81
Ee, ni nà-nuɓusɛiti ti woiloni gòo ma!
1 Guye loo ɠundiɠii nɔnɔi ʋe. É loozu kɔnigi ɠa, nii é zeɠezu Gate taazuʋɛ. Azafe ná-guyei.
2 À guyei loo ga koozunɛɛi GALA bɛ, tɔ ɠa é ga de-zɛbɛi!
À wooɠula ga koozunɛɛi Zakɔɓe ná-GALAGI ʋɛ!
3 À guyei loo ʋɔɔma, wo tamadegi ɠɛin,
wo kɔnigi ɠɛin gooloo ma, wo papai ɠɛin!
4 À puʋugi vɛ alu toga niinɛi ma,
ta à zeina gize la, ada-vɛti volo wolai!
5 Mazɔlɔɔ toɠa ga tɔgi Izilayɛle ʋɛ,
Zakɔɓe ná-GALAGI ná-devei ʋe.
6 Tɔgi ʋe, GALA ge seini Zozɛfe ná-pɛlɛyeɠei ma,
siɛgi zu é laalɛɛni la Ezipete yooi wu.
Nà wooi ta mɛnisu, nii gè la kwɛɛ, é ɠɛɛzu ma:
7 «Gè kasɔi zeɠea wo ɠɔma,
wo-yeeiti ti viega, ti ɓe kpɔlɔgiti ba.
8 Siɛgi zu wo ɠɛni la kidaaʋiligi zu, wo tòlini, gè ʋaani, gè wo unmɔɔ,
gè wo wooɠaaʋoteni tonavifigi zu,
gè wo ʋoluɠulani Meliɓa ɗɛi ɠobaʋɛ.
Lo!
9 «Nà-nuɓusɛiti, à woilo gòo ma, nà wo lɛnɛsu.
Ee, ni nɔ wo ɠɛni woilosu gòo ma, Izilayɛle!
10 Gala kili ge mina ɠɛ wo yeema,
à mina nɔkɔ gala kiligiti taɠila kpalaa bu!
11 Nà ga Ɠɔoɠɔ GALAGI, wa-ƓALAGI, nii é wo ɠulani Ezipete yooi zu.
À laalao gola, nà ti laave.
12 Kɛlɛ nà-nuɓusɛiti ti la woiloni gòo ma,
Izilayɛle la nɔ̀un pɔ.
13 Gè ti yɛgɛ ti yiima vaiti polu,
ti ʋilɛgɛ ti ɓɔɠɔyiima vaiti nɔ ʋolu.
14 Ni nɔ nà-nuɓusɛiti ta woilo gòo ma,
ni Izilayɛle ɠa ziɛ ga pelei gè dɛɛzu la,
15 gaamago nɔ, nà ti zili nuiti da ti ɠɔɠɔwu,
nà ti nimiza nuiti doɠa.
16 Niiti ti Ɠɔoɠɔ GALAGI wɔinzeɠezu, naati ta lɛbiyai ve tɔun bɛ,
naa ɠa deveai ti ma eyɛsu ɠɔ.
17 Nà Izilayɛle ɠɔnɔkula ga molo ʋagɔi,
gè dɔɓɔ ɠɔingi ma wulɔi ve ti ya, ti yiɠo la.»