79
Yeelɛ ɠa è ʋaazu la è ɓɔ gi ʋa?
1 Azafe ná-guyei.
Ee, GALA, zii ɠiligiti ti ʋa ti ɗa-yooi zo,
ti è zei ʋɛlɛ ɲadegai ɠɔzɔa,
ti Zeluzalɛme zoga, ti naa ɠɛ ga kɔtu ziɠigiti.
2 Ti ɗa-wotiɠɛ nuiti paa, ti ti-ma ʋoomaiti fe wɔniiti zea ga daamianigi.
Niiti ti ga wooɠɛɠila nuiti è ʋɛ, ti naati ma zuaiti fea dɔɓɔ zuaiti zea.
3 Ti ti-ma ɲama ɓoigi ʋua Zeluzalɛme maaɠoolii zu, é lati ma,
nu nɔpɛ ge la zɔlɔɔni, nii a ti-ma ʋoomaiti maaɠulu.
4 Gi-zeiɲɔɠɔiti ta gi ʋoomusu,
gi ɠɛa ga ɲɛɛɠulasu ani naati zea, niiti ti gi-maaɠoolii zu, ti ɗa ɲɛɛ gi ma.
5 Ee, Ɠɔoɠɔ GALAGI, ɗa yɛsu ziiɠaawanai laawu yeenɔpɛ, eyɛsu yeelɛ?
Ɗa-yiiɠaawana wolai ɠa sosu, eɠɛ abui?
6 Ɗa-yiiɠulagi yei zii ɠiligiti ma, niiti ti la è ɠwɛɛ,
ta masadaiti ma, niiti ti la wooɠulazu è ma!
7 Mazɔlɔɔ ti Izilayɛle mia,
ti seizuʋɛ zuwoga, naa zuɲakai yɛ.
8 Mina gi-mɛmɛwolani ta-vaaɠaaza golai la gi unma!
Ɗa-maawɔinɠai ʋa gi ʋɔ fala, é mina lɛbi!
Mazɔlɔɔ gi maanɔɠɔa gola.
9 Gá-ɠizo GALAGI, ɓɔ gi ʋa, è-laaseigi ma lɛbiyai maaʋele ma.
Gi unmɔɔ, è gá-ɠotoiti gba, è-laaseigi wɔɔlɔ vai zu.
10 Leeni vaa zu, zii ɠiligiti ta ɠɛ ma:
«Mini ɠa ta-ƓALAGI ná?»
Dɛɛ ga tiye gi ɠaazu, ga ɗa-wotiɠɛ nuiti ma ɲamai puai, ɗa potokulazu!
11 Kasoɠa nuiti kpala gooi zeeli è ma!
È-yeelokoi ná-zɛbɛi ʋɔ, naati kizo, niiti ti saai ma vaaɓaagi laawu.
12 Ɓaaɠulamai gi-zeiɲɔɠɔiti ti kɛai ga ɗe, Maliɠii,
naa ɠɛɠalai zei ti ma, ga dɔfela!
13 Gɔun gá, ɗa-nuɓusɛiti, baala kpulugi nii è ga makɛ nui,
gá è maamusɛ eyɛsu ɠɔ, gá zeze ga è maamusɛ vai, yeeɠɛɠalaiti pɛ su nuiti saama.