Sɛʋɛi Naanisiɛi
90
(Guyeiti 90—106)
Ɠigi ve gi ʋɛ, gi gá-voloiti gaalu
1 GALA nui Moize, ná-GALA falii.
Maliɠii, è ʋɔ bɛ ɠa ná ɠɛni ga gi-zeizuʋɛ,
yeeɠɛɠalaiti pɛ su.
2 Aisa gizeiti ti ʋa zɔlɔɔ,
è ʋa zooi ta eteai ɓɛtɛ,
ɗa ga GALA, ɠɔoɠɔ.
3 Ɗa nui ɠaaɠalesu ma fufiligi zu,
ɗa ɠɛɛzu nuɓusɛiti ma:
«À ɠale ma náʋɛ!»
4 Mazɔlɔɔ kona waagilagi (1.000) ɠa è ɠaazu,
eɠɛ wogi voloi nii teʋegai na,
eɠɛ lɛlɛi tanigaani ti ɠɛai kpidii.
5 Ɗa nuɓusɛiti zɛʋɛzu, eɠɛ ɲiimɛni goi nɔ,
ti ɠɛɛʋɛ eɠɛ tufa lɛnugi, nii é leʋesu.
6 É ʋuazu sobui, é leʋe,
kpɔkɔi, é ʋoolo, é vɔ.
7 Ɗa-yiiɠaawanai gi ɠalaa,
ɗa-yiiɠulagi ɠa gi maaluazu.
8 È gá-vaaɠaaza golaiti kpein pua ɠakala,
niiti kpein gi ɠɛa ti lɔɔɠuzu, è naati pua ɗa-wozakalagi ɠa è ɠaazu.
9 Mazɔlɔɔ gá-voloiti ta ɲɛɛlɛzu ga ɗa-yiiɠaawanai,
gá-ɠonagiti ta leʋesu fala eɠɛ nu ɓala goo ɠilagi.
10 Gá-ɠonagi liegɔi ɠa ga kona ʋuulɔfela (70),
ni zɔi sulogai, kona ʋuulɔsaʋa (80).
Kɛlɛ naati ta ziɛzu kpɔlɔi zu, ta nimizai,
yeeɠɛɠalai ɠa leʋesu gaamanɔ, ta gá ɠoʋesu, gi ɗa li saai ʋɔ pelei.
11 Ɓɛ ɠa a ɗa-yiiɠaawanai zuzɔligi ɠwɛɛ?
Ɓɛ ɠa é è lɛbizu gola, é ɠizɛ ɗa-yiiɠulagi zu?
12 Gi ɠala ga gi gá-voloiti gaalu ga pagɔ,
naa ɠa a kɛ gi ɠimalai zɔlɔɔ.
13 Ee, Ɠɔoɠɔ GALAGI, ɠale ma gi ʋɔ. Ɗa yɛsu nɛkɛsu, eyɛsu yeelɛ?
Gi maawɔinɠa, gɛi gi ga ɗa-wotiɠɛ nuiti!
14 Geelaa ɠa laona nɔ feya, ɗa-wooɠɛɠiladai lɛ ga giye,
naazu gá guyei loo ga koozunɛɛi gi-zii ma voloi pɛ su.
15 Koozunɛ voloiti fe gi ya, gá-ʋoluɠula voloiti potogi zu,
koozunɛ ɠonagiti fe gi ya, gá-maanɔɠɔ ɠonagiti potogi zu.
16 Ɗa-ɠɛɛwotii ɠula kɛlɛma gi ʋɛ, gɛi gi ga ɗa-wotiɠɛ nuiti,
gi-mavofodaiti ti è wɔɔlɔ ʋelei ɠa.
17 Maliɠii gá-ƓALAGI ná-wɔinlai ɠɛ gi pɛ ba!
Kulanuma ɠɛ gá-wotiiti ba, nii a yɛ ná,
ungo, kulanuma ɠɛ gá-wotiiti ba, nii a yɛ ná.