37
Kalagi é zɔlɔɔsu faiti su, ti leʋegai
1 Davide ná-guyei.
Mina yiiɠaawana naati ma, niiti ti faa ɲɔi ɠɛɛzu,
mina ɠaazuɠula naati ba, niiti ti kakama vaiti kɛɛzu.
2 Mazɔlɔɔ ta ʋoolozu, eɠɛ tufai,
ti vɔ, eɠɛ tufa lɛnugi.
3 Ɠaliva Ɠɔoɠɔ GALAGI ma, è ɗa faa ʋagɔi ɠɛ,
ɗa zei zooi zu, ziilɛigi zu.
4 Ɗa-undaanɛɛi ɠaiziɛ Ɠɔoɠɔ GALAGI ya,
toɠa è yiima vai ɠɛ è ʋɛ.
5 È-maavaiti kpein zɛ Ɠɔoɠɔ GALAGI yeezu,
ɠaliva tɔun ma, toɠa ti ɠaaɠula ba.
6 Toɠa ɗa-zɔledai ɠula kɛlɛma eɠɛ wozakalagi,
ta ɗa-ɠaamai eɠɛ folo gaalɔgai.
7 Maaɠɛ kpɔ Ɠɔoɠɔ GALAGI ɠaazu, tɔun maaɓɔun,
mina yiiɠaawana naati ma, niiti ti ɓɔɠɔ zɔlɔɔsu,
ɓaa nui naati daalɔɠɔma, niiti ti ɠisu vaa ɲɔiti suɓɛtɛzu.
8 Ɓe ziiɠaawanai ʋa, è ziiɠulagi yɛ ná,
mina yiiɠaawana, toɠa ɠɛ ga faa ɲɔu ɠɛɛ vaa.
9 Mazɔlɔɔ niiti ti faa ɲɔi ɠɛɛzu, naati ta leʋezu ga,
kɛlɛ niiti ti ɠitogai Ɠɔoɠɔ GALAGI ʋa, naati ta zooi zɔlɔɔ ga tɔnɔ.
10 Ná tago nɔ ʋe na, faa ɲɔu ɠɛ nui la mɔ ɠaa!
Ʋɛ é ɠɛa ná, ɗa naa ʋɛtɛ, nu nɔpɛ ge la ná!
11 Ɓɔɠɔmaayei nuiti ta zooi zɔlɔɔ ga tɔnɔ,
ti ɠoozunɛ ziilɛi golai zu.
12 Faa ɲɔu ɠɛ nui ɠa ɗa kisiɛ ɲɔiti kpɛtɛ telebo nui laalɔɠɔma,
é ɗa ɲiigai ziɛ ga naa laalɔɠɔma.
13 Anɛɛ naa ʋe, Maliɠii ɠa ɲɛɛɠulazu su,
tɔɔzei é kwɛɛ ga naa ná-foloi ɠa na zeeli.
14 Faa ɲɔu ɠɛ nuiti ta ɗa boɠa zɔkpɔi ɠula su,
ti ta-mɛɛin ɠaalɛ,
nii a kɛ ti maanɔɠɔ nui ta bala nui loo bu,
ti ʋa naati kɔdaaleʋe niiti ta-ʋelei zɔlegai.
15 Tiya ɓɔɠɔi ta-woɠa zɔkpɔi ɠa ti yiiɓota,
ta-mɛɛinti ta ɠaleɠale.
16 Nii goi é telebo nui ya naa vizɔgɛ,
é leʋe faa ɲɔu ɠɛ nuiti tɔnɔ mɔinmɔin golai ʋa.
17 Tɔɔzei faa ɲɔu ɠɛ nuiti ta-zobogi zu ɠa ɠoloɠolo,
kɛlɛ Ɠɔoɠɔ GALAGI ɠa ɓaa sɔle nuiti maazu.
18 Ɠɔoɠɔ GALAGI sɔbalala nuiti ta-eteai ɠwɛɛ,
ta-ʋoganii ɠa yɛ ná ɠɔ.
19 Ti la unfega maanɔɠɔ ziɛgi zu,
pului ma ziɛgi zu, ta laami, mɔtai yɛ.
20 Faa ɲɔu ɠɛ nuiti undaa ɠa ʋili,
Ɠɔoɠɔ GALAGI zili nuiti
ta ɠɛ eɠɛ tufa lɛnugi,
ti ɲɛɛlɛ, ti ɲɛɛlɛ duului zu.
21 Nu ɲɔi ɠa ɗa kuyei zeɠe, kɛlɛ é la kulaa ʋolu.
Telebo nui ɠa ɗa maawɔinɠai wo, é fe zea.
22 Mazɔlɔɔ niiti Ɠɔoɠɔ GALAGI tuya loozu ti ʋɛ, naati ta zooi zɔlɔɔ ga tɔnɔ,
niiti é ti voovoozu, naati ta leʋe ga.
23 Siɛgi zu nui ziɛ ʋelei nɛɛzu la Ɠɔoɠɔ GALAGI ʋɛ,
toɠa naa ɠɔɠɔ losu ɓɛtɛ ná-eteai zu.
24 Ni a loona, é la vɛzɛɠɛlɛga,
mazɔlɔɔ Ɠɔoɠɔ GALAGI ɠa sosu zeei ʋa.
25 Gè ɠɛni ga doungoi, gè wɔlɔzaɠaga,
gè la dɛ nu ɠaani nii sɔlegai, kɛlɛbai ʋa wo da,
ɓaa mavofodai ʋa ɗa daamianigi vali.
26 Toɠa ɗa maawɔinɠai ɠɛ, é kuye ʋɛɛ nu ma,
mavofodai ɠa tuyai zɔlɔɔ.
27 Ʋoluave faa ɲɔi ʋa, è faa ʋagɔi ɠɛ,
zei zooi zu, yɛ ná ɠɔ.
28 Mazɔlɔɔ sɔlegi nɛɛʋɛ Ɠɔoɠɔ GALAGI ʋɛ,
é la ɠɛlɛa ná-wooɠɛɠila nuiti ba.
Toɠa wɛlɛzu ti ma siɛnɔpɛ su,
kɛlɛ faa ɲɔu ɠɛ nuiti mavofodai ɠa leʋe ga.
29 Telebo nuiti ta zooi zɔlɔɔ ga tɔnɔ,
ti yɛ zeini ná ɠɔ.
30 Telebo nuiti ta ɗa ɠima ɓɔɛiti bo,
ti-nɛgi ɠa ɗa sɔledai ɠɛ.
31 Ta-ƓALAGI ná-tɔgi ɠa ti-yiimaʋɛ,
ti-ɠɔɠɔi la ɓunɛga.
32 Faa ɲɔu ɠɛ nui ɠa ɗa telebo nui maayaava,
é gaiziɛ ga é paa.
33 Kɛlɛ Ɠɔoɠɔ GALAGI la yeeɓega ba, é ʋa zɛ zeezu,
é la zɛga naa, ti ʋa peelala, siɛgi zu ti tukpɔzu la.
34 Ɠito Ɠɔoɠɔ GALAGI ʋa,
è ziɛ ga ná-pelei,
toɠa è wuzeɠe, è zooi zɔlɔɔ ga ɗɔnɔ,
ɗa faa ɲɔu ɠɛ nuiti ka, ti leʋe ga.
35 Gè nu ɲɔi ɠaa, é ná-zobodai kpein su,
é ɗa wɔɔlɔ, eɠɛ gulu wolai nii kpɔvɔai.
36 É leʋeni, wɛlɛ, é la mɔ ná.
Gè gaiziɛni, kɛlɛ é la ɠaani.
37 Ɠida GALA gaazuluaba nui ná-fai wu, nui naa ʋɛtɛ nii sɔlegai,
ziilɛi nui ɠa ɓɔɠɔ zɔlɔɔ ná-eteai zu.
38 Kɛlɛ kpaka nuiti kpein ta ɠoloɠolo,
faa ɲɔu ɠɛ nuiti ta-eteai ɠa ɠoloɠolo.
39 Telebo nuiti ta-ɠizogi ɠa ʋaazu, é zeɠe Ɠɔoɠɔ GALAGI ʋɔ bɛ.
Tɔ ɠa é ga ti-lɔɔɠuzuʋɛ, kidaaʋili foloi.
40 Ɠɔoɠɔ GALAGI ɠa ɓɔ ti ʋa, é ti unmɔɔ.
Toɠa ti unmɔɔ, é ti ɠula faa ɲɔu ɠɛ nuiti zea, é ti ɠizo,
tɔɔzei naati ta lɔɔɠuzu pɔ bɛ.