80
Eyɛsu yeelɛ, Maliɠii?
1 Guye loo ɠundiɠii nɔnɔi ʋe. Nii é loozu é zoloo guye wooi ma, nii daa ga: «Bulɛgi ma ʋuaiti». Zeele wooi. Azafe ná-guyei.
2 Baala kpulugi Izilayɛle makɛ nui, woilo gòoi ma,
ɗɛi è losu Zozɛfe mavofodaiti untuɠɔ, eɠɛ baala kpulugi.
Ɗɛi ɗa-masa kpɔkpɔgi zeini seeluɓɛinti unda,
è-ma zezei ɠula kɛlɛma,
3 Efelayime wolodamaiti tuɠɔ, ta Ɓɛnzamɛn, ta Manasé.
È-zɛbɛi ɠula kɛlɛma, è ʋa è gi ɠizo!
4 Ee, GALA, gi zei ʋele ɓɛtɛ ʋolu,
yeezei gi wu ga pagɔ, gá ɠizo.
5 Ee, Ɠɔoɠɔ GALAGI, Fai-Pɛ-Maliɠii!
Ɗa yɛsu ziiɠaawanai zu, ɗa-nuɓusɛiti ta-ƓALA falii laalɔɠɔma, eyɛsu yeelɛ?
6 Ɗa ti-ɠɔnɔgi ɠɛɛzu ga ziizoolɛi,
ɗa ti ɓɔɔle ɗɛi ɠɛɛzu ga ti-ɠaazuɗɛi, kwɛ ge la ba.
7 Ɗa gi ɠɛɛzu ga sakpe ganii gi-zeiɲɔɠɔiti bɛ,
gi zili nuiti ti ɗa ɲɛɛɠula gi zu.
8 Ee, GALA, Fai-Pɛ-Maliɠii, gi zei ʋele ɓɛtɛ ʋolu,
yeezei gi wu ga pagɔ, gá ɠizo!
9 È leezɛn ansaɠɔgi lɔɔɠulani Ezipete yooi zu,
è zii ɠiligiti kpɛɛni, è siinni ʋolu.
10 È zooi ɠaaɓɛtɛni tuɠɔ.
É ma zapeiti dɔɔni zooi wu, naa ʋolu é zooi zulaave.
11 Ná-niinigi ʋɛɛni gizeiti ma,
ma ɓekegiti ti ɠulani ga sɛdele gulu wolaiti.
12 Ma ɓekegiti ti zeelini eyɛsu kpoloɗɛi ma,
ma ʋɔnɔgiti ti zeelini eyɛsu ziɛ wolai Efelate ma.
13 Leeni vaa zu è zeɠei wɔai ná-sasaiti ba,
teʋe nuiti kpein ti ɗa ʋa, ti ɗa ma waai ɠula?
14 Boigi ɠa ɠulazu dɔɓɔi zu, é ʋa é ɗa koloɠolo,
dɔɓɔ zuaiti ta ʋaazu ti ɗa mi.
15 Ee, GALA, Fai-Pɛ-Maliɠii, ʋa ʋolu kae!
Yɛ geeɠɔlɔgi maazuʋɛ geezuʋɛ, è wɛlɛ!
Leezɛn ʋɔnɔgi tɛi maalobo!
16 Nii makɛ, nii ɗa ɓɔɠɔi è siingai,
zunu loin tɛi, nii ɗa ɓɔɠɔi è zobogi veeni bɛ.
17 Leezɛn ʋɔnɔgi tɛi ge ɠalaa, é leʋea ga.
Ti pɛ undaaʋili ɗa-yiiɠaawanai zu!
18 È-yeei yɛ zunui naa ʋa, nii é zeini è yeezazuʋɛ,
nii ɗa ɓɔɠɔi è zobogi veeni bɛ.
19 Gi la mɔ zeɠea è ʋa eyɛsu pɛ.
Gi vulu su ʋolu, gá wooɠula è ma.
20 Ee, Ɠɔoɠɔ GALAGI, Fai-Pɛ-Maliɠii, gi zei ʋele ɓɛtɛ ʋolu,
yeezei gi wu ga pagɔ, gá ɠizo!