38
Seeɓɛ nui ná-GALA falii,
tɔɔzei ná-kotoi ʋa
1 Davide ná-guyei, é ɠɛ ga ɠizɛsui.
2 Ee, Ɠɔoɠɔ GALAGI, mina fàla, ɗa-yiiɠaawanai zu,
mina dòɠa, ɗa-yiiɠulagi zu.
3 Mazɔlɔɔ ɗa-mɛɛinti ti nɔ̀un soga,
è-yeei wuiʋɛ mà.
4 Fai tanɔpɛ ge la mɔ ɠɛʋele ma kpùsɛi zu, ɗa-yiiɠaawanai maaʋele ma.
Kɛdɛya la mà ɠaeiti zea, nà-kotoi maaʋele ma.
5 Mazɔlɔɔ nà-faaɠaaza golaiti kpudɛʋɛ nà-kisiɛi maazu,
eɠɛ kasɔ wuigi, ti wuiʋɛ mà gola.
6 Nà-palaiti ti ɲɔuɗa, ti-ɠugi ɗa ɠula
nà-ɠimalalai maaʋele ma.
7 Kpìligɛ, gè ɓɔlɔ fɔ da ge leʋe,
folo-o-folo, nà ziɛzu ziizoolɛi zu.
8 Mazɔlɔɔ abui ɠa é sàamaʋɛti galazu,
fai tanɔpɛ ge la mɔ ɠɛʋele ma kpùsɛi zu.
9 Zɛbɛ la mɔ bà, sùɠaleɠalea,
nà kpalagi wosu, tɔɔzei nà-ziiɓɔlɔi ʋa.
10 Màliɠii, wɔ̀inma vaiti kpein ta è ɠakalaʋɛ,
kpàla gooiti ti la lɔɔɠuni è ʋa.
11 Zìi ɠa doɠazu gola, sɛ̀bɛi ɗa ɠula zèa,
gàazuʋɛ la mɔ wozaɠaazu.
12 Nà-kpɔlɔi maaʋele ma, bɔ̀ɔlaiti ta sìɛpoluɲɔɠɔiti ti maaɠooza bà,
sèiɲɔɠɔiti ɓalaa ti maaɠooza bà.
13 Niiti ti pɔ ti pàa, naati ta baliiti tɛɛzu tùɠɔ,
niiti ti ɠɛɛzu maanɔɠɔi zeeli mà, naati ta kpɔɛiti bosu, nii a kɛ gè ɠoloɠolo,
ti ɗa unsuyelii lo folo-o-folo yaavai zu.
14 Nɔ̀un nà, gè ɠɛa eɠɛ goizuɓɔlɔ nui, gè la ta mɛnisu.
Nɔ̀un daaɠulugɛ eɠɛ ɓoɓoi.
15 Kɛ̀ɛʋɛ eɠɛ zunui nii é la faa mɛnisu,
é la ta zuloozu.
16 Ɗa ɠa gè è maaɓɔunsu, Ɠɔoɠɔ GALAGI,
ɗa ɠa ɗa gooɠaaʋotegi wo, Màliɠii, nà-GALAGI!
17 Mazɔlɔɔ nà bosu è ma ga: «Ti mina ɲɛɛɠula nɔ̀un su,
ti ʋa wuzeɠe dàalɔɠɔma siɛgi zu kɔ̀ɠɔi ɓalizu la!»
18 Mazɔlɔɔ sàsu ɠa na ʋa ɓalizu,
taɓai ɠa kɔ̀lɔ su yeenɔpɛ.
19 Ungo, gè nà-faaɠaaza golai ɠwɛɛ,
zìi ɠa zoolɛzu ga nà-kotoi vaa.
20 Tama sìli nuiti ta vulua, zɛbɛi ɠa ti ʋa.
Niiti ti wɔ̀inzeɠezu fuun, naati mɔinʋɛ.
21 Niiti ti nà-faanɛɛi zuloozu ga faa ɲɔi,
ti ɗa wuzeɠe dàalɔɠɔma, tɔɔzei faa ʋagɔi ɠa gè gaiziɛzu.
22 Ee, Ɠɔoɠɔ GALAGI, mina ɠɛlɛ bà.
Nà-GALAGI, mina maaɠooza bà.
23 Ʋa fala, è ɓɔ bà,
Màliɠii, nà-kizogi!