nà-maanɔɠɔi ʋɛtɛga,
è ɠida nà-kidaaʋili fai wu.
9 È la dɔ̀ɔzu sìli nuiti zeezu,
è pìlɛga ɓɔɠɔyeemai zu.
10 Màawɔinɠa Ɠɔoɠɔ GALAGI!
Mazɔlɔɔ nà kidaaʋiligi zu, ziizoolɛi gàazuʋɛ maaʋooloa,
ta zìi ta kpùsɛi kpein.
11 Nà-eteai ɓega taɓai zu,
nà-konagiti ɓalaa ti ɠɛa kpalagi zu,
sùvikɛi ɠula sù, tɔɔzei nà-faaɠaaza golai ʋa,
mà ɠaeiti sumiiʋɛ.
12 Wɔ̀inzeɠe nuiti kpein ta ɲɛɛɠulazu sù,
sìɛɲɔɠɔiti ti ɗa ta ɓɔ ba,
kwɛ̀ɛ nuiti ti ɗa lua bà.
Niiti ti kàazu eteaʋɛ, naati ti ɗa ɓizɛ, ti ɗa maaɠooza bà.
13 Nà-fai yeema nuiti bɛ ti-yiimaʋɛ, eɠɛ nà za.
Gè ɠɛa eɠɛ anii nii toai ya.
14 Nà naama woo ɲɔiti mɛnisu, niiti ti wosu dàalɔɠɔma:
«Maaɠooliʋɛ ga maalua vai.»
Ti zoloogɛ ma dàalɔɠɔma,
ti yaavai ɠili ga ti zɛ̀nvui ɠula zèa.
15 Kɛlɛ nɔ̀un nà, nà ɠalivaazu è ma, ee, Ɠɔoɠɔ GALAGI!
Gè ɠɛ ma: «Ɗa ga nà-GALAGI!»
16 Nà-eteai ɠa è yeezu,
kùla sìli nuiti zea, niiti ti wɔ̀inzeɠezu!
17 Yeezei bù ga pagɔ, nà ga ɗa-wotiɠɛ nui!
Kìzo ɗa-wooɠɛɠiladai maaʋele ma!
18 Ee, Ɠɔoɠɔ GALAGI, gè mina lɔ unfegi zu,
siɛgi zu gè wooɠulazu la è ma.
Faa ɲɔu ɠɛ nuiti ti yɛ unfegi zu,
ti yɛ maaɠɛkpɔgi zu, ti yei gɔvɛalaazu!
19 Ti ɠɛ ga ɓoɓoiti,
naama lakɔlɔgiti ti ɓɔɛzu ga gaazumaanɛɛi telebo nui laalɔɠɔma,
ta wasogi, ta wɔinzeɠemai.
20 Ɗa-nuɓɔɠɔlai wɔɔlɔʋɛ gola,
nii è makɛgai naati bɛ, niiti ti luazu è ʋa,
ta naati ti lɔɔɠuai è ʋolu,
nii è ʋaazu kɛɛzu ti ʋɛ, nuɓusɛi kpein gaazu.
21 Ɗa ti lɔɔɠuzu è-ɠaazu ma,
ti maaɠooza nuɓusɛiti ta-ɠisiɛ ɲɔiti ba,
dɔɔɠuzuʋɛ miná ɠa è ti ɠizosu ná,
nuiti ti-nɛgiti ma, niiti ti laalɛɛzu ti wu.
22 Mamagi ɠa Ɠɔoɠɔ GALAGI ʋɛ!
Mazɔlɔɔ é ná-wooɠɛɠiladai ɠulaʋɛ kɛlɛma bɛ̀,
nɛ̀i gè ɠɛni eɠɛ taa wolai seiɗai kɛlɛ su.
23 Kìgi zupuni, eyɛsu gè ɠɛ ma:
«É la mɔ yiizoolɛzu ga ze!»
Kɛlɛ è nà-maanɛɛnɛ wooiti mɛnini,
siɛgi zu gè wooɠulani la è ma.
24 Wɔiti wo ga Ɠɔoɠɔ GALAGI ná-wooɠɛɠila nuiti, à nɛɛʋɛ wo pɛ!
Ɠɔoɠɔ GALAGI ɠa ɗa kidaaleʋe nuiti makɛ.
Kɛlɛ toɠa waso nuiti sala ga ɲɔuɗa.
25 À zɛbɛzeɠe, wo zulo,
wɔiti wo ɠitogai Ɠɔoɠɔ GALAGI ʋa!